Ranmhude ọne emianmhẹn natiọle COVID-19, ene gbẹloghe bhi agbaẹbho ne bunbun da yọle ghe ele bha yẹ guanọ nin ẹbho ha sikoko lu emhin bii ọnikhẹ. Esali Jehova wo muegbe nin ele rẹ re obọ rẹkhan ọne uhi nan nin ene gbẹloghe gbele. Bhiriọ, ele da guanọ uwedẹ ọbhebhe nin ele ha rẹ ha do ikolo oga nesele. Agbotu ne bunbun da munhẹn ha noo emhin natiọle Zoom rẹ do ikolo oga.

 Nin mhan da sabọ ha do ikolo oga nesẹmhan ẹghe rebhe, Otu Nọn Sun Oga da re obọ bhọ nan rẹ re igho nin agbotu re re rẹ haosa ọbhi Zoom nin agbotu noo. Ọnan da wo kiẹn udede urẹkpa rẹji agbotu ne imhọn igho nin ele ha rẹ haosa nan rẹ noo Zoom, ranmhude, igho nan ha ọbhọ ghan sẹbhi ₦7,000 la ọ gbera. Ọkuẹsẹ ele miẹn ọne urẹkpa nan, Zoom nan ji ọria da noo ọsọhẹ ele rẹ ha noo. Sokpan, ikpẹta ẹbho ọkpa ha sabọ deba bhi ọne ikolo oga. Sẹyẹ, ọ bha mhẹn sẹbi ọne a ha igho ọi. Agbotu rebhe ne noo Zoom nin agbotu haosa ọi wo miẹn elele bhọ, ranmhude ẹbho ne bunbun sabọ deba bhi ikolo oga. Sẹyẹ, beji ọ rẹ mhẹn, iriọ ọ yẹ rẹ lẹkhẹ nan rẹ noo. Ukpẹdẹ nin ẹlẹnan, ọ gbera agbotu 65,000 bhi agbaẹbho 170 ne noo Zoom nin agbotu haosa ọi.

 Agbotu Kairagi nọn ribhi Manado bhi North Sulawesi, Indonesia, da zobọ bhi Zoom ọsọhẹ nin ele rẹ ha noo, ele da munhẹn ha noo ọne agbotu haosa ọi. Obhio mhan nin Hadi Santoso da yọle: “Ibhio mhan ne bha manman guẹ ebi a rẹ noo ifoni yẹ ki wo sọnyẹnmhẹn bhi ikolo oga nin mhan re ọne Zoom nan do, ranmhude, ọne ikolo iyẹ hian igba ne bunbun.”

 Obhio mhan nin Lester Jijón, Jr., nin ọkpa bhi ene ewanlẹn ne ribhi agbotu ọsi Guayacanes Oeste da yọle: “Ranmhude ibhio mhan ne ribhi ọne agbotu nan imanman mhọn igho, a bha miẹn ebi ele ha rẹ sabọ haosa Zoom yẹ, beji a da miẹn ọrebhe ki sabọ ha kugbe do ikolo. Sokpan, ranmhude ọne Zoom nin agbotu rẹkpa mhan rẹ ha mhọnlẹn, mhan ki wo sabọ tie ẹbho ne deba mhan bhi ikolo oga, ranmhude ofẹn iyẹ mun mhan ghe Zoom nọnsẹmhan dẹ vuọn.”

 Obhio mhan nin Johnson Mwanza nin ọkpa bhi ene ewanlẹn ne ribhi agbotu ọsi Ngwerere North bhi Lusaka, Zambia da gbẹn yọle: “Ibhio mhan ne bunbun wo tale ghe ọne Zoom nan nin agbotu mhanmhan nin ele wo re ele dọ sikẹ ibhio ele, yẹ rẹman ele ghe Jehova manman hoẹmhọn ele.”

 Igho nin agbotu mhanmhan ọbhi otọ nin ele rẹ ha rẹkpa ibhio mhan nin emhin idunmhuri sunu je, ọle ele rẹ haosa ọbhi ene Zoom nan. Igho nin ẹbho re ọkhọle nọnsele re re nin ele rẹ re urẹkpa nin iwẹnna ọsi Esali Jehova, ọle mhan rẹ lu ene emhin nan. Eji a tiọle donate.pr418.com bhi wẹbsait nọnsẹmhan, ọle ẹbho ne bunbun da re igho re. Mhan yi bha obulu bhi uwedẹ nin bha rẹ ha re ọkhọle rebhe re igho re, beji mhan ha da sabọ ha re iyobo nin ibhio mhan bhi otọ agbọn rebhe.​—2 Corinthians 8:14.