The Watch Tower ọsi Jun 1, 1912 da yọle: “Asabọmiẹn ghe ẹbho ne bunbun ne tie ebe nesẹmhan lẹn ẹbho ne ruẹlo. Ele dẹ sabọ ha miẹn ebe tie ọsọhẹ. . . . Ikpebe ne yo dagbare, ele a print ọbhi ene ebe nan, beji a ha da miẹn ghe ene ruẹlo ki ha tie ọle.” The Watch Tower da sẹyẹ yọle: “Ọ wo ti ẹbho ne bunbun bhọ ne ruẹlo rẹ họn ghe, ẹghe vade nin erọnmhọn ha rẹ gba ọne otọ nan rebhe.”

 Ẹghe nan rẹ gbẹn The Watch Tower nin, uwedẹ kẹkẹ ẹbho rẹ ha gbẹn ebe nin ene ruẹlo ha tie bhi urolo ebo. Ọrẹyiriọ, Esali Jehova munhẹn fo ha noo ene ikpebe nan ne yo dagbare rẹ ha re ẹmhọanta man ene ruẹlo. Mhan sẹ wo yẹ lu iriọ rẹ sẹbhi ẹlẹnan! Ẹlẹnan nian, ọ gbera urolo 50 nan sẹ zedu ene ikpebe diọ. Be a rẹ gbẹn ene ikpebe nan nin eruẹlo re obọ tie yẹ?

 Emhin ọhẹnhẹn nan ka lu hi, nan rẹ gbẹn ene ikpebe nan rẹ gbẹn ikpọta ọsi ene ruẹlo. Obhio mhan natiọle Michael Millen, nọn wẹnna bhi dipatmẹnt ne lu ikpebe, natiọle Text Processing Services nọn ribhi Patterson, New York, da yọle: “Bhi ẹghe nọn gbera, mhan ki ha ne ẹbho dẹ emhin nan ne ọbhi ẹkẹ kọmputa nan rẹ gbẹn ene ikpọta, ọkpakinọn, mhan isabọ noo ele rẹ zedu ebe diọbhi urolo rebhe nin mhan guanọ. Ejayenan nian, mhan ki noo ebi agbotu lu nan rẹ zedu ebe natiọle Watchtower Translation System. Ọ rẹkpa mhan rẹ sabọ zedu ene ikpebe nin eruẹlo tie diọbhi urolo ne bunbun. Mẹn rẹọbhọ ghe, ije soso iribhọ nan ha da sabọ miẹn ebi a rẹ zedu ebe nọn sẹnian, gbera ọnan nin agbotu nọnsẹmhan lu.”

 Ọ iyi ikpọta ọkpa a zedu ọle bhi ebe nan lu nin ene ruẹlo, a sẹyẹ gbẹn ikpọta nan rẹ tẹmhọn ebi foto ne ribhọ dia yẹ.Bhi ọsi ijiẹmhin, inian a rẹ tẹmhọn foto nọn ribhi odalo ọne ebe natiọle Sọnyẹnmhẹn bhi Ighegheghe! nan gbẹn nin ene ruẹlo: “Okpea ọkpa munhẹn ha khian bhi ẹfan nọn gọnọ a, ebe bi ilunmhun ne mhọn-ose ribhi egbe ọne ẹfan.” Obhio mhan ọkpa nọn ruẹlo natiọle Jamshed, ọkpa bhi ekanẹfan bi ene zẹ sike ewanlẹn ọle khin. Ọle da yọle: “Uwedẹ nan rẹ tẹmhọn ọne foto wo manman ti mẹn bhọ.”

 A ha ki mhanmhan ene ikpọta fo, a ki je ọle ji Bẹtẹ ne ha print ene ikpọta nan zedu ọle dagbare. Bhi ọne Bẹtẹ, ele ki mun ene ikpebe toman ebe ne manman ziẹn, beji a ha da miẹn ghe, a ha ki ha noo ọle, ọ ida wẹn kua. Ele ha ki lu ọle fo, ele ki ne ene ebe kugbe yẹ gban ele. Bhiriọ, ele ki ne ene ebe deba ebe nan ha ne ji agbotu kẹkẹ, la ele ki ne ele diọbhi post ọfisi nin ele ne ji ibhio mhan, beji ele rẹ ne ebe ọsọhẹ ji ẹbho ne ruẹlo. Ẹgheso, agbotu ki lu ọle beji a da sabọ re ẹjẹje je ene ebe ji ibhio mhan ne ruẹlo la ene iyẹ manman daghe nọnsẹn, nin ele da sabọ miẹn ebe noo bhi ikolo oga.

 Ẹghe bi igho nọn kpọnọ, ọle a noo rẹ sabọ lu ene emhin nan. Ẹghe nan noo rẹ lu Baibo eva nin eruẹlo tie, ọle ibhio mhan ne wẹnna bhi eji a da print ebe bhi Wallkill, New York noo rẹ print Baibo ọkhọnkhan ne bun sẹbhi 50,000. Baibo ọkpa nan zedu ọle diọbhi urolo ebo nan lu nin ene ruẹlo, ebe 25 ele ye. Igho nan rẹ dẹ emhin rẹ lu ọne Baibo ọkpa nan, re igba 123 gbera igho nan rẹ print Baibo ọkhọnkhan. Igho nan rẹ lu ikeke ọne Baibo nan nọn ribhi ebe 25, ghan sẹbhi ₦62,925 ($150 ọsi U.S.)!

 Ẹlo nela ibhio mhan ne lu ebe nin eruẹlo tie rẹ ghe iwẹnna nin ele lu? Nadia nọn wẹnna bhi Bẹtẹ nọn ribhi South Africa da yọle: “Iẹnlẹn bha lẹkhẹ nin ibhio mhan ne ruẹlo la ne isabọ daghe nọnsẹn. Bhiriọ, ekpẹn nọn khua nọn rẹji mẹn rẹ sabọ lu emhin nọn ha rẹkpa ele. Ọnan wo rẹman ghe, Jehova manman hoẹmhọn ele.”

 Ahakimiẹn ghe ọria nọn ruẹlo iguẹ rẹ tie ebe nan gbẹn nin ene ruẹlo kii? Ikpe eso ne gbera, agbotu da re ebe dagbare natiọle Learn to Read Braille (Luẹ Ebi A Rẹ Tie Ebe Nan Gbẹn Nin Ene Ruẹlo Yẹ). Ikpọta nan gbẹn nin ene ruẹlo bi ebi a gbẹn ne rẹman ebi ele mundia nan, ele ribhi ẹkẹ ọle. A lu ọle beji a ha da miẹn ghe, ọria nọn sabọ daghe bi ọnọn ruẹlo ki sabọ ha luẹ ọle kugbe. Ẹkpa nin ọne ebe nan ye, a yẹ ne ebe nọn dia para bi ukeke ba ọle, bhiriọ ọria nọn luẹ ebi a rẹ tie ebe ọsi ọruẹlo yẹ ki noo ene emhin nan rẹ ha gbẹn ene ikpebe. Ọnan ki rẹkpa ọle rẹ ha yere ene ikpebe kẹkẹ nin ọle gbẹn yẹ sabọ lẹn ọlẹn sade ọle re obọ so ele.

 Elele nela ibhio mhan ne ruẹlo la ene iyẹ sabọ daghe nọnsẹn sẹ miẹn bhi ene ebe nan? Obhio mhan nin Ernst nọn nyẹnlẹn bhi Haiti da sẹyẹ ha yo ikolo oga arẹmiẹn ọle imhọn ebe nan gbẹn nin ene ruẹlo. Sokpan, nin ọle da sabọ re ọta man, la re ewanniẹn ọbhi inọnta bhi ikolo oga, ọle ki manman luẹ ele ọbhi uhọnmhọn. Sokpan, bhi ejayenan nian ọle da yọle: “Mẹn ki wo sabọ niẹn obọ okhun rẹ re ewanniẹn ọbhi inọnta bhi ẹghe nọn hi ki rẹ khin. Ọkpa mẹn bi ibhio mẹn ki khin nian, ranmhude mẹn ki deba ele miẹn ebale oriọn nian!”

 Obhio mhan ọkpa nọn ruẹlo natiọle Jan, nin ọwanlẹn ọkpa bhi agbotu bhi Austria nọn sun iluẹmhin ọsi ebe Okhẹughe bi Iluẹmhin Baibo ọsi Agbotu da yọle: “Ebe nin agbotu gbẹn nin ene ruẹlo, ọle mhẹn nẹ ene ẹbho nekẹle gbẹn nin mẹn sẹ tie. Bhi ọsi ijiẹmhin, ọ wo lẹkhẹ nin mhan rẹ kẹ miẹn apapale nin mhan guanọ bi emhin nan gbẹn bhi otọ ọle, sẹyẹ, ele wo manman gbotọ ifoto ne ribhọ fanọn an nọnsẹn.”

 Ọkanẹfan ọkpa ribhọ natiọle Seon-ok nọn nyẹnlẹn bhi South Korea. Odin bi ọruẹlo ọle khin. Ẹghe nọn gbera, urolo nan rẹ re obọ so ọria egbe, ọle a rẹ nanlẹn talọ bhi ikolo oga. Sokpan bhi ejayenan nian, ọle ki sabọ tobọle tie ebe nan gbẹn nin ene ruẹlo. Ọle da yọle: “Ebe nin enekẹle gbẹn nin ene ruẹlo wo nọghọ nan rẹ tie ranmhude, ikpebe eso ribhọ ne iribhi ẹkẹ ọle, ene ulọn ki wo gọnọ a, sẹyẹ, ebe nan gbẹn ele ọi ki dia fẹghẹ-fẹghẹ. Sokpan, ebe nọn manman mhẹn Esali Jehova noo rẹ gbẹn ọsi ele, sẹyẹ, ikpọta ne ribhọ wo manman yo dagbare nọnsẹn, bhiriọ ọ wo lẹkhẹ nin mẹn rẹ tie.” Ọle da yẹ yọle: “Bhi ẹghe nọn gbera, mẹn isabọ tobọmẹn luẹ ebe nin agbotu gbẹn re, ẹbho rẹkpa mẹn. Sokpan, bhi ejayenan nian, mẹn ki tobọmẹn luẹ Baibo. Ọ wo re mẹn ghọnghọn beji mẹn ki rẹ sabọ tobọmẹn muegbe ikolo oga ọbhi otọ yẹ wo sabọ deba lu emhin rebhe nan lu bhi ikolo oga. Mẹn wo tie ebe rebhe nin agbotu gbẹn nin ene ruẹlo, mẹn ida sabọ zobọ bhọ rẹ ha tie ele.”

 Ebi a gbẹn bhi ebe nesẹmhan nin agbotu printi, ọle a yẹ gbẹn ọbhi ebe nan gbẹn nin ene ruẹlo, nọn yọle: “A ikhiẹn ọne ebe nan. Ọkpa nọn bhi ebi a rẹ lu iwẹnna nan rẹ man ẹbho Baibo bhi otọ agbọn nan rebhe. Eria tobele re ọkhọle nọnsele re emhin re, nin ele rẹ robọkpa bhi ọne iwẹnna nan.” Bha obulu bhi emhin nin bha na donate.pr418.com re re. Igho nin bha re ọkhọle rebhe re re, ọle a rẹ sabọ lu ebale oriọn nin ọrebhe, rẹ sẹbhi ene ruẹlo bi ene isabọ daghe nọnsẹn.