Jehova re illo rẹ lu ẹsele nin mhan. Ọ dẹ sabọ rẹso uwedẹ nin mhan rẹ ria eria bi uwedẹ nin mhan rẹ lu emhin, la ọ dẹ sabọ re ọhubhudu nin mhan rẹ lu emhin. Iriọ illo ikẹ nin agbotu lu dia rẹji mhan. Ene illo dẹ sabọ re imhan sikẹ Jehova gbera ọnikhẹ.

 Rẹ na 2014 ha vade, ọ gbera illo ikẹ 70 nin agbotu sẹ lu. Ọ ti mhan bhọ rẹ ji bha lẹn ghe ọkpa bhi ene illo nan, ọ gbera urolo 500 nan sẹ zedu ọle diọ! Sokpan uwẹ sabọ rẹ ha riale, ‘Hebhọ lu ene illo? Be a rẹ lu ele yẹ?’

 Usun ibhio mhan nin ikpea bi ikhuo ne wẹnna bhi dipatmẹnt nọn lu vidio bi rẹkọdi nan kaehọ ọle, ele lu ene illo nan. Otu Nọn Mhọn Obọ bhi Iman-emhin, ele sun ọne iwẹnna nan nin ene ibhio mhan nan lu. Ibhio mhan nin ikpea bi ikhuo 13, ele ribhi ẹkẹ ọne usun nan. Ene ibhio mhan nan, ele hi ene lu ene illo, rẹkọd ele, yẹ mhanmhan emhin kẹkẹ nan ha lu bhọ ọkuẹsẹ a re ọle dagbare. Yẹ deba ọne usun ibhio mhan nan, Otu Nọn Mhọn Obọ bhi Iman-emhin ye zẹ ibhio mhan eso bhi otọ agbọn rebhe ne lẹn ẹlo ebi a rẹ so illo bi ebi a rẹ rẹkọdi ọle yẹ, nin ele ha deba usun ibhio mhan nan wẹnna. Ene ibhio mhan nan nin ikpea bi ikhuo wo mhọn idegbere, ele iguanọ nan ha gẹn ele bhi ọne arẹnan nan nin ele mhọnlẹn.

 Be bhọ a rẹ lu ene illo ikẹ nan yẹ? Ọhẹnhẹn, Otu Nọn Mhọn Obọ bhi Iman-emhin ki ka zilo nyan uhọnmhọn-ọta bhi Baibo nin ọne illo ha diẹn mun bi ebi ele guanọ nin ọne illo rẹ rẹso ẹbho yẹ. Ele ha ki lu ọnan fo, ọne usun ne lu ọne illo ki mhanmhan ebi ọne illo ha dia yẹ bi ebi a ha rẹ so ọle yẹ. Ele ha ki lu ọle fo, ele ki je ọle ji Otu Nọn Mhọn Obọ bhi Iman-emhin nin ele fẹ ọle ghe si emhin ribhọ nan ha re sibhọre la ne ba ọle. Ọne usun ha kere ghe emhin ribhọ nan ha lu bhọ, ele ki hẹnhẹn ọne illo yẹ rẹkọdi ọle, nan re ọle dagbare. Ele dẹ sabọ rẹkọdi ọle bhi ẹkẹ Bẹtẹ la bhi uwa ọsi ibhio mhan ne mhọn ebi a rẹ rẹkọd illo.

 Emhin kẹkẹ nan rẹ lu illo bhi ẹkẹ kọmputa, ele ene ibhio mhan noo rẹ mhanmhan ene illo yẹ rẹ rẹkọdi ele. Yẹ deba ọnin, ele ki yẹ noo ebi a rẹ khue illo, ebi a rẹ mhanmhan illo, ebe rẹkpa ọne illo rẹ sabọ ro dagbare, bi maikrofoni rẹ so ọne illo. Igho nan rẹ dẹ ọkpa bhi ene maikrofoni nan dẹ sabọ ghan sẹbhi ₦41,950 ($100 ọsi U.S.) la ọ dẹ sabọ ghan gbera ₦419,500 ($1,000 ọsi U.S.) nan rẹ dẹ ọle. Bhi 2020, ₦48,662,000 ($116,000 ọsi U.S.), ọle agbotu noolo rẹ dẹ ebi a rẹ khue illo.

 Be agbotu rẹ sabọ te igho nan noo bhi ọne iwẹnna nan yẹ? Ibhio mhan ne lu ilọnmhọn illo bhi ẹkẹ Bẹtẹ iyẹ manman bun, sokpan, ibhio mhan ne nabhi ole deba Bẹtẹ wẹnna, ele a ki manman noo. Yẹ deba ọnin, kọmputa ele ki manman noo rẹ rẹkọd ene illo, ele iyẹ tie ẹbho ne bunbun vae bhi ijan ọkpa dọ ha lu ọle.

 Ọ wo yẹẹ ibhio mhan nin ikpea bi ikhuo rẹ ha kaehọ illo ikẹ. Tara nọn nyẹnlẹn bhi Germany da yọle: “Ene illo ko mẹn udu re, sade emhin kpokpo mẹn bhi ọkhọle. Mẹn ha kaehọ ene illo bhi urolo nọnsẹmhẹn, ọ ki dia mẹn bhi egbe ghe, Jehova mun mẹn dede.” Obhio mhan nin okpea natiọle Dmitry nọn nyẹnlẹn bhi Kazakhstan da yọle: “Ọ wo yẹẹ mẹn rẹ ha khue ene illo, ranmhude, mẹn a ha kaehọ ele, mẹn ikpokpo egbe si ele diẹn mun adia nọn ribhi Baibo. Yẹ deba ọnin, ene illo rẹkpa mẹn rẹ ziẹn ikolu nin mẹn bi Jehova ko mhọnlẹn.”

 Delia nọn nyẹnlẹn bhi South Africa ki ha tẹmhọn ebi ene illo nan dia ọle bhi egbe yẹ, ọle da yọle: “Ele wo ziẹn urẹọbhọ nọnsẹmhẹn. Ahamiẹn ghe mẹn ribhi ọbalọ, la kuẹlo da ọnọghọ, illo ikẹ wo ribhọ nọn ha sabọ rẹkpa mẹn. Mẹn ha wo họn ene illo khue, egbe ki wo fu mẹn re!”

 Eso bhi ene illo ikẹ nan kiẹn illo ne yẹẹ ibhio mhan eso nẹ. Lerato nọn nyẹnlẹn bhi South Africa da yọle: “Illo bii ‘Ọ Dẹ Kẹ Lu Ọle Nin Mhan’ bi ‘Agbọn Ọsọgbọn Nọn Vade,’ re mẹn re ọkhọle mun ẹghe nin mẹn ha rẹ gbobokhian nin inẹn mẹn nọn yu. Ẹghe nọn hi rẹ khin nin mẹn rẹ kaehọ ene illo nan, ọ ki dia mẹn bhi egbe ghe, mẹn daghe inẹn mẹn runẹ bu mẹn vade, tan obọ a nin ọle rẹ mun mẹn dede.”

 Okpa bhi ene illo nan wo manman rẹkpa obhio mhan nin okhuo nọn ọlasẹre nọn nyẹnlẹn bhi Sri Lanka. Ọle da yọle: “Ọman-emhin bhi klas nọnsẹmhẹn da wo re unun zanzan mẹn an bhi odalo ene imhan ko ribhi klas ranmhude ọkpa bhi Esali Jehova mẹn khin. Ofẹn da wo manman ha mun mẹn, sẹyẹ, mẹn bha lẹn ebi mẹn ha ta yẹ. Mẹn ki sẹbhi uwa, inẹn mẹn da taman mẹn nin mẹn kaehọ ọne illo nọn yọle, ‘Study Makes You Strong’ (Iluẹmhin Baibo Dẹ Rẹ Uwẹ Ziẹn). Ọne illo da rẹkpa mẹn rẹ daghe ọle ghe, ọkhẹke nin mẹn guanọ otọ ebi mẹn ha taman ọne ọman-emhin nọnsẹmhẹn. Ukpẹdẹ nọn rẹkhan ọlẹn, mẹn da dọ ne ọne ọman-emhin nọnsẹmhẹn talọ, ọle da wo manman ka mẹn ehọ. Ọle da taman mẹn ghe, ebi Esali Jehova rẹọ wo ti ọle bhọ. Mẹn yi agbotu nọnsi Jehova obulu bhi ene illo nan nin ele lu rẹ ziẹn mhan udu.”

 Ijela mhan da miẹn igho rẹ lu ene illo nan? Igho nin ibhio mhan noo uwedẹ kẹkẹ nan tẹmhọnlẹn bhi donate.pr418.com re re, nin ele rẹ re iyobọ nin iwẹnna oga nan lu bhi otọ agbọn rebhe, ọle mhan rẹ lu ọle. Mhan yi bha obulu bhi ọkhọle nan rẹ zẹ emhin bhi obọ nin bha mhọnlẹn.