Ukpe-ukpe a rẹ tie ibhio mhan eso ne lu iwẹnna oga kpataki nin ele vae dọ yo Isiku ọsi Giliẹd nan do bhi Patterson, New York. a Ọne isiku nan rẹkpa ibhio mhan rẹ manman guẹ iwẹnna nin ele lu bhi agbotu nọnsi Jehova. Ọ yẹ rẹkpa ene yo rẹ sabọ ziẹn agbotu nin ele ye, bi ibhio mhan ne ribhi agbaẹbho nin ele da lu iwẹnna oga nọnsele.

 Ibhio mhan ne yo ọne isiku nan, eje kẹkẹ bhi ọne otọ agbọn nan ele na vae. Bhi ọsi ijiẹmhin, klass nọnzi 147 nan do bhi ukpe 2019, ibhio mhan ne bun sẹbhi itue 56, ele vae bhọ. Agbaẹbho kẹkẹ ne bun sẹbhi 29 ele na vae. Ibhio mhan ne ka lu iwẹnna oga kpataki khẹ, ele a tie vae bhi ọne isiku nan. Eso ga bhi Bẹtẹ, eso ọfẹotughe, eso lu iwẹnna misiọnari la iwẹnna ọkanẹfan kpataki.

 A lu emhin ne bunbun ọbhi otọ ọkuẹsẹ ọne isiku munhẹn. Bhi ọsi ijiẹmhin Ọfisi bhi Bẹtẹ Nọn Ke Okhun Nẹ Nọn Mhọn Obọ bhi Okhian Nan Yo ki guanọ arople, yẹ haosa nin ibhio mhan nan tie bhi ọne isiku. Bhi klass nọnzi 147 ọsi Giliẹd, igho nan ha nin ọdeọde rẹ yo vae, kpọnọ sẹbhi ₦425,165. Igba enẹn, ọle ibhio mhan ne na bhi Solomon Island vae nabhi arople, ele kuẹ sẹbhi Patterson. Ele ki khian uwa, ele da nabhi arople igbe ea. Eje ele na vae rẹẹ sẹbhi ikpọwala 35,400. Igho nan ki ha nin otuọnkpa-otuọnkpa bhi ẹwẹ ele da ha yi ₦909,650. Nan rẹ sabọ tee igho, Ọfisi bhi Bẹtẹ Nọn Ke Okhun Nẹ Nọn Mhọn Obọ bhi Okhian Nan Yo mhọn emhin bhi kọmputa nọn rẹkpa ele rẹ guanọ ive nọn lo nẹ sade ele ho nin ele dẹ tikẹti nin ene ibhio nan. A ha yẹ rẹ dẹ ọle fo, emhin yẹ ribhi kọmputa nọn ha rẹkpa ele rẹ ha fẹghe si ọne igho dere. Edo ribhọ nan ne nin ẹbho ne nabhi arople ẹghe-ẹghe. Ọfisi bhi Bẹtẹ Nọn Ke Okhun Nẹ Nọn Mhọn Obọ bhi Okhian Nan Yo ki noo ene edo nan re dẹ tikẹti.

 Ene bunbun bhi ibhio mhan nan tie vae bhi ọne isiku, ọkhẹke nin ele ha mhọn ebe nan rẹ nabhi agbaẹbho ọbhebhe ọkuẹsẹ ele sabọ nabhi United States. Nan rẹ sabọ lu ọnan, Ọfisi bhi Bẹtẹ Nọn Ke Okhun Nẹ Nọn Mhọn Obọ bhi Ẹmhọn Ezọ, ki rẹkpa ele rẹ sabọ ha mhọn ọne ebe nan. Igho nan rẹ lu ọne ebe nan nin otuọnkpa kpọnọ sẹbhi ₦201,705.

 Elele nela mhan miẹn bhi obọ ene ibhio mhan ne yo ọne isiku nan? Obhio mhan natiọle Hendra Gunawan, ọkpa bhi ene ewanlẹn ọle khin bhi agbotu ọkpa bhi obọ ọsi Southeast bhi otọ Asia. Ọle bi ọdọ bi amhẹn ne yo isiku ọsi Giliẹd ko ribhi agbotu ọkpa. Ọne obhio mhan da yọle: “Ekanẹfan ọsi ẹghe rebhe bha rẹ ha ribhi agbotu nọnsẹmhan, sokpan, ẹghe nin ọne okhuo bi ọdọ nan ki rẹ nabhi isiku ọsi Giliẹd vae, uwedẹ nin ele rẹ ha re oyaya lu iwẹnna itẹmhọn Osẹnobulua da rẹso ọrebhe bhi ọne agbotu rẹ sẹbhọ ghe, eso da munhẹn ha lu iwẹnna ọkanẹfan ọsi ẹghe rebhe. A ki zẹbue, obhio mhan ọkpa nin okhuo bhi ọne agbotu da yo Isiku ọsi Ene Tẹmhọn Agbejele.”

 Obhio mhan natiọle Sergio Panjaitan bi ibhio mhan eso ne yo isiku ọsi Giliẹd ko wẹnna bhi Bẹtẹ nọn ribhi obọ ọsi Southeast bhi otọ Asia. Ọle da yọle: “Ọ iyi ene ibhio mhan nan ọkpa miẹn elele bhi isiku nin ele yo; mhan yẹ wo miẹn elele bhọ. Ene ibhio mhan nan wo manman lẹn emhin, ọkpakinọn, ele bha ha re ọle hianbhegbe. Sọkpan ele da re emhin nin ele luẹ rẹ man mhan emhin. Ọnan da re izebhudu nin mhan, bhiriọ, mhan da gbo sabọ ha re izebhudu nin eria ebhebhe.”

 Be a rẹ miẹn igho rẹ do ene isiku nan yẹ? Igho nin bha rẹ re obọ kpa bhi iwẹnna itẹmhọn Osẹnobulua nan lu bhi ọne otọ agbọn nan rebhe nọn. Eso bhi ene iyobọ nan, donate.pr418.com, ọle bha noo rẹ re re. Bha obulu bhi iyobọ nin bha re re nọn rẹkpa bhi ọne isiku nin ibhio mhan bhi otọ agbọn rebhe yo.