Esalli Jehova wo mun ẹmhọn ibhio ele nin ele ko ga ọbhi ọkhọle. (1 Peter 2:17) Obhio mhan nin okhuo natiọle Tannis, nọn nyẹnlẹn bhi Kenya da yọle: “Ọ wo yẹẹ mẹn rẹ lẹn ebe sunu ji ibhio mhan nin ikpea bi ikhuo bhi otọ agbọn rebhe.” Beji ọ dia obhio mhan nin Tannis bhi egbe, iriọ ọ yẹ dia ene bunbun bhi ẹwẹ mhan bhi egbe. Be bhọ Tannis bi Esali Jehova ne bunbun nekẹle rẹ lẹn ebe sunu ji ibhio ele yẹ? Mhan mhọn eji a ne niuz ọi bhi wẹbsait nọnsẹmhan natiọle jw.org nan lu bhi 2013, enin mhan da lẹn ebe sunu ji ibhio mhan.

 Uwẹ dẹ sabọ miẹn okha ọsi ebi a rẹ ne Baibo ọsọgbọn dagbare yẹ, iwẹnna nan rẹ rẹkpa ibhio mhan nin emhin idumhunri sunu je, ebi a rẹ ha bọn uwa oga kẹkẹ yẹ, bi emhin kpataki nekẹle ne sunu ji ibhio mhan bhi ẹkẹ eji a ne niuz ọi bhi jw.org. Ẹmhọanta ene niuz rebhe khin. Ọ yẹ taman mhan ẹmhọn ibhio mhan nin ikpea bi ikhuo nan ne ọbhi ighan ranmhude urẹọbhọ nọnsele. Mhan dẹ yẹ sabọ miẹn okha ọsi ebi ibhio mhan rẹ lu iwẹnna itẹmhọn Osẹnobulua kpataki yẹ bi ebi a rẹ lu Ayere ọsi Uyumhin Nọnsi Jesu yẹ bhi eji a ne niuz ọi. Hela guaotọ ene niuz nan? Be ele rẹ lu ọle yẹ?

 Dipatmẹnt natiọle Office of Public Information (OPI), ele mhọn obọ bhi niuz nan ne ọbhi jw.org. Bẹtẹ nọn ke okhun nẹ ọsi Esali Jehova, ọle ọne dipatmẹnt nan ye. Otu ọsi Ewanlẹn Ne Sun Otu Nekẹle, ele sun ọne dipatmẹnt nan. Ibhio mhan nin ikpea bi ikhuo ne bun gbera 100, ele wẹnna bhi ọne dipatmẹnt nan. Ene bunbun bhi ẹwẹ ele nabhi uwa nọnsele deba ọne Bẹtẹ nan wẹnna. Ene gbẹn ebe, ene guaotọ ẹmhọn fẹghe, ene drọ, bi ene zedu ebe ribhi ẹwẹ ene ibhio mhan nan. Iwẹnna ọsi enekẹle hi, nin ele rẹ ha ne ene wẹnna nin gọvmẹnt, ene man emhin bhi isiku, bi ene lu niuz bhi ole zilo ẹmhọn ebe sunu. Dipatmẹnt natiọle Public Information Desks (PID) nọn gbera 80, ne ribhi Bẹtẹ bhi otọ agbọn rebhe, ele rẹkpa OPI.

 OPI bi PID, ele ko wẹnna kugbe rẹ ne niuz ọgbọn dagbare. Ele ha miẹn okha nin ele ha gbe man mhan, ele ki ka guaotọ ọne okha ghe nọnsẹn, nin ele lẹn ebi ọ rẹ gene sunu yẹ. Nin ele rẹ sabọ lu ọnan, ele ki dọ nọọn ene lẹn ẹlo ọne okha ọta, ele ki yẹ nọọn ene guẹ rẹ gbe okha ọta. Ele ha ki guaotọ ọne okha fo, ele ki gbẹn ọlẹn, tie ọle, fẹ ọle ghe nọnsẹn, yẹ ne ifoto ne tẹmhọn ọne okha ọbhọ. Ele ha ki lu enan fo, ele ki je ọle ji Otu ọsi Ewanlẹn Ne Sun Otu Nekẹle nin ele re obọ ọbhọ.

 Be ibhio mhan tale rẹji niuz ne ribhi jw.org? Cheryl nin obhio mhan nin okhuo nọn nyẹnlẹn bhi Philippines da yọle, “Emhin ọhẹnhẹn nọn wo ka yẹẹ mẹn rẹ tie ukpẹdẹ hi, niuz nọn tẹmhọn agbotu nọnsi Jehova bi ẹbho nesọle.”

 Ẹbho ne bunbun ne tie ene niuz nan wo tẹmhọn ikikẹ bhi ẹwẹ niuz ne ribhi jw.org bi ene ele miẹn bhi ije ebhebhe. Tatiana nọn nyẹnlẹn bhi Kazakhstan da yọle: “Ọ wo manman yẹẹ mẹn ghe, niuz nan miẹn bhi ẹkẹ jw.org, ene a ha sabọ gbaẹkẹ ọle nọn, uwẹ ida miẹn eku la ohoghe bhi ẹkẹ ọle.” Obhio mhan nin okhuo natiọle Alma nọn nyẹnlẹn bhi Mexico da yọle: “Niuz nan miẹn bhi jw.org ko ọria udu re. Sokpan, ene a miẹn bhi ije nekẹle gbe ọria ahu.”

 Ene niuz nan iwo gheghe yi ene a ha sabọ gbaẹkẹ ọle ọkpa, ele yẹ ziẹn mhan urẹọbhọ. Bernard nọn nyẹnlẹn bhi Kenya da yọle: “Ene niuz nan miẹn bhi jw.org rẹkpa mẹn ghe ibhio mhan nin ikpea bi ikhuo ne ribhi otọ agbọn rebhe bii azagba-uwa nọnsẹmhẹn, bhi eji ọ hi ki rẹ ha khin nin ele yẹ. Mẹn wo sabọ sounun elin nọnsele bi idia nin ele ye man Jehova bhi erọnmhọn.” Obhio mhan nin okhuo natiọle Bybron nọn yẹ nyẹnlẹn bhi Kenya da yọle: “Ọ ki wo ha re egbe bọbọ mẹn sade mẹn tie okha nọn tẹmhọn ebi a rẹ re Baibo ọsọgbọn dagbare yẹ bhi urolo ọbhebhe! Ene okha nan rẹman mẹn ghe, Jehova ilu eku.”

 Niuz ne tẹmhọn ebi a rẹ kpokpo ibhio mhan yẹ, yẹ wo re izebhudu nin mẹn. Obhio mhan nin Jackline nọn nyẹnlẹn bhi Kenya da yọle, “Ọ ziẹn mẹn urẹọbhọ rẹ ria ẹmhọn ebi ene ibhio mhan nan rẹ sabọ re izebhudu man yẹ. Mẹn ha tie okha nọnsele, mẹn ki manman gbẹlokotọ bhi ebe rẹkpa ele rẹ sabọ ziẹngbe. Mẹn sẹ wo daghe ebi erọnmhọn nan nan, Baibo nan tie, bi illo nan so rẹ rẹkpa ele yẹ. Arẹmiẹn ẹbho eso ghe ene emhin nan bii ikuẹkuẹ emhin, ele deba ebe rẹkpa ele rẹ sabọ ha mhọn izebhudu.”

 Niuz ne tẹmhọn emhin idumhunri ne sunu ji ibhio mhan wo manman ti obhio mhan nin okhuo bhọ natiọle Beatriz nọn nyẹnlẹn bhi Costa Rica. Ọle da yọle: “Niuz nan miẹn bhi jw.org wo rẹkpa mhan rẹ daghe ebi agbotu nọnsẹmhan rẹ wo re ẹjẹje, uwedẹ nọn gbale, bi oyẹẹ rẹ re urẹkpa nin ibhio mhan nin emhin idumhunri sunu je. Ọnan wo ziẹn urẹọbhọ nin mẹn mhọn ghe, agbotu nọnsi Jehova khọnan.”

 Ọ wo manman ti mhan bhọ rẹ sabọ ha re ẹjẹje miẹn niuz ne tẹmhọn ebe sunu ji ibhio mhan bhi otọ agbọn rebhe! Sade ọ iyi igho nin bha re re nọn, a irẹ ha sabọ miẹn ene niuz nan. Donate.pr418.com, ọle ene bunbun bhi ẹwẹ bha rẹ re ene igho nan re. Mhan yi bha obulu bhi ọne ọkhọle nan rẹ zẹ emhin bhi obọ nin bha mhọnlẹn.