Ẹlẹnan nian, Esali Jehova ki wo miẹn ebe bi vidio danlodi bhi itanẹti gbera ọnikhẹ. Ọkpakinọn, bhi eje bunbun bhi ọne agbọn nan, ibhio mhan isabọ noo itanẹti ranmhude ele imhọn igho. Eso yẹ nyẹnlẹn bhi eje a ida manman miẹn nẹtwọki, la eji nẹtwọki bha da ziẹn. Sẹyẹ eso nyẹnlẹn bhi eji nẹtwọki iye hiehie.

 Ọrẹyiriọ, ibhio mhan ne bunbun sẹyẹ wo sabọ ha danlodi ebe nesẹmhan arẹmiẹn ele imhon nẹtwọki. Be ọnan rẹ sabọ ha sunu yẹ?

 Obhi ẹkpẹti ọkpa ribhọ natiọle JW Box, nan ne ji agbotu ne ribhi eji nẹtwọki imanman ye. Emhin ribhọ nin agbotu dẹ re fi ọbhi ẹkẹ ọle, nọn rẹkpa ẹbho rẹ sabọ tuje itanẹti a bhi foni nọnsele, la kọmputa. Ibhio mhan ne mhọn obọ bhi Kọmputa bhi Bẹtẹ da mhanmhan emhin ọbhọ, ele da yẹ ne ebe bi vidio nesẹmhan ne ribhi jw.org ọbhi ẹkẹ ọle. Nan rẹ lu JW Box ọkpa, ọ dẹ re ebe sẹbhi ₦29,750.

 Bhi Kindọn Họọ, ibhio mhan ki sabọ re ifoni nesele rẹ danlodi ebe bi vidio nesẹmhan ne ribhi ọne JW Box. Ibhio mhan ne mhọn ifoni nọn sabọ nabhi itanẹti, dẹ sabọ re ọle danlodi emhin, aharẹmiẹn otọ ki re ọne ifoni la ọne ifoni bha ghan. Ahakimiẹn itanẹti iribhi eji ọne Kindọn Họọ ye, be a ha rẹ sabọ ne emhin ọgbọn nan zẹ ọle egbe dagbare ọbhi ọne JW Box yẹ? Ẹghe-ẹghe, Bẹtẹ ki danlodi emhin ọgbọn ne la dagbare bhi wẹbsaiti nọnsẹmhan ọbhi USB, a ki ne ene USB nan diọbhi ene Agbotu. A ki na bhi ọne USB ne ene emhin ọgbọn ọbhi ọne JW Box. Ọkpa bhi ene USB nan ghan sẹbhi ₦1,586.

 Be ọne JW Box nan sẹ rẹ rẹkpa ibhio mhan yẹ? Aba ọkpa natiọle Nathan Adruandra, nọn nyẹnlẹn bhi Democratic Republic of Congo da yọle: “Mẹn rẹ wo dọnmhegbe ẹghe ne bunbun nin mẹn rẹ danlodi ene arẹman nesẹmhan natiọle ‘Eo IJehova, . . . Uwẹ Imhẹn Rudu Tẹ’ bi Ye Amhẹn ILot Re, sokpan ọ bha fo mẹn. Ọnan da wo re egbe lọ mẹn. Ejayenan nian, mẹn sabọ danlodi ene vidio nan ọbhi foni nọnsẹmhẹn. Ene ividio nan wo rẹkpa mhan rẹ sabọ ha man imọn nesẹmhan emhin nọnsẹn.”

 Bhi Nigeria, obhio mhan nin okpea nọn rẹkpa agbotu eso lu ilọnmhọn JW Box da yọle: “Ibhio mhan rẹọbhọ ghe, ọne JW Box nan, ẹsele kpataki nọn na obọ iJehova vae nọn. Ele wo ghọnghọn ranmhude ọ ki lẹkhẹ nin ele rẹ sabọ danlodi ebe bi vidio nesẹmhan ne ribhi Emhin Kpataki Nin Mhan Rẹ Man Ẹbho IBaibo.

 Agbotu sẹ wo ne JW Box ne bun gbera 1,700 ji ibhio mhan bhi otọ Africa, Oceania, bi South America. Emhanmhan yẹ wo ribhi otọ nan rẹ ne ele ji agbotu ne bunbun ebhebhe. Ọkpakinọn, ejela agbotu da miẹn igho rẹ ha lu ene emhin nan? Igho nin bha rẹ re, nin bha rẹ rẹkpa bhi iwẹnna itẹmhọn Osẹnobulua nan lu bhi otọ agbọn nan rebhe, ọle a rẹ ha miẹn ene ẹsọn nan. Eso bhi ẹwẹ mhan, donate.pr418.com ele noo rẹ re ọne iyobọ nan re. Bha obulu bhi iyobọ nin bha rẹ re.