Bhi ukpe 2020, emhin idunmhuri ne bunbun da sunu. Sẹyẹ, ọne ukpe nin emianmhẹn icorona virus rẹ munhẹn bhi otọ agbọn rebhe. Be Esali Jehova ki rẹ rẹkpa ẹbho nin ene emhin nan sunu je yẹ?

 Bhi ẹkẹ ukpe iwẹnna oga ọsi 2020, a Otu Nọn Sun Oga da re obọ bhọ nan rẹ noo $28,000,000 b rẹ rẹkpa ene emhin idunmhuri sunu je. Ọne igho nan a rẹ rẹkpa ẹbho ne emhin idunmhuri ne gbera 200 sunu je bọsi, corona virus, efi bi okpamẹn, ologho ne muno uwa bhi Africa, ukhunmhun nọn sunu bhi Venezuela, bi okale nọn sunu bhi Zimbabwe. Ọne igho nan nin ibhio mhan re re, a da re ọle dẹ ebale, amẹn, ikpọn, ikhunmhun, yẹ re ọle haosa uwa nin ibhio mhan. A da yẹ noo ọle rẹ hẹnhẹn uwa, dẹ ebakhọ bi emhin ne dia iriọ. Bha ji mhan fẹ ijiẹmhin eso ghe.

 Corona virus. Ọne emianmhẹn nan wo re obọ mun ibhio mhan bhi otọ agbọn rebhe bhi uwedẹ kẹkẹ. Ranmhude ọnan, a da mhanmhan ibhio mhan eso ọbhi usun ne gbera 800 bhi otọ agbọn rebhe. Ọne usun nan hi Usun Ne Mhanmhan Urẹkpa Nan Re Ji Ene Emhin Idunmhuri Sunu Je. Ene usun ibhio mhan nan da ha guanọ otọ ebi ibhio mhan kẹkẹ guanọ, yẹ taman Otu Nọn Sun Oga. Bhiriọ, Otu Nọn Sun Oga ki lẹn urẹkpa nin ele ha re nin ene ibhio mhan.

 Bhi ẹkẹ ọne ukpe nin rebhe, ene usun ibhio mhan nan da ha rẹkpa ibhio mhan ne bunbun rẹ miẹn ebale, amẹn, ebi a rẹ kpe egbe a, bi ikhunmhun. Ene usun ibhio mhan nan bi ene ewanlẹn bhi agbotu da ko wẹnna kugbe rẹ rẹkpa ibhio mhan, nin ele da sabọ miẹn urẹkpa bhi obọ igọvamẹnt.

 Eria ne iyi Esali Jehova wo daghe ebi a rẹ ha rẹkpa ene ibhio mhan nan yẹ. Bhi ọsi ijiẹmhin, okpea ọkpa natiọle Field Simwinga, nọn yi ọdiọn icommissioner ọsi Nakonde bhi Zambia da taman ibhio mhan yọle: “Uwedẹ nin bha rẹ ha re ẹjẹje re urẹkpa nin azagba-uwa kẹkẹ nin emhin idunmhuri sunu je wo manman ti mhan bhọ.”

 Ukhunmhun Nọn Sunu bhi Angola. Ranmhude emianmhẹn icorona virus, ebale bha yẹ manman ha ribhi Angola, bhiriọ, ebale da manman ha ghan. Ọ da wo ha nọghọ ibhio mhan ne bunbun bhi enin rẹ ha dẹ ebale.

 Agbotu da taman iBẹtẹ nọn ribhi Brazil nin ele ne ẹkpa-ebale ji ibhio mhan ne ribhi Angola. Nin ele da sabọ noo igho nọnsẹn, ele da guanọ otọ uwedẹ nọn mhẹn nẹ nin ele ha rẹ dẹ ene ebale yẹ je ọle ji ene ibhio mhan. Bhiriọ, ele da sabọ dẹ ebale ne bunbun. Igho nan rẹ dẹ ebale ne ribhi ẹkpa-ebale ọkpa yẹ je ọle ji ibhio mhan da ha yi $22. Ebale ne ribhi ẹkẹ ọne ẹkpa hi izẹ, ihiẹnlẹn, bi abhii nan rẹ nyẹn ebale. Khere kẹre nin ọne ẹkpa-ebale rẹ khua sẹbhi 20 kg. Rẹ sẹ ẹlẹnan nian, ọ sẹ ẹkpa-ebale 33,544 nan sẹ ne ji ibhio mhan kẹkẹ. A ha ku ene ẹkpa-ebale nan rebhe kugbe, ọ dẹ khua gbera ihẹ nin itrailer 21 bi ukhiọnmhẹn ha sabọ mun. Ẹbho ne bun gbera 50,000, ele a re ene ebale nan ne re bhi Brazil bi ebale nin ibhio mhan bhi ọne agbaẹbho ne re rẹ rẹkpa!

 Be ọne urẹkpa nan dia ibhio mhan yẹ bhi egbe? Alexandre nọn nyẹnlẹn bhi eje reele bhi Angola da yọle: “Ọne urẹkpa nan ji mẹn lẹn ghe Jehova hoẹmhọn mẹn, ọle bha fi mẹn ehọ a. Ẹlo nọn ghanlẹn agbotu nọnsi Jehova rẹ ghe mẹn!” Mariza, nan miẹn ghe ọle ọkpa hi ọnọn gbẹloghe ọmọn nọnsọle da yọle: “Jehova da wo họn eviẹ nọnsẹmhẹn. Mẹn khuẹnmhẹn iJehova bi agbotu nọnsọle!”

 Urẹkpa Nan Re Nin Ibhio Mhan bhi Zimbabwe bhi Ẹghe Okale. Bhi ukpe iwẹnna oga 2020, amẹn bha rọ bhi Zimbabwe. Bhiriọ, ukhunmhun da ha wo ha ribhi Zimbabwe. Ẹbho ne bunbun bha miẹn ebale le rẹ sẹbhi Esali Jehova.

 A da mhanmhan usun ibhio mhan isẹn nin ele dọ ne ebale nin ene ibhio mhan nan. Ibhio mhan ne bunbun da rẹkpa ha khuan ene ebale ọbhi ẹkpa, ne ele ọbhi ẹkẹ imoto, yẹ re otọ nin ene ibhio mhan da noo imoto nọnsele rẹ gha ene ebale nẹga. c Bhi ukpe iwẹnna oga 2020, agbotu da noo $691,561 rẹ rẹkpa ẹbho ne bun gbera 22,700!

 Bhi ijeso, ẹghe nin ebale nọnsi ibhio mhan eso rẹ fo, ọle ọne ebale nan rẹ wo sẹ ele obọ. Bhi ọne ẹghe nan, ele da wo manman khuẹnmhẹn iJehova. Eso bhi ẹwẹ ele da wo ha so illo oga.

 Bhi idunmhun ọkpa, otu ọkpa nọn iyi govamẹnt da yọle ghe, ele dẹ ne ebale nin ẹbho. Bhiriọ, ọne idunmhun da tie ikolo nin ele rẹ zilo nyan ebi ele ha rẹ gha ọne ebale yẹ. Esali Jehova eva ne iyẹ mhọn ọdọ da yo ọne ikolo. Ọkpakinọn ele ki ha zilo ebi ele ha rẹ gha ọne ebale yẹ bhi ọne ikolo, ọ da diabe ẹmhọn efinẹfi ele ki lu. Bhiriọ, ene ibhio mhan da yọle ghe ele ida re obọ ọbhi uwedẹ nin ele yọle ghe a ha rẹ gha ọne ebale. Ele ki sibhi ọne ikolo re, ẹbho nekẹle da ha zuọzuọ ele yẹ taman ele yọle: “Bha hẹi vae dọ ha bhii ebale bhi obọ mhan!” Sokpan, uzana eva ki gbera, usun ibhio mhan ne rẹkpa da ne ebale ji ene ibhio mhan eva nan, ọkuẹsẹ ọne ebale vae nọn rẹ zẹ nin ele da yo ọne ikolo!

 Urẹkpa nan re nin ibhio mhan bhi Zimbabwe da wo ha yi ọsali rẹji ẹbho. Bhi ọsi ijiẹmhin, bha ji mhan zilo nyan okha ọsi obhio mhan nin Prisca nọn nyẹnlẹn bhi agbaẹbho ọkpa nọn dia khere. Arẹmiẹn amẹn nọn bha rọ si ọkakale kẹkẹ re, Prisca da sẹyẹ ha noo ẹdẹ iWednesday bi Friday, rẹ sẹbhi ẹghe nan rẹ mun ugbo, rẹ tẹmhọn Osẹnobulua. Ẹbho bhi agbaẹbho nọnsọle da ha zuọzuọ ọle yẹ taman ọlẹn yọle: “Uwẹ dẹ re ohanmhẹn gbe azagba-uwa nọnsẹ a ranmhude ọne iwẹnna itẹmhọn Osẹnobulua nin uwẹ lu nan.” Prisca da ha taman ele yọle: “Jehova bha sẹ fi ikeke gbe eguọmhandia nesọle ghẹdẹ.” Ọ bha sẹ bue gbe, agbotu da ne ebale ji ọle. Ọnan da wo ti ediake nesọle bhọ rẹ sẹbhọ ghe, ele da taman ọlẹn yọle: “Ranmhude Osẹnobulua bha sẹ fi ikeke gbe uwẹ ghẹdẹ, mhan guanọ nin mhan lẹn ọlẹn.” Ejayenan nian, itue ihinlọn bhi ẹwẹ ediake nesọle ki kaehọ ikolo nesẹmhan nan lu bhi redio.

 Mhan dẹ wo ha kuẹlo da emhin idunmhuri kẹkẹ beji mhan rẹ sikẹ ọkpẹnlẹn ọsi ọne agbọn nan. (Matthew 24:​3, 7) Ene igho nin bha noo uwedẹ kẹkẹ nan tẹmhọnlẹn bhi donate.pr418.com re re wo manman ti mhan bhọ. Mhan wo noo ele rẹ re urẹkpa ne khẹke nin ibhio mhan ne guanọ urẹkpa bhi ẹghe nọn khẹke.