Emianmhẹn corona virus sẹyẹ wo ha ribhi otọ agbọn rebhe bhi ẹkẹ ukpe iwẹnna oga ọsi 2021 a. Beji mhan tale bhi uhọnmhọn-ọta nọn yọle “Urẹkpa Nan Re Nin Ibhio Mhan bhi Otọ Agbọn Rebhe bhi Ẹghe Corona Virus,” udede igho mhan sẹ wo noo rẹ rẹkpa ibhio mhan bhi ọne ẹghe corona virus nan, sẹyẹ Usun Ne Mhanmhan Urẹkpa Nan Re Ji Ene Emhin Idumhunri b Sunu Je, ne gbera 950, ele a mhanmhanlẹn ne ha re urẹkpa nin ibhio mhan.

 Arẹmiẹn corona virus wo ha zẹ ẹbibi, emhin idumhunri nekẹle da wo ha sunu ji ibhio mhan bhi otọ agbọn rebhe. Ẹghe nin emhin idumhunri ne sẹriọ ne gbera 200 rẹ sunu ji ibhio mhan, Otu ọsi Ewanlẹn Ne Sun Otu Nekẹle da re obọ ọbhọ nan rẹ noo ebe sẹbhi $8 million nin ene ibhio mhan nan, rẹ deba urẹkpa nekẹle nan sẹ re nin ibhio mhan bhi ẹghe corona virus. Fẹ ebi igho nin uwẹ re re sẹ rẹ rẹkpa ibhio mhan yẹ nin emhin idumhunri eva sunu je bhi ẹghe nọn bha ree gbe nian.

 Bhi Mee 22, 2021 Oke ọsi Nyiragongo da kpa eranlẹn kua bhi Democratic Republic of the Congo. Ọne eranlẹn nọn kpa kua da tuẹ uwa, isiku, bi rezavua a. Ọ iyi ọne eranlẹn nọn kpa kua ọkpa riia emhin a. Ikpẹdẹ eso ki gbera, ahoho da fi ẹbubu nọn imhẹn nọn sibhi ọne oke re diọbhi agbaẹbho natiọle Goma, sẹyẹ, otọ da wo ha munvẹ a bhi ije kẹkẹ bhi ọne agbaẹbho. A ha wa ọne agbaẹbho yi eva, ọ gbera obọ ọkpa bhọ nan yọle nin ele sibhi ọne agbaẹbho re. Ẹbho ne bunbun da nẹ sibhi ọne agbaẹbho re ha khian Rwanda.

 Esali Jehova ne bun sẹbhi 5,000 deba ene nẹ sibhi uwa re. Ọne eranlẹn nọn kpa kua da dunmhun uwa ọsi ibhio mhan eso a; sẹyẹ, ẹbho da dọ do emhin ne bhi uwa ọsi ibhio mhan eso ne nẹ sibhi uwa re. Usun Ne Mhanmhan Urẹkpa Nan Re Ji Ene Emhin Idumhunri Sunu Je ne ribhi Rwanda bi Democratic Republic of the Congo da ko mhanmhan urẹkpa nan ha ne nin ene ibhio mhan nan. Bẹtẹ nọn ribhi Congo (Kinshasa) ki ha tẹmhọn ọkpa bhi ene usun nan, ele da yọle: “Arẹmiẹn ije rebhe wo zughu a bhi ọne agbaẹbho, sẹyẹ, ọkuẹsẹ agbotu yọle nin ele re urẹkpa nin ibhio mhan, ọne usun nan da munhẹn ha ne ebale, amẹn, emhin nan rẹ nowẹ, bi ikpọn ji ibhio mhan.” Bhi agbaẹbho ọkpa, ibhio mhan ne gbera 2,000 da sikoko bhi ijan ọkpa, bhiriọ, usun ọkpa nọn mhanmhan urẹkpa nan re ji ene emhin idumhunri sunu je da ne ibọkpọ ji ene ibhio mhan nan, yẹ ne ebi a rẹ gue unun bi ihue nin ele. Ele da yẹ taman ele ebi ele ha lu yẹ nin ele hẹi mun corona virus bi ọne emianmhẹn nan rẹ kpa yẹ nẹ.

 Bhi ẹkẹ uki ea nin ọne emhin nan rẹ sunu, ibhio mhan da ne ebe gbera ẹkpa-izẹ 120, ọka nan nọ sun nọn ha vuọn ẹkpa-izẹ 120, abhii nan rẹ nyẹn ebale nọn ha vuọn jẹrikan 150, bi amẹn nọn ha vuọn jẹrikan 150 ji ibhio mhan. Nin agbotu da sabọ te igho, ele da mhanmhanlẹn nan ha dẹ ebale nan miẹn bhi ọne agbaẹbho nin, ele bha ha dẹ ebale ne manman ghan nan miẹn bhi agbaẹbho ebhebhe.

 Obhio mhan nin okhuo ọkpa ribhọ nin ọne eranlẹn nọn kpa kua tuẹ ọle uwa a. Sokpan, agbotu da re ikoudure nanlẹn bi azagba-uwa nọnsọle yẹ ne emhin eso nin ele rẹ gbẹloghe egbe. Ọle da yọle: “Ahu da wo fo mhan bhọ, sẹyẹ, egbe da wo lọ mhan. Sokpan ranmhude urẹkpa nọnsi Jehova, mhan da wo miẹn ebi mhan guanọ. Mhan wo daghe ọle ghe, Jehova rẹkpa mhan mun ihẹ nọnsẹmhan beji a ha da miẹn ghe, ọ ki lẹkhẹ nin mhan rẹ mun.”

 Bhi ẹkẹ ikpe ne bunbun nian, iẹnlẹn wo ha nyọn mun ẹbho bhi Venezuela. Emhin bha lẹkhẹ nin ibhio mhan bhi enin. Ele bha ha miẹn ebale, sẹyẹ, okhọnlẹn bi ugbele wo kie khọ ọbhọ. Ọrẹyiriọ, agbotu nọnsi Jehova bha fi ele ehọ a. 

 Bhi ẹkẹ ukpe iwẹnna oga nọn gbera, ọ gbera $1.5 million nin agbotu noolo rẹ dẹ ebale bi ebakhọ ji azagba-uwa kẹkẹ ne guanọ urẹkpa. Bẹtẹ nọn ribhi Venezuela da gbẹn yọle: “Ọ bha zẹwẹ lẹkhẹ nan rẹ ne ebale ne vuọn trela enẹn kẹre ji ibhio mhan kẹkẹ ne guanọ urẹkpa bhi ọne agbaẹbho rebhe uki-uki.” Beji a ha da miẹn ghe ene ebale bha riia, ene ibhio mhan da ha je ebale ne ikẹ riia ji ene ibhio mhan. Ọne Bẹtẹ da yẹ gbẹn yọle: “Ebale ne bunbun mhan wo re osukpa dẹ, sẹyẹ, ẹghe nan rẹ ne emhin sibhi ugbo re, nọn rẹ manman no, ọle mhan rẹ dẹ ene ebale nan. Sẹyẹ, uwedẹ nọn no nẹ mhan rẹ je ene ebale ji ene ibhio mhan.”

 Leonel nin ọkpa bhi Usun Ne Mhanmhan Urẹkpa Nan Re Ji Ene Emhin Idumhunri Sunu Je bhi Venezuela yọle ghe ọne iwẹnna wo yẹẹ ọle. Ọle da yọle: “Iwẹnna kpataki, ọle iwẹnna nan rẹ rẹkpa ene ibhio mhan nan khin. Ọne iwẹnna wo rẹkpa mẹn rẹ miẹn ikoudure, nin okhuo mẹn rẹ yu bhi emianmhẹn corona virus. Mẹn da wo manman ha miẹnsọn yẹ rẹkpa ibhio mhan ne ribhi ọnọghọ. Mẹn sẹ wo re ẹlo nọnsẹmhẹn daghe ebi Jehova rẹ mun ive nesọle sẹ yẹ nọn yọle ghe, ọle ida fikeke gbe ẹbho nesọle.”

 Obhio mhan ọkpa ribhọ nọn rẹ ka deba usun ne mhanmhan urẹkpa nan re ji ene emhin idumhunri sunu je, ejayenan nian, ọle ki deba ẹbho nin ọne usun nan ki rẹkpa. Ọle da yọle: “Imẹn ọ ki sẹ ọle bhi egbe nan ha re urẹkpa nan nian. Ọ iyi ebi mhan ha rẹ gbẹloghe egbe ọkpa mhan miẹn bhi obọ ene ibhio mhan, ele da yẹ rẹkpa mẹn bi okhuo mẹn rẹ sabọ de ọkhọle re. Ele da wo gbẹloghe mhan yẹ re ikoudure nin mhan.”

 Ẹgheso, a ilẹn ẹghe nin emhin idumhunri eso ha rẹ sunu. Ọrẹyiriọ, emhin idumhunri ha sunu, agbotu nọnsi Jehova ki wo re ẹjẹje guanọ emhin kẹkẹ nan rẹ gbẹloghe egbe ji ibhio mhan. Igho nin bha re re nan rẹ robọkpa bhi iwẹnna oga nan lu bhi otọ agbọn rebhe zẹle nin mhan da sabọ lu ọnan. A tẹmhọn uwedẹ nan rẹ sabọ re ene igho nan re bhi donate.pr418.com. Bha obulu bhi ọkhọle nan rẹ zẹ emhin re nin bha mhọnlẹn.