Mhan rebhe mun ọkhọle ọbhọ ghe, beji ukpe 2023 rẹ munhẹn, emhin dẹ ha mhẹn ọbhọ nin mhan bi azagba-uwa nọnsẹmhan. Bezẹle nin mhan ha da ha mhọn ikhuaẹloghe nọn sẹnian?

 Baibo ji mhan lẹn ghe, ọkakale nin mhan kuẹlo da nian dẹ kẹ fo. Bhi ọsi ẹmhọanta, emhin rebhe nan gbẹn ọbhi Baibo, “a gbẹn ele nin ele ha dia mhan, beji a da miẹn ghe. . . [ranmhude] ikoudure nin mhan ha miẹn bhi Ebenọnkhiale, mhan ki ha mhọn ikhuaẹloghe.”—Romans 15:4.

•   Nin uwẹ rẹ luẹ ba ive ne ribhi Baibo, tie ọne uhọnmhọn-ọta nọn yọle, “A Real Hope for a Better Tomorrow.” (Ikhuaẹloghe Ọsaje Nin Mhan Mhọnlẹn Rẹji Ẹghe Odalo Nọn Mhẹn)

 Ikhuaẹloghe nin Baibo re nin mhan “hi emhin nọn mun iẹnlẹn nọnsẹmhan mhọn.” (Hebrews 6:19) Ọne ikhuaẹloghe nin re ahu nin mhan rẹ ha ziẹngbe ọkakale nin mhan kuẹlo da nian, yẹ ha miẹn eghọnghọn bhi iẹnlẹn nian bi bhi ẹghe odalo. Bhi ọsi ijiẹmhin:

•   Fẹ ebi Baibo rẹ rẹkpa okpea ọkpa yẹ rẹ sabọ khọn emhin nọn imhẹn nin ọle guẹle miotọ. Ghe ọne ividio nọn natiọle Uwedẹ Iẹnlẹn Mhẹn Da Khan Mhẹn.

•   Fẹ ebi ikhuaẹloghe nọn ribhi Baibo ha rẹ sabọ rẹkpa mhan yẹ sade ọria nin mhan hoẹmhọnlẹn yu. Ghe ọne ividio nọn yọle, Ebe Ha Sabọ Ko Eria Ne Lu Akhiẹ Udu Re.

 Ẹbho ne bunbun rẹ ha mun ọkhọle ọbhi emhin esili, sokpan ele bha lẹn si ọ dẹ sabọ sunu ji ele. Ọkpakinọn, emhin nin Baibo vele bha dia iriọ. Bezẹle? Ranmhude Osẹnobulua nin Jehova a tobọle, “nọn ibha ohoghe,” ọle hi ọnọn ve ive ne ribhi Baibo. (Titus 1:2) Jehova ọkpa ha sabọ mun ive nesọle sẹ; ọle dẹ sabọ lu emhin nọn hi ki rẹ khin nin ọle guanọ.—Psalm 135:5, 6.

 Mhan guanọ nin uwẹ miẹn elele bhi ikhuaẹloghe ọsaje nin Baibo re nin mhan. Uwẹ dẹ sabọ ziẹn iruduba nin uwẹ mhọnlẹn rẹji ọne ikhuaẹloghe nin sade uwẹ “gbẹlokotọ nọnsẹn ha fẹ Ebenọnkhiale ghe.” (Acts 17:11) Uwẹ dẹ sabọ ha lu iriọ sade uwẹ deba mhan ha luẹ Baibo nin mhan man ẹbho le ọsọhẹ. Ha mun ọkhọle ọbhi emhin nọn mhẹn beji mhan rẹ mun ukpe 2023 hẹn!