Bhi February 24, 2022, Russia da mun okhọn bu Ukraine. Ranmhude ọnan, iẹnlẹn ọsi ẹbho ne bunbun da ha ribhi okhẹnan. Bhiriọ, ele da ha nẹ sibhi ọne agbaẹbho re. a

 “Bọmb da wo ha de bhi ije rebhe. Ọ da wo re ofẹn ha mun mhan. Mhan bha miẹn ọta nin mhan ha rẹ khọkhọ ofẹn nọn ha mun mhan. Mhan ki họn ghe, treni ribhọ non mun ẹbho sibhi ọne agbaẹbho re, mhan da jẹjẹ nabhọ yẹ nẹ sibhọre. Mhan da wo zẹ emhin nesẹmhan rebhe obọ, ranmhude obhi ẹkpa ọdeọde bhi ẹwẹ sabọ mun rẹkhan egbe. Ebe eso, ikhunmhun, amẹn, bi ikuẹkuẹ ebale, ọle ọkpa mhan sabọ mun rẹkhan egbe. Mhan da wo zẹ emhin nekẹle rebhe obọ yẹ nẹgbe ha khian eji a da nabhi treni ranmhude bọmb nọn ha de bhi ije rebhe.”​—Nataliia, bhi Kharkiv, Ukraine.

 “Mhan bha rẹ riale ghe ọne okhọn nan dẹ de. Mẹn da wo họn bọmb nọn ha de bhi ije eso bhi isẹmhan. Sẹyẹ, windo da wo ha mun lueghe, bhiriọ mhan da kpanọ. Emhin eso ọkpa mhan sabọ ne rẹkhan egbe. Agogo elẹnlẹn (8:00) bhi ọsi ewewiẹ, ọle mẹn rẹ sibhi uwa re, nabhi treni ha khian Lviv. Bhi enin mẹn da nabhi moto ha khian Poland.”​—Nadija, bhi Kharkiv, Ukraine.

Bhi ọne uhọnmhọn-ọta nan

•  Be bhọ zẹle nin ene ẹbho nan da nẹ sibhi agbaẹbho nọnsele re?

•  Ijela ẹbho ne nẹ sibhi agbaẹbho nọnsele re ha da miẹn ikoudure?

•  Baibo dẹ be sabọ rẹkpa ẹbho ne nẹ sibhi agbaẹbho nọnsele re ẹlẹnan?

 Be bhọ zẹle nin ene ẹbho nan da nẹ sibhi agbaẹbho nọnsele re?

 Ranmhude okhọn nin Russia mun bu Ukraine, ọle zẹle nin ene ẹbho nan da ha nẹ sibhi agbaẹbho nọnsele re. Sokpan, Baibo wo gbotọle fanọn an man mhan emhin ne manman zẹ nin emhin ne dia iriọ da re iriọ sunu:

•   Ugbẹloghe ọsi eria bhi otọ agbọn rebhe bha sabọ re ebi ẹbho guanọ nin ele. Ene ribhi ugbẹloghe wo noo ahu nọnsele rẹ denyẹnyẹn ẹbho.​—Ecclesiastes 4:1; 8:9.

•   Esu nọn “gbẹloghe ọne agbọn nan” wo noo ahu ebe nọnsọle bhi egbe eria. Ọnin zẹle nin Baibo da yọle; “Ọria ọbe re ọne agbọn nan khian.”​—John 14:30; 1 John 5:19.

•   Rẹ deba ọkakale kẹkẹ nin eria sẹ miẹn bhi egbe bhi ikpe ne bunbun nian, Baibo wo ka tale ọbhi otọ khẹ ghe, bhi “ẹghe ọkike, ọkakale nọn bha lẹkhẹ nan rẹ khọn, dẹ ha ribhọ.” (2 Timothy 3:1) Ọne ẹghe nin mhan ki ye nian. Rẹ deba ọnin, bhi ẹghe ọkike, okhọnlẹn, emhin udumhunri kẹkẹ, ukhunmhun bi emianmhẹn kẹkẹ dẹ ha re ẹbho nẹ sibhi agbaẹbho nọnsele re.​—Luke 21:​10, 11.

 Ijela ẹbho ne nẹ sibhi agbaẹbho nọnsele re ha da miẹn ikoudure?

 Baibo ji mhan lẹn ghe, Osẹnobulua nin Jehova b nọn man mhan mhọn oyẹẹ. Sẹyẹ, ọle mhọn itohan da ẹbho ne nẹ sibhi agbaẹbho nọnsele re, bi ẹbho ne iyẹ mhọn uwa nin ele dia. (Deuteronomy 10:18) Ọle vele ghe, Ọle dẹ re ugbẹloghe nọnsọle nọn ribhi okhun rẹ re ọkpẹnlẹn ọbhi ọnọghọ rebhe ọsi ẹbho ne nẹ sibhi agbaẹbho nọnsele re. Ọne ugbẹloghe nin, ọle a tiọle Agbejele nọnsi Osẹnobulua, nọn ha re ọkpẹnlẹn ọbhi ugbẹloghe ọsi eria. (Daniel 2:44; Matthew 6:10) Jehova dẹ noo Agbejele nọnsọle rẹ gbe Esu khuelo. (Romans 16:20) Ọne Agbejele dẹ ghẹloghe otọ agbọn rebhe. A ida yẹ ha miẹn iwaegbe a. Ọrebhe ne ribhi ọne otọ nan ẹghenin ki ha yi azagba-uwa ọkpa. Ọria soso iyẹ da ha nẹ sibhi uwa nonsọle re, ranmhude Baibo yọle: “Ọdeọde bhi ẹwẹ ele ki dotua bhi otọ oran ivain bi oran ifig nọnsọle, ọria soso ida ha re ofẹn mun ele, ranmhude unun nọnsi Jehova nọn nyan ene eyokulo ta ọle.”​—Micah 4:4.

 Agbejele nọnsi Osẹnobulua ha vae, ọria soso ida yẹ nẹ sibhi agbaẹbho nọnsọle re beji mhan rẹ miẹn ọlen ẹlẹnan. Jehova dẹ noo Agbejele nọnsọle rẹ re ọkpẹnlẹn ọbhi ọkakale nọn re ẹbho nẹ sibhi agbaẹbho nọnsele re. Bha ji mhan zilo nyan eso bhi ene ọkakale nan:

•   Okhọnlẹn. “[Jehova] dẹ re ọkpẹnlẹn ọbhi okhọnlẹn.” (Psalm 46:9) Nin uwẹ rẹ lẹn ebi Osẹnobulua ha rẹ lu ọle yẹ, tie ọne uhọnmhọn-ọta nan nọn yọle, “Peace on Earth​—How Will It Come?” (Be Ọfure Ha Rẹ Vae Bhi Ọne Otọ Nan Yẹ?)

•   Okhọnlẹn bi nan rẹ ha denyẹnyẹn ẹbho. “[Jehova] dẹ miẹn ele fan bhi obọ ene denyẹnyẹn ele bi ene ne ele khọnlẹn.” (Psalm 72:14) Nin uwẹ rẹ lẹn otọ ebi ẹbho rẹ sabọ fidenọ yẹ bhi emhin ebe nọn guẹ ele bhi egbe, tie ọne uhọnmhọn-ọta nan nọn yọle,“Breaking the Cycle of Hatred.” (Ebe Ha Rẹkpa Uwẹ Rẹ Sabọ Khọn Ihegbe Miotọ)

•   A bha miẹn rẹ lu. “[Jehova] dẹ hinmhin ene bha miẹn rẹ lu ne viẹ bu ọle re.” (Psalm 72:12) Nin uwẹ rẹ lẹn ebi Osẹnobulua ha rẹ re ọkpẹnlẹn ọbhi ebe si ọle nọn zẹle nin ẹbho ida miẹn rẹ lu, tie ọne uhọnmhọn-ọta nọn yọle, “Is a Fair Economic System Possible?” (Ẹghe Be Ribhọ Nin Ọrebhe Ha Rẹ Ha Miẹn Rẹ Lu?)

•   Ukhunmhun. “Ebale dẹ manman vuọn ọne otọ nan.” (Psalm 72:16) Nin uwẹ rẹ lẹn ebi Osẹnobulua ha rẹ lu ọle yẹ nin ohanmhẹn hẹi yẹ gbe ọria soso, tie ọne uhọnmhọn-ọta nọn yọle, “A World Without Hunger?” (Agbọn Nin Ukhunmhun Iye)

 Baibo dẹ be sabọ rẹkpa ẹbho ne nẹ sibhi agbaẹbho nọnsele re ẹlẹnan?

 Ehe. Rẹ deba ikhuaẹloghe nin ẹbho ne nẹ sibhi agbaẹbho nọnsele mhọn rẹji ẹghe odalo, Baibo dẹ yẹ sabọ rẹkpa ele rẹ sabọ ziẹngbe idia nin ele ye nian.

 Adia nọn ribhi Baibo: “Bha hẹi ji emhin soso re ibha ha kpokpo egbe. Bhi emhin rebhe, bha ha re erọnmhọn, ubhiimhin bi ekhuẹnmhẹn rẹ taman Osẹnobulua ebi bha guanọ; bhiriọ, ọfure nọn na bhi obọ Osẹnobulua vae, nọn khua okhun gbera ilẹn-otọ-emhin rebhe, ki gbega ọkhọle nọnsẹbha bi ahu iria-eria nọnsẹbha rẹ na obọ iJesu Kristi.”​—Philippians 4:​6, 7.

 Ebi a re ọle ta: Bhi idia nọn hi ki rẹ khin nin uwẹ da ke egbe uwẹ re, bhii Osẹnobulua nọn re ọkhọle nọn lọre nin uwẹ. Fẹ ọne uhọnmhọn-ọta nọn yọle, “Philippians 4:​6, 7​—‘Do Not Be Anxious About Anything.’ ” (Philippians 4:​6, 7​—Hẹi Ji Emhin Soso Rẹ Uwẹ Ha Kpokpo Egbe)