Ẹbho ne bunbun riale ghe a ida sabọ miẹn ẹghe nin ọrebhe ne nabhi agbaẹbho kẹkẹ vae ha rẹ re ẹlo ọkpa ha ghe egbe.

•   “Beji a miẹn ghe agbaẹbho kẹkẹ mhan na vae, ẹbho ire ọkhọle ọkpa lu emhin bhi isi iwẹnna, isiku, bi ije nekẹle nin ẹbho da ko miẹn egbe. Ọle zẹle nin okugbe ida ribhọ bhi ọne otọ nan.”—António Guterres, Akowe Nọn Khua Ọsi UN.

 A dẹ be miẹn ẹghe nin ọrebhe ne nabhi agbaẹbho kẹkẹ vae ha rẹ ha re ẹlo ọkpa ghe egbe? Be Baibo ta yẹ?

 Baibo taman mhan ẹlo nin Osẹnobulua rẹ ghe ẹbho ne na agbaẹbho kẹkẹ vae.

•   “Rẹ na bhi obọ okpea ọkpa, [Osẹnobulua] da zẹ agbaẹbho rebhe dagbare, nin ele ha nyẹnlẹn bhi uke otọ ọne agbọn nan rebhe.”—Acts 17:26.

•   “Osẹnobulua izọn eria. Ọkpakinọn, bhi agbaẹbho nọn irẹ ha khin, ọria nọn mun ofẹn ọlẹn, nọn yẹ lu emhin nọn mhẹn, ọle Osẹnobulua miẹn ọbhi egbe.”—Acts 10:34, 35.

 Baibo ji mhan lẹn ghe, azagba-uwa ọkpa, ọle eria rebhe na vae, sẹyẹ, ọle miẹn ọrebhe ọbhi egbe aharẹmiẹn agbaẹbho kẹkẹ ele na vae.

 Bhi ẹkẹ Agbejele nọnsi Osẹnobulua, ugbẹloghe nọn ribhi okhun, ọle ọrebhe ha da sabọ ha re ẹlo ọkpa ghe egbe. Ọne ugbẹloghe nọnsi Osẹnobulua dẹ man ẹbho ebi ele ha rẹ ha ne ibo ele lu emhin bhi uwedẹ nọn gbale yẹ. Ẹghenin, ẹbho ki luẹ ebe ha rẹkpa ele rẹ khọn ọne ọkhọle nan rẹ zọn eria miotọ yẹ nin ele ka rẹ ha mhọnlẹn khẹ.

•   “Ene nyẹnlẹn bhi ọne otọ ki luẹ ẹmhọn ikhiale.”—Isaiah 26:9.

•   “Ranmhude ikhiale ọsaje, ọfure ki ha ribhọ. Sẹyẹ, ogbaga bi ọfubhegbe nọn ida fo ghẹdẹ, ele da ha yi ikpẹ ọsi ikhiale ọsaje.”—Isaiah 32:17.

 Ẹlẹnan nian, ẹbho ne bunbun luẹ bhi Baibo ebi ele ha rẹ ha re ẹkpẹn ne ẹbho nekẹle lu emhin yẹ.

•   Nin uwẹ luẹ ba ọnan, tie Awake! nọn mhọn uhọnmhọn-ọta nọn yọle, “Is There a Cure for Prejudice?” (A Dẹ Be Miẹn Ẹghe Nan Iyẹ Da Rẹ Ha Zọn Egbe?)

•   Tie ọne uhọnmhọn-ọta nọn yọle, “Talking to Children About Racism” (Na Imọn Nesẹ Talọ Rẹji Ebi Ele Ha Rẹ Ha Ne Ẹbho Ne Na Agbaẹbho Vae Lu Emhin Yẹ) nin uwẹ rẹ lẹn ebi enebiọmọn ha rẹ sabọ ha ne imọn nesele zilo ọne ẹmhọn nan bhi uwa yẹ.