Ọsewewiẹ bhi ẹdẹ Mọnde bhi Ọtoba 10, 2022, Russia da fi bọmbu nọn dunmhun agbaẹbho eso a bhi Ukraine. Ranmhude, ikpẹdẹ eva ọkuẹsẹ ọne ukpẹdẹ nin, Ukraine da fi bọmbu nọn dunmhun akhuan nan rẹ na otọ Crimea nabhi Russia. Ekhẹn ahinmhinbo ka tale ghe Amagẹdọn dẹ kẹ vae. Ọ bha sẹ bue nin ele ta iriọ, ọne bọmbu nin da de.

•   “Rẹ na ẹghe nin ẹmhọn bọmbu rẹ dẹ bhi ẹwẹ [U.S. President John F.] Kennedy bi agbaẹbho ọsi Cuba, a bha sẹ kie miẹn ẹghe nan rẹ mun ofẹn ghe ẹghe Amagẹdọn sire. . . . Mẹn bha riale ghe a dẹ sabọ noo emhin okhọnlẹn ghe Amagẹdọn bha sunu.”—Prẹsidẹnt ọsi U.S., Joe Biden, Ọtoba 6, 2022.

•   “Mẹn rẹọbhọ ghe okhọn Amagẹdọn khọnan, ranmhude ọ dẹ riia emhin an bhi otọ agbọn rebhe.”—Ebi Volodymyr Zelensky nin President ọsi Ukraine tale ẹghe nin a rẹ nọọn ọlẹn ebi emhin okhọnlẹn nin ele noo ha si re, BBC News, Ọtoba 8, 2022.

 Emhin okhọnlẹn nin ẹbho noo dẹ be si okhọn Amagẹdọn re? Be Baibo Ta Yẹ?

 Eye. Revelation 16:16, ọle ọkpa ọne ukpọta natiọle “Amagẹdọn” da zegbere bhi ẹkẹ Baibo. Ọ iyi okhọn nin agbaẹbho ko ne egbe khọnlẹn a re ọle ta. Sokpan, ọ mundia nin okhọnlẹn nin Osẹnobulua ha ne “enijie ne ribhi ọne otọ agbọn nan rebhe” khọnlẹn. (Revelation 16:14) Osẹnobulua dẹ noo okhọn ọsi Amagẹdọn rẹ re ọkpẹnlẹn ọbhi ugbẹloghe ọsi eria rebhe.—Daniel 2:44.

 Nin uwẹ rẹ luẹ ba ebi okhọn ọsi Amagẹdọn ha lu bhi ọne otọ nan, tie ọne uhọnmhọn-ọta nọn yọle, Be Hi Okhọn ọsi Armageddon?

 Eye. Aharẹmiẹn ghe ene gbẹloghe dẹ yẹ ha noo emhin okhọnlẹn bhi ẹghe odalo, Osẹnobulua ida ka nin ele dunmhun ọne otọ nan an. Baibo yọle:

•   “Ọne otọ nan dẹ ha ribhọ bhi ighegheghe.”—Ecclesiastes 1:4.

•   “Ene khiale dẹ nyẹnlẹn bhi ọne otọ nan, ele dẹ nyẹnlẹn bhọ bhi ighegheghe.”—Psalms 37:29.

 Ọta akhasẹ ne ribhi Baibo bi emhin ne sunu ẹlẹnan ji mhan lẹn ghe emhin dẹ kẹ fidenọ nin eria. (Matthew 24:3-7; 2 Timothy 3:1-5) Deba mhan luẹ Baibo nin mhan man ẹbho le ọsọhẹ nin uwẹ rẹ lẹn ebi Baibo tale rẹji ẹghe odalo.