Ifoto ọsi Sean Gladwell/Getty
BHA HA BABEGBE!
Igho Nin Gọvamẹnt Bhi Otọ Agbọn Nan Rebhe Noo Bhi Ẹmhọn Okhọnlẹn Kpọnọ Gbera Idọla Ẹbo Eva Bhi Ijanlẹn Ẹbo ($2 Trillion)—Be Baibo Ta Yẹ?
Bhi ukpe 2022, igho nin ene gbẹloghe noolo bhi ẹmhọn okhọnlẹn bhi ọne otọ agbọn nan rebhe kpọnọ sẹbhi, idọla ẹbo uli enẹn nyan ujie, nyan ẹbo eva bhi ijanlẹn ẹbo ($2.24 trillion). Idọla ọsi U.S. ọne idọla nan khin. Ọnan wo kpọnọ gbera igho nin ele ka noo khẹ. Ranmhude ẹmhọn okhọnlẹn ọsi Russia bi Ukraine, ọle zẹle ọ kpọnọ sẹnian. Bhi Epre 2023, usun natiọle Stockholm International Peace Research Institute (SIPRI) da ji mhan lẹn ghe bhi ukpe 2022:
Igho agbaẹbho ọsi Europe noolo bhi ẹmhọn okhọnlẹn “kpọnọ gbera eka nin ele ka noo khẹ. Rẹ nabhi ukpe 1991 ha vade, ọne igho nan ki sẹ kpọnọ nẹ igho nin ele ka noo khẹ bhi ẹkẹ ukpe.”
“Igho nin agbaẹbho ọsi Russia noolo bhi ẹmhọn okhọnlẹn bhi ọne ukpe nin kpọnọ gbera eka nin ele ka noo khẹ. Ọne udede igho nan nin ele noo da re ele sibhi ihe ọsi ukpọn-ọzisẹn rẹ diọbhi ukpọn-ọzea bhi agbaẹbho bhi ọne otọ agbọn nan rebhe ne ki sẹ noo igho nẹ.”
United States, ọle agbaẹbho nọn ki sẹ noo igho nọn kpọnọ nẹ bhi ọne otọ agbọn nan rebhe bhi ẹmhọn okhọnlẹn. “A ha waa igho nan noo bhi okhọnlẹn bhi otọ agbọn nan rebhe diọbhi ijanlẹn ea, ọ gbera obọ ọkpa bhọ nin agbaẹbho ọsi United States ọkpa noolo.”
Okpea ọkpa natiọle Dr. Nan Tian, nọn yi ọkpa bhi usun natiọle SIPRI da yọle: “Uwedẹ nin igho nin gọvamẹnt noo bhi ẹmhọn okhọnlẹn ki rẹ si okhun rẹman ghe, ugbega i yẹ ribhi ọne agbọn nan nin mhan da nyẹnlẹn ẹlẹnan.”
Baibo ka wo ji mhan lẹn ghe ugbẹloghe kẹkẹ ne mhọn ahu bhi otọ agbọn nan rebhe dẹ wo ha ne egbe khọnlẹn. Ọ da yẹ ji mhan lẹn emhin nọn ha sabọ re ọfure ọsaje re.
Ọta akhasẹ rẹji ebi okhọnlẹn ha rẹ ha tuẹn okhun yẹ
Baibo tie ẹghe nin mhan da nyẹnlẹn ẹlẹnan nian ẹghe ọkpẹnlẹn.—Daniel 8:19.
Ebe nọnsi Daniẹl ji mhan lẹn ghe bhi ọne ẹghe nin, ugbẹloghe kẹkẹ bhi ọne agbọn nan dẹ wo ha khọnlẹn rẹ re ahu man. Ene ugbẹloghe nan dẹ wo ha lu eka nin ele ha sabọ lu rẹ rẹman ọnọn mhọn ahu nẹ bhi ẹwẹ ele. Bhi ọne ẹghe nin ele ha rẹ ha lu ọnan, ele dẹ wo manman ha noo igho beji ele ha da sabọ lu ọle.—Daniel 11:40, 42, 43.
Nin uwẹ rẹ manman luẹ ba ẹmhọn ọne akhasẹ nan nin Baibo tẹmhọnlẹn, ghe ọne ividio natiọle Ọta Akhasẹ Nọn Munsẹ—Daniel Uhọnmhọnlẹn 11.
Be ọfure ọsaje ha rẹ sabọ ha ribhọ yẹ?
Baibo ji mhan lẹn ghe Osẹnobulua dẹ re ọkpẹnlẹn ọbhi ugbẹloghe ọsi eria. Ọle “ki mun ejele nan i da sabọ fuẹn an ghee gbọ. A i da re ọne ejele nin eria ebhebhe. Ọne ejele dẹ dunmhun ene ejele nekẹle nan rebhe a yẹ kpẹn ugbẹloghe nọnsele. Ọne ejele tobọle ki ha gbẹloghe bhi ighegheghe.”—Daniel 2:44.
Osẹnobulua nin Jehova a dẹ kẹ lu emhin nin eria bha sabọ lu. Ọnin hi nin ọle rẹ mun ọfure ọsaje re nọn i da fo ghẹdẹ. Be ọnan ha rẹ sunu yẹ? Ugbẹloghe nọnsọle nọn ribhi okhun dẹ re ọkpẹnlẹn ọbhi emhin okhọnlẹn rebhe bi ugbele rebhe.—Psalm 46:8, 9.
Nin uwẹ rẹ luẹ ba emhin kẹkẹ nin Agbejele nọnsi Osẹnobulua ha lu, tie ọne uhọnmhọn-ọta nọn yọle, “Ọfure Dẹ Gba Ijerebhe Bhi Agbejele Nọnsi Osẹnobulua” (Under God’s Kingdom ‘Peace Will Abound’).
a Jehova hi elin nọnsi Osẹnobulua.—Psalm 83:18.