Bhi Mee 24, 2022, emhin ọhanilo nọn manman kaka da sunu bhi obhi agbaẹbho khere bhi Uvalde, Texas, U.S.A. Beji The New York Times tale, “okpea ọkpa da mun osisi nabhi isiku, gbono ibhokhan 19 bi ene man ebe eva a . . . bhi Robb Elementary School.”

 Ọ ba bhi egbe a ghe, emhin nọn sẹnian wo sunu igba ne bunbun. Nuiz natiọle USA Today da yọle ghe, “bhi ẹkẹ ukpe nọn gbera, a da ha fino osisi bhi isiku ne sẹbhi 249 bhi United States. Emhin nọn sẹnian bha sẹ sunu khẹ rẹ na bhi 1970 ha vade.”

 Bezẹle nin emhin ebe nọn sẹnian da sunu? Be ha rẹkpa mhan rẹ sabọ ziẹngbe emhin nọn sẹriọ? Emhin be ribhọ nọn re imhan rẹọbhọ ghe, ugbele dẹ kẹ kpẹn? Baibo re ewanniẹn ọbhi ene inọnta nan.

•   Baibo da tie ọne ẹghe nin mhan da nyẹnlẹn nan, “ẹghe ọkike” ọsi ọne agbọn. Ọ da yọle ghe, ẹbho “ida yẹ ha mhọn ẹkẹ-ẹjẹjẹ,” sokpan, “ele ki ha mhọn izalo.” Onin rẹman ghe, ele ki ha gbugbele yẹ lu emhin ebe kẹkẹ. Ọ da yẹ yọle ghe, ẹbho ne re ikpẹ ne imhẹn ne sẹriọ man ki “ha khọ bhọ.” (2 Timothy 3:1-5, 13) Nin uwẹ rẹ luẹ ba ọnan, tie ọne uhọnmhọn-ọta nọn yọle, “Did the Bible Predict the Way People Think and Act Today?” (Baibo Be Ka Tẹmhọn Uwedẹ Nin Ẹbho Rẹ Ria-eria Yẹ Lu Emhin Ẹlẹnan?)

 Ẹbho ne bunbun ki ha riale, ‘bezẹle nin Osẹnobulua bha da re ọkpẹnlẹn ọbhi emhin ebe bii osisi nan fino bhi isiku?’ Nin uwẹ rẹ miẹn ọne ewanniẹn, tie ọne uhọnmhọn-ọta nọn yọle, “Bad Things Happen to Good People—Why?” (Bezẹle Nin Emhin Ebe Da Sunu Ji Ẹbho Ne Mhẹn?)

•   “Emhin rebhe nan gbẹn ọbhi otọ, a gbẹn ele nin ele ha dia mhan, beji a da miẹn ghe ranmhude . . . ikoudure nin mhan ha miẹn bhi Ebenọnkhiale, mhan ki ha mhọn ikhuaẹloghe.”—Romans 15:4.

 Adia kẹkẹ ne ribhi Baibo dẹ sabọ rẹkpa uwẹ rẹ ha ziẹngbe ọbalọ nọn ribhi ọne agbọn nan. Nin uwẹ rẹ luẹ ba ọnan, tie ọne uhọnmhọn-ọta nọn yọle, “Will Violence Ever End?” (Ugbele Dẹ Be Kpẹn?) nọn ribhi Awake!

 Nin enebiọmọn rẹ sabọ rẹkpa imọn nesele bhi ebi ele họn, yẹ daghe bhi niuz, tie ọne uhọnmhọn-ọta nọn yọle, “Disturbing News Reports and Your Children.” (Emhin Ne Imhẹn Nan Rẹman bhi Niuz bi Imọn Nesẹ)

•   “Ọle dẹ miẹn ele fan bhi obọ ene denyẹnyẹn ele, bi ene ne ele khọnlẹn.”—Psalm 72:14.

•   “Ele dẹ re agbada nọnsele rẹ kiẹn ebi a rẹ gua. Ele ki dọ re ọkuọ nọnsele kiẹn ebi a rẹ gia emhin. Agbaẹbho ida yẹ kie re agbada okhun da agbaẹbho, la nin ele kie dọ yẹ ha luẹ okhọnlẹn.”—Micah 4:3.

 Osẹnobulua dẹ lu emhin nin eria bha sabọ lu. Agbejele nọnsọle nọn ribhi okhun, da re ọkpẹnlẹn ọbhi emhin nan rẹ khọnlẹn rebhe bi ugbele. Nin uwẹ rẹ luẹ ba emhin nin Agbejele nọnsi Osẹnobulua ha lu, tie ọne uhọnmhọn-ọta nọn yọle, “Under God’s Kingdom ‘Peace Will Abound.’” (Ọfure Dẹ Gba Eje Rebhe bhi Odotọ Agbejele Nọnsi Osẹnobulua)