Okhọn nọn sunu bhi Ukraine rẹman ghe ene mun ọkalo bhi otuẹ ne bunbun re obọ ọbhi ẹmhọn okhọnlẹn. Fẹ ebi ene mun ọkalo bhi otuẹ rẹ ha deba ibo veva bhi ọne okhọn yẹ:

•   “Mhan wo khuẹnmhẹn ọrebhe yẹ gẹn ọrebhe ne zegbere rẹ khọn nin Ukraine nin agbaẹbho nọnsele nin ele rẹ hinmhin ele bhi obọ eghian ele . . . Ọkhọle nọnsẹmhan rebhe mhan rẹ deba bha, sẹyẹ mhan wo nan erọnmhọn nin bha.”—Metropolitan Epiphanius I ọsi Kyiv, nan gbẹn ọbhi The Jerusalem Post, Mach 16, 2022.

•   “Ọdiọn otuẹ ọsi Orthodox nọn ribhi Russia da re ọta ogbakha man bhi ẹdẹ Sọnde. Eghe nin ọle rẹ ha re ọne ọta man, ọle da taman eyokhọnlẹn nesi Russia ghe, nin ele re ọgbẹlẹ gba dọ khọn nin agbaẹbho nọnsele, beji a rẹ lẹn ele ọbhọ ghe, ele sabọ khọnlẹn, manman nọn, beji a miẹn ghe Moscow yẹ wo mun okhọn bu Ukraine.”—Reuters, Epre 3, 2022.

 Ọ be khẹke nin Kristiẹn ha yo okhọnlẹn? Be Baibo Ta Yẹ?

 Baibo rẹman ghe ene gene rẹkhan Jesu iyo okhọnlẹn.

•   “Re agbada nọnsi uwẹ fikie diọ bhi eji uwẹ da re, ranmhude ọrebhe ne noo agbada, agbada a rẹ yẹ gbe ele a.”—Matthew 26:52.

   Ọria nọn re obọ ọbhi okhọnlẹn la nọn yo okhọnlẹn be gene hẹnmhọn nin Jesu?

•   “Uhi ọgbọn ọnan khin nin mẹn gbe nin bha, ghe nin bha ha mhọn ahoẹmhọn-egbe da egbe; beji mẹn rẹ hoẹmhọn bha, bha re iriọ hoẹmhọn egbe bha. Ọnan ẹbho rebhe ha rẹ lẹn ghe edibo nesẹmhẹn bha khin, sade bha mhọn ahoẹmhọn-egbe da egbe.”—John 13:34, 35.

   Ọria nọn re obọ ọbhi okhọnlẹn be re oyẹẹ man nin Jesu yọle ghe a dẹ rẹ lẹn edibo nesọle la ene rẹkhan ọlẹn?

 Nin uwẹ rẹ luẹ ba ọnan, tie ọne uhọnmhọn-ọta nọn yọle, “Ọ Be Khẹke Nin Kristiẹn Ha Rẹ Obọ Ọbhi Okhọnlẹn?”

 Emhin ẹwanlẹn be nọn nin Kristiẹn rẹ yọle ọle ida yo okhọnlẹn ẹlẹnan? Ehe. Baibo ka tale ọbhi otọ khẹ ghe, bhi ẹghe nọnsẹmhan nan natiọle “ikpẹdẹ ọkike,” ẹbho eso dẹ ha ribhọ ne re obọ rẹkhan ebi Jesu tale. Ene ẹbho nan ida ‘kie dọ ha luẹ okhọnlẹn.’—Isaiah 2:2, 4.

•   Nin uwẹ rẹ luẹ ba ọnan, tie ene uhọnmhọn-ọta ne ribhi otọ uhọnmhọn-ọta natiọle “How Does God View War?” (Ẹlo Nela Osẹnobulua Rẹ Ghe Okhọnlẹn?) bhi Ọne Ọkhẹughe.

 Bhi ẹghe nọn bha ree gbe nian, Jehova a nin “Osẹnobulua ọsi ọfure” ki noo ejele nọnsọle nọn ribhi okhun rẹ hinmhin ẹbho “bhi obọ ene denyẹnyẹn ele, bi ene ne ele khọnlẹn.”—Philippians 4:9; Psalm 72:14.

•   Nin uwẹ rẹ lẹn ebi ọ ha rẹ sunu yẹ, ghe ọne vidio natiọle Bebhọ Agbejele Nọnsi Osẹnobulua?