Usun ọkpa nọn mhọn bhi ilọnmhọn niuz, natiọle Catholic News Service, ji mhan lẹn ghe, bhi iluemhin ọkpa nan lu bhi St. Peter’s Basilica bhi Mach 25, 2022, Pope Francis da mundia bhi odalo amanzẹ ọsi Mary. Ọle da “koko ẹlo yẹ deuhọnmhọnre ha bhii ji ọle.” Ọle da “bhii Mary” nin ọle mun ọfure re. Niuz ọbhebhe natiọle Vatican News da yẹ yọle ghe, ọne Pope da ha bhii nin Mary re ọkhọle nọn khiale nọnsọle rẹ kpe eria khia, manman nọn Russia bi Ukraine.

 Be uwẹ ria ọle yẹ? Ọ be khẹke nin mhan ha nan erọnmhọn bhi odalo amanzẹ la ha noo ele bhi oga nọnsẹmhan? Ji mhan fẹ ene ulọnlẹn nan ghe bhi Baibo:

•   “Bha hẹi man amanzẹ soso nin egbe bha, la emhin soso nọn khọkhọ ebe ribhi okhun la emhin nọn khọkhọ ebe ribhi ọne uke otọ nan, la ebe ribhi ẹkẹ amẹn. Bha hẹi deuhọnmhọnre nin ele. Bha hẹi ji ọle ha yẹẹ bha rẹ ha ga ele, ranmhude imẹn nin Jehova nin Oṣenobulua bha, Osẹnobulua nọn ho nan ha ga ọle ọkpa mẹn khin.”—Exodus 20:4, 5. a

•   “Siliva bi golu a rẹ lu ẹbo nesele, emhin nin eria re obọ lu. Ele mhọn unun, sokpan ele isabọ talọ; Ele mhọn ẹlo, sokpan ele isabọ daghe; Ele mhọn ehọ, sokpan ele isabọ hẹnmhọn; Ele mhọn ihue, sokpan ele isabọ ya emhin; Ele mhọn obọ, sokpan ele isabọ re ọne obọ so emhin; Ele mhọn oẹ, sokpan ele isabọ re ọle khian; Ele isabọ re uru nọnsele ta emhin soso. Ẹbho ne man ele dẹ diabe ele, Iriọ ọrebhe ne mun udu nyan ele ha yẹ dia.”—Psalm 115:4-8.

•   “Imẹn hi Jehova. Ọnin hi elin nọnsẹmhẹn; Mẹn ida deba ọria soso gha uyi nọnsẹmhẹn, la deba amanzẹ soso nan kanọ gha ogẹn nọnsẹmhẹn.”—Isaiah 42:8.

•   “Bha re egbe nẹ bhi iga-ẹbọ.”—1 Corinthians 10:14.

•   “Bha re egbe nẹ bhi ẹmhọn iga-ẹbọ.”—1 John 5:21.

 Nin uwẹ rẹ luẹ ba ebi Baibo tale rẹji amanzẹ nan noo bhi oga, tie ọne uhọnmhọn-ọta nọn yọle, “The Bible’s Viewpoint—Images” (Ebi Baibo Tale Rẹji Amanzẹ) la uwẹ ha ghe ọne vidio natiọle Osẹnobulua Be Guanọ Nin Mhan Ha Noo Amanzẹ?

 Ọ dẹ yẹ ti uwẹ bhọ rẹ luẹ ebi Baibo ta yẹ rẹji ene uhonmhọn-ọta nan:

•   “The Virgin Mary—What Does the Bible Say About Her?” (Be Baibo Tale Rẹji Mary Nọn Bha Sẹ Lẹn Okpea?)

•   “Should You Pray to the Virgin Mary?” (Ọ Be Khẹke Nan Ha Nan Erọnmhọn Ji Mary Nọn Bha Sẹ Lẹn Okpea?)

•   “Miracles and Apparitions—Signs From God?” (Obọ Osẹnobulua Emhin Ọhan-ilo Be Na Vae?)

•   “Peace on Earth—How Will It Come?” (Be Ọfure Ha Rẹ Sabọ Vae bhi ọne Otọ Nan Yẹ?)

Ene nyan ifoto ne ribhọ: Vincenzo Pinto/AFP via Getty Images