Bhi otọ agbọn rebhe, ọ ki wo yẹẹ ẹbho ne bunbun rẹ ha gbega elanmhẹn la he ghe ele i da le ebale nan re elanmhẹn ọi.

•   “Ẹbho ne he ghe ele i da noo elanmhẹn rẹ lu emhin soso, ele hi ẹbho ne dọnmhegbe nin ele hẹi ha re obọ oya mun elanmhẹn, le elanmhan, re ọle lu ukpọn, la re ọle lu emhin ọbhebhe nọn hi ki rẹ khin.”—The Vegan Society.

 Ẹbho he ghe ele i da noo elanmhẹn rẹ lu emhin soso ranmhude, ele guanọ nin ele gbega eji ele da nyẹnlẹn, egbe nọnsele, la ranmhude oga nin ele ye.

•   “Ẹbho ne he ghe ele i da noo elanmhẹn rẹ lu emhin soso dikẹ bhi ẹbho ne gheghe zẹ ghe, ele i da le ebale nan re elanmhẹn ọi. Ẹbho ne zẹ ghe ele i da noo elanmhẹn rẹ lu emhin soso rẹọbhọ ghe, ọrebhe ha lu iriọ, ọne agbọn nan ki mhẹn gbera ebi ọ dia nian.”—Britannica Academic.

 Ọne otọ nan dẹ be ha mhẹn sade eria he ghe ele i da noo elanmhẹn rẹ lu emhin soso? Be Baibo ta yẹ?

 Baibo ji mhan lẹn ghe, Osẹnobulua nin Jehova, a nin Aman nọn man emhin rebhe yọle ghe, eria khua okhun gbera elanmhẹn, bhiriọ, ele hi ene ha gbẹloghe elanmhẹn. (Genesis 1:27, 28) Ọle da yẹ taman eria nin ele ha le elanmhẹn. (Genesis 9:3) Ọrẹyiriọ, ọle bha re obọ ọbhọ nin eria ha re obọ oya mun elanmhẹn.—Proverbs 12:10.

 Beji Baibo rẹman, ọdeọde ha tobọle zẹ si ọle dẹ le elanmhẹn la si ọle i da le. b Ebi mhan hi ki rẹ zẹ bha rẹ mhan khua okhun gbera eria nekẹle bhi ẹlo nọnsi Osẹnobulua. (1 Corinthians 8:8) Bhiriọ, ọria soso hẹi re unun ji ọria ọbhebhe bhi emhin nin ọle zẹ rẹ le.—Romans 14:3.

 Baibo ji mhan lẹn ghe, uwedẹ nin mhan zẹ rẹ ha nyẹnlẹn i da sabọ re ọnọghọ ne ribhi ọne agbọn nan kie. Ranmhude uwedẹ nin eria rẹ gbẹloghe, rẹ nyẹnlẹn, yẹ rẹ noo igho bhi ọne agbọn nan zẹle nin ọnọghọ ne bunbun da ribhọ ẹlẹnan. Mhan nin eria i da sabọ re ọkpẹnlẹn ọbhi ene ọnọghọ nan. Ọnin zẹle nin Baibo da yọle:

•   “A ida sabọ dia emhin nọn khin an.”—Ecclesiastes 1:15.

 Aman nọn man mhan ọkpa ha sabọ re ọkpẹnlẹn ọbhi ọnọghọ nin mhan kuẹlo da. Baibo noo ikpọta eso rẹ khọkhọ ebi ọle ha lu yẹ.

•   “Mẹn da daghe okhun ọsọgbọn bi otọ ọsọgbọn. Okhun nọn ka ha ribhọ khẹ, bi otọ nọn ka ha ribhọ khẹ da siegbe kie, sẹyẹ, okpẹdẹ bha yẹ ha ribhọ.”—Revelation 21:1.

 “Okhun nọn ka ha ribhọ khẹ” nin ọne ulọnlẹn nan tẹmhọnlẹn mundia nin ugbẹloghe ọsi eria. “Okhun ọsọgbọn” mundia nin Ejele nọnsi Osẹnobulua nọn ribhi okhun. Ọne Ejele nọnsi Osẹnobulua dẹ re ọkpẹnlẹn ọbhi ugbẹloghe ọsi eria yẹ fuẹn ẹbho ne i mhẹn an. Ọne Ejele ki ha gbẹloghe eria ne re obọ ọbhi ugbẹloghe nọnsi Osẹnobulua.

 Ẹghe nin Agbejele nọnsi Osẹnobulua ha rẹ ha gbẹloghe ọne otọ nan, eria ki luẹ ebi ele ha rẹ deba elanmhẹn ha nyẹnlẹn bhi ọfure yẹ. Sẹyẹ, ele ki sabọ ha re ọne otọ nan khian nọnsẹn.—Isaiah 11:6-9.