BHA HA BABEGBE!

Ukhunmhun Nin Okhọnlẹn Bi Ọkhualulu Sire—Be Baibo Ta Yẹ?

Khue

Ranmhude okhọnlẹn nan khọnlẹn bhi otọ Ukraine, bi uwedẹ nin ijerebhe ki rẹ manman ha ghan, ebale bha yẹ ha sẹ ẹbho ne bunbun obọ, manman nọn, bhi agbaẹbho ne i manman mhọn emhin.

“Emhin kẹkẹ bọsi okhọnlẹn, ọkhualulu, bi igho ifuẹ nọn si okhun deba ebezẹle nin ukhunmhun da ha fi.”—António Guterres, UN secretary-general, Julai 17, 2023.
“Ẹbho eso yọle ghe, ranmhude Russia bha yẹ re obọ ọbhi emhanmhan nan rẹ na bhi Ukraine je ebale diọbhi agbaẹbho nekẹle, ukhunmhun dẹ wo ha fi bhi otọ agbọn rebhe, sẹyẹ, ebale dẹ ha ghan bhi agbaẹbho ne i manman mhọn igho, manman nọn bhi obọ ọsi Nọt bhi Africa bi Middle East.”—Atalayar.com, Julai 23, 2023.

Fẹ ebi Baibo ta yẹ rẹji ukhunmhun nọn fi bi ebi ẹghe odalo ha dia yẹ.

Baibo ka tale ọbhi otọ khẹ ghe, ukhunmhun dẹ ha fi

Jesu yọle: “Agbaẹbho ọkpa ki mun okhọnlẹn bu agbaẹbho ọbhebhe, agbejele ọkpa ki mun okhọnlẹn bu agbejele ọbhebhe, ukhunmhun ki ha fi.”—Matthew 24:7.
Ebe ọsi Revelation da tẹmhọn ikpea enẹn ne hẹn akasi. Ọkpa bhi ene ikpea nan mundia nin okhọnlẹn. Ọnọnkẹle nọn rẹkhan ọlẹn da mundia nin ẹghe ukhunmhun. Bhi ọne ẹghe nan, ebale i yẹ da ha gba obọ, sẹyẹ, obhiọ khere nọn ribhọ ki manman ha ghanlan. “Mẹn da daghe akasi nọn bhihi. Ọnọn hẹn ọlẹn da ne ebi a rẹ mhaan emhin mhọn bhi obọ. Mẹn da họn ukpurulu . . . nọn yọle: ‘Dinariọs ọkpa a ha rẹ khiẹn ukpu wit ọkpa, sẹyẹ, dinariọs ọkpa a a ha rẹ khiẹn ukpu bali ea.’”—Revelation 6:5, 6.

Ene ọta akhasẹ nan bhi Baibo ne tẹmhọn ukhunmhun nọn fi wo ha munsẹ ẹlẹnan. Ọne ẹghe nan Baibo tiọle “ẹghe ọkike.” (2 Timothy 3:1) Nin uwẹ rẹ luẹ ba ebi Baibo tiọle ẹghe ọkike, bi ene ikpea enẹn ne hẹn akasi nan tẹmhọnlẹn bhi ebe ọsi Revelation, ghe ọne ividio natiọle Ọne Agbọn Nan Wo Fidenọ Rẹ Na bhi Ukpe 1914 Ha Vade, uwẹ ha yẹ tie ọne uhọnmhọn-ọta nọn yọle “Ene Ikpea Enẹn Ne Hẹn Akasi—Họla Ele Khin?” (The Four Horsemen—Who Are They?)

Ebi Baibo ha rẹ sabọ rẹkpa mhan yẹ

Adia kẹkẹ ribhi Baibo ne ha sabọ rẹkpa mhan ziẹngbe ọnọghọ kẹkẹ bọsi, igho nan rẹ dẹ ebale nọn ki ghan nian bi ukhunmhun nọn ki gba ijerebhe. Fẹ ijiẹmhin eso ghe bhi ọne uhọnmhọn-ọta nọn yọle, “Ebi Uwẹ Ha Rẹ Sabọ Ha Te Obhi Igho Khere Nin Uwẹ Mhọn Yẹ” (How to Live on Less).
Baibo ji mhan lẹn ghe emhin dẹ kẹ ha mhẹn. Ọ yọle ghe, bhi ẹghe odalo “ebale dẹ manman vuọn ọne otọ nan,” bhiriọ ọrebhe ki miẹn ebale le vuọn ẹkẹ. (Psalm 72:16) Nin uwẹ rẹ luẹ ba ebi ọne ẹghe odalo nan ha dia yẹ, bi ebezẹle nin uwẹ ha da sabọ rẹọbhọ, tie ọne uhọnmhọn-ọta nọn yọle, “Ikhuaẹloghe Ọsaje Nin Mhan Mhọnlẹn Rẹji Ẹghe Odalo Nọn Mhẹn.”