Ọsewewiẹ bhibhibhi bhi February 24, 2022, Russia da munhẹn ha khọn Ukraine arẹmiẹn ene mhọn obọ bhi ugbẹloghe bhi otọ agbọn rebhe rẹ ha dọnmhegbe nin ọne okhọn hẹi de. Be ọne okhọn nan ha rẹ rẹso ẹbho bhi otọ agbọn rebhe yẹ? Bhi ikpẹdẹ eso ne gbera, António Guterres nin ọdiọn akọnwe ọsi United Nations da yọle: “Iloya nin ọne okhọn nan ha si ji ẹbho, emhin nọn ha riia, bi uwedẹ nọn ha rẹ rẹso ugbega ọsi otọ Europe bi ije nekẹle bhi otọ agbọn rebhe, ọ iyi khere.”

•   Jesu Kristi ka tale ghe, “Agbaẹbho ki ha mun okhọn ji agbaẹbho, agbejele ki ha mun okhọn ji agbejele.” (Matthew 24:7) Tie ọne uhọnmhọn-ọta nọn yọle, “What Is the Sign of ‘the Last Days,’ or ‘End Times’?” (Emhin Nela Ha Sunu bhi Ẹghe Ọkike?) nin uwẹ da daghe ọle ghe, emhin nin Jesu tale bhi ẹkẹ Baibo, ele munsẹ ẹlẹnan.

•   Ebe nọnsi Revelation bhi Baibo re okhọnlẹn rẹ khọkhọ ọria nọn hẹn “akasi nọn gian,” nọn “re ọfure kie bhi ọne otọ nan.” (Revelation 6:4) Tie ọne uhọnmhọn-ọta nọn yọle, “The Four Horsemen​—Who Are They?” (Hela Ikpea Enẹn Ne Hẹn Akasi Khin?) nin uwẹ rẹ daghe ebi ọne ọta akhasẹ nan rẹ diẹn mun okhọn nan khọn ẹlẹnan yẹ.

•   Ebe ọsi Daniel wo tẹmhọn ebi “ojie ọsi north” bi “ojie ọsi south” ha rẹ ha ne egbe suan yẹ. (Daniel 11:​25-45) Ghe ọne ividio natiọle Ọta Akhasẹ Nọn Munsẹ​—Daniel Uhọnmhọnlẹn 11 nin uwẹ rẹ lẹn ebezẹle nin a ha da sabọ yọle ghe, Russia bi ene ribhi ibo ọle hi ojie ọsi north. a

•   Revelation yẹ tẹmhọn “okhọn ọsi ukpẹdẹ nọn khua ọsi Osẹnobulua Nọn Ke Okhun Nẹ.” (Revelation 16:​14, 16) Sokpan, ọnan iyi okhọn nin agbaẹbho eva ko khọnlẹn, beji mhan rẹ daghe ọle ẹlẹnan. Tie ọne uhọnmhọn-ọta nọn yọle, “Be Hi Okhọn ọsi Armageddon?” nin uwẹ rẹ manman lẹn otọ ọne okhọn nin nọn ha sunu bhi ẹghe odalo.

•   Baibo yọle ghe, Osẹnobulua “dẹ re ọkpẹnlẹn ọbhi okhọnlẹn bhi ọne otọ agbọn nan rebhe.” (Psalm 46:9) Tie ọne uhọnmhọn-ọta nọn yọle, “A Real Hope for a Better Tomorrow” (Rẹọbhọ Ghe Ẹghe Odalo Dẹ Ha Mhẹn) nin uwẹ rẹ manman lẹn otọ ive nin Osẹnobulua vele rẹji ẹghe odalo.

•   Jesu da man edibo nesọle ebi ele ha rẹ ha bhii yẹ nin Agbejele nọnsi Osẹnobulua vae. (Matthew 6:​9, 10) Ọne Agbejele nin, ọle hi ugbẹloghe ọsi Osẹnobulua nọn ribhi okhun nọn ha mun iho nọnsọle sẹ bhi ọne otọ nan. Otọ nọn fure, deba iho ọsi Osẹnobulua nin ọne Agbejele ha munsẹ. Nin uwẹ rẹ sabọ lẹn ebi ọne Agbejele ha lu nin uwẹ, ghe ọne ividio natiọle Bebhọ Agbejele Nọnsi Osẹnobulua?

 Esali Jehova ne ribhi Ukraine bun gbera 129,000. Bọsi Esali Jehova ne ribhi agbaẹbho nekẹle, ele re egbe khọkhọ Jesu. Ele ideba ahinmhin-ibo soso, sẹyẹ, ele ideba bhi okhọnlẹn. (John 18:36) Esali Jehova bhi otọ agbọn rebhe sẹyẹ wo taman ẹbho ghe, Agbejele nọnsi Osẹnobulua, ọle ọkpa ha sabọ re ọkpẹnlẹn ọbhi ọnọghọ ọsi eria rebhe, rẹ sẹbhi okhọnlẹn. (Matthew 24:14) Nin uwẹ rẹ luẹ ba ebi Baibo tale rẹji ẹghe odalo, ne Esali Jehova talọ.