Bhi Jẹnuare 27, 2023, ẹbho ne bunbun dẹ lu iluemhin natiọle International Holocaust Remembrance Day. Ọne ukpẹdẹ nin ele rẹ yere ẹbho ne bunbun nan re osukpa fuẹn an. Ọne ugbele nan nọn sunu bhi ikpe 75 ne gbera sabọ re ẹbho ha nọọn ebezẹle nin Osẹnobulua da re otọ nin emhin nọn sẹnian da sunu.

•   Nin uwẹ rẹ lẹn ebi Baibo tale rẹji ọne ẹmhọn nan, tie ọne uhọnmhọn-ọta nọn yọle, “Bezẹle Nin Osẹnobulua Da Re Otọ Nin Ẹbho Rẹ Fuẹn Ibo Ele A bhi Ẹghe Okhọn ọsi Hitler?”

 A wo fuẹn ibhokhan Ju ne bunbun a bhi ọne ẹghe ugbele nin. A wo nyan gbono ele a! A da yẹ ha kpokpo ẹbho ne iyi Ju yẹ gbono ele a. Deba ene ẹbho nan, a da yẹ ha kpokpo Esali Jehova ranmhude urẹọbhọ nọnsele.

•   Nin uwẹ rẹ luẹ ba ọnan, tie ọne uhọnmhọn-ọta nọn yọle, “What Happened to Jehovah’s Witnesses During the Time of the Holocaust?” (Be Sunu Ji Esali Jehova Bhi Ẹghe Nan Rẹ Ha Fuẹn Ẹbho A?)

 Ẹbho ne bunbun mun ofẹn ghe ọne ugbele nọn sunu bhi ẹghe nọn gbera dẹ kie sabọ sunu. Ọ dẹ ko uwẹ udu re rẹ lẹn ghe, Baibo yọle ghe, ẹghe vade nan iyẹ da ha miẹn iloya nọn sẹnian.

•   “Inian iJehova tale: ‘Imẹn tobọmẹn lẹn iria-eria nin mẹn ria da bha, eria ọsi ọfure, ọiyi ọsi ọbe, nin mẹn rẹ re ẹghe odalo nọn mhẹn bi ikhuaẹloghe nin bha.’”—Jeremiah 29:11. a

 Ọne ive nan dẹ munsẹ ẹghe nin Osẹnobulua nin Jehova ha rẹ re ọkpẹnlẹn ọbhi emhin ebe ne sunu bi iloya nin ele sire. Ọle dẹ kẹ:

•   Ne ẹbho ne si ikuan-egbe ji ẹbho nekẹle kie.—Proverbs 2:22.

•   Hinmhin ọrebhe ne loya.—Revelation 21:4.

•   Riọ ene yu kpanọ nin ele kie dọ ha nyẹnlẹn bhi ọne otọ nan.—John 5:28, 29.

 Uwẹ dẹ sabọ rẹọbhi ene ive nan ne ko ọria udu re ne ribhi Baibo. Nin uwẹ rẹ lẹn ebezẹle nin mhan da ta iriọ, deba mhan ha luẹ Baibo nin mhan man ẹbho le ọsọhẹ.