Kọrint Nin Ọhẹnhẹn 1:1-31
1 Pọl, nin Osẹnobulua tiele nọn dọ ha yi odibo ọsi Jesu Kristi gbẹn ọne ebe nan. Imẹn bi Sọstẹnis nin obhio mhan
2 gbẹn ọlẹn ji agbotu nọnsi Osẹnobulua nọn ribhi Kọrint. Ibha rebhe nan kpe khia yẹ rẹ kiẹn edibo nesi Jesu Kristi mẹn gbẹn ọlẹn je. A da tie bha nin bha dọ ha yi eria ne khiale, ibha bi ẹbho bhi ije kẹkẹ ne sotie elin nọnsi Jesu Kristi nin Ebeanlẹn mhan. Ebeanlẹn nọnsele bi Ebeanlẹn nọnsẹmhan ọle khin.
3 Mẹn bhii nin Osẹnobulua nin Aba mhan bi Jesu Kristi nin Ebeanlẹn mhan mhọn ifuẹkẹ nọn khua da bha yẹ re ọfure nin bha.
4 Ẹghe rebhe mẹn rẹ khuẹnmhẹn Osẹnobulua nọnsẹmhẹn, ranmhude ifuẹkẹ nọn khua nin ọle mhọn da bha rẹ na obọ Jesu Kristi.
5 Bha wo miẹn erọnmhọn ne bunbun nin bha rẹ kugbe deba Jesu. Ọle wo re ilẹn-otọ-emhin nin bha, yẹ rẹkpa bha rẹ ha tẹmhọn Osẹnobulua.
6 Bha ki wo manman rẹọ bhi ẹmhọn Jesu Kristi.
7 Bhiriọ, emhin soso iribhọ nin Osẹnobulua bha re nin bha, bhi ọne ẹghe nan nin bha rẹ ha khẹ nin Jesu Kristi nin Ebeanlẹn mhan re ahu nọnsọle man.
8 Osẹnobulua dẹ yẹ rẹkpa bha rẹ deziẹn rẹ sẹbhi ọkpẹnlẹn, beji a ha da miẹn a bha yọle bha lu emhin ebe bhi ukpẹdẹ nin Jesu Kristi ha vae.
9 Osẹ nọn ihiẹ ọria Osẹnobulua khin, ọle hi ọnọn tie bha, nin bha dọ deba Ọmọn nọnsọle nin Jesu Kristi nin Ebeanlẹn mhan ha muobọ.
10 Ibhio, mẹn re elin nọnsi Jesu Kristi nin Ebeanlẹn mhan bhii bha, nin bha rebhe ha ta unun ọkpa. Bha hẹi ji iwaegbea ha ribhi ẹwẹ bha. Bha ku ọkhọle gbe, bha ha yẹ ha ria eria ọkpa.
11 Ibhio mẹn, ẹbho eso bhi azagba-uwa ọsi Kloi taman imẹn ghe, ovan-ovan ọkpa bha ki van.
12 Ebi mẹn ta ọle hi ghe, eso bhi ẹwẹ bha yọle: “Ibo nọnsi Pọl mhan ye,” eso yọle: “Ibo ọsi Apọlọs mhan ye,” eso yole: “Ibo ọsi Sifas* mhan ye,” eso yẹ yọle: “Ibo ọsi Kristi mhan ye.”
13 Eka Kristi ribhọ? Ọ ibe yi ọkpa? Pọl be yu nin bha bhi okhun oran? La elin ọsi Pọl bha be rẹ mianmẹn?
14 Mẹn khuẹnmhẹn Osẹnobulua ghe, gbera Krispọs bi Geyọs, mẹn bha re amẹn nin bha soso.
15 Bhiriọ, ọria soso bhi ẹwẹ bha ida sabọ yọle ghe, elin nọnsẹmhẹn ọle rẹ mianmẹn.
16 Mẹn yẹ re amẹn nin azagba-uwa ọsi Stẹfanas. Gbera ene ẹbho nan, mẹn bha riale ghe mẹn re amẹn nin ọria ọbhebhe.
17 Ọne ọta nọn mhẹn Kristi je imẹn nin mẹn dọ ha wewe, ọ iyi nin mẹn dọ ha re amẹn nin ẹbho. Mẹn bha re ẹwanlẹn ọsi eria re ha wewe ọle, nin uyumhin* nọnsi Kristi hẹi dọ kiẹn ihoho.
18 Ọta uhuki ẹmhọn uyumhin* nọnsi Jesu khin rẹji ẹbho ne ha fuẹn an. Ọkpakinọn, rẹji mhan ne ha miuhọnmhọn, uwedẹ nin Osẹnobulua rẹ re ahu nọnsọle man nọn.
19 Ebenọnkhiale yọle: “Mẹn dẹ re ẹwanlẹn ọsi eria ne wanlan kiẹn ihoho, yẹ he ilẹnmhin ọsi ene lẹn emhin.”
20 Ene wanlan bho? Ene lẹn uhi bho? Ibhokhan ọsi ọne ore* nan ne sabọ gbugan bho? Osẹnobulua re ẹwanlẹn ọsi ọne agbọn nan kiẹn emhin uhuki.
21 Ẹwanlẹn Osẹnobulua rẹman nin ọle bha rẹ ji ọne agbọn nan da sabọ re ẹwanlẹn nọnsele lẹn ọlẹn. Sokpan, ọ da yẹẹ ọle rẹ re uhọnmhunje nin ẹbho riale ghe ẹwanlẹn iye rẹ hinmhin ẹbho ne rẹọbhọ.
22 Ibhokhan Ju guanọ nan lu emhin ọhan-ilo man ele, ibhokhan Grik guanọ nan ta ọta ẹwanlẹn man ele.
23 Ọkpakinọn, ẹmhọn Kristi nan gbe a bhi okhun oran mhan wewe. Rẹji ibhokhan Ju, ọnan da ha yi idobolo, rẹji agbaẹbho nekẹle, ọ da ha yi ọta uhuki.
24 Ọkpakinọn, rẹji ibhokhan Ju bi ibhokhan Grik nan tiele, Kristi hi ahu bi ẹwanlẹn nọnsi Osẹnobulua.
25 Emhin nọn na obọ Osẹnobulua vae, nin ẹbho riale ẹwanlẹn iye, ọle ewanlẹn ye nẹ ọsi eria. Sẹyẹ, emhin nọn na obọ Osẹnobulua vae nin ẹbho riale ghe, ọ wẹghẹ, ọle ziẹn nẹ ahu ọsi eria.
26 Ibhio, bha daghe unan ẹbho nin Osẹnobulua tiele. Bhi ẹlo ọsi eria, ene bunbun bhi ẹwẹ bha iwanlan, ene bunbun bhi ẹwẹ bha iyi okpọria, ene bunbun bhi ẹwẹ bha iyi ene a biẹ bhi ẹkẹ afe bi ua.
27 Osẹnobulua da zẹ emhin nin ẹbho ne ribhi ọne agbọn nan ghe bii emhin uhuki, nin ọle rẹ re ẹkhọle lo ene wanlan. Ọle da zẹ emhin nin ẹbho ne ribhi ọne agbọn nan ghe bii emhin ne wẹghẹ, nin ọle rẹ re ẹkhọle lo emhin ne ziẹnlẹn.
28 Osẹnobulua da yẹ zẹ emhin nin ẹbho ne ribhi ọne agbọn nan ghe bii emhin ne bha sẹ emhin soso, emhin ne iyi ọle, nin ele yẹ re ẹlo gbe a, beji ọle ha da re emhin nin ele ghe bii okpemhin kiẹn ihoho.
29 Bhiriọ, ọria soso ida miẹn ebe ha re ọle ha dẹgbọ bhi odalo Osẹnobulua.
30 Osẹnobulua zẹle nin bha da sabọ kugbe deba Jesu Kristi. Jesu hi ọnọn rẹkpa mhan rẹ lẹn ẹwanlẹn nọnsi Osẹnobulua. Rẹ na obọ Jesu, mhan dẹ sabọ kiẹn eria ne khiale, ne yẹ lu emhin ne gbale. Mhan dẹ yẹ sabọ miẹn umiẹnfan rẹ na obọ izọese nọnsọle.
31 Beji Ebenọnkhiale tale: “Ọnọn hi ki rẹ khin nọn ho nọn dẹgbọ, ji a miẹn ghe Jehova* ọle ha rẹ dẹgbọ.”
Eba gbẹn bho otọle
^ Ọle a yẹ tiọle Pita.
^ Bhi Grik, “oran iloya.” Fẹ Ikpọta Nan Re Otọle Man.
^ Bhi Grik, “oran iloya.” Fẹ Ikpọta Nan Re Otọle Man.
