Kọrint Nin Ọhẹnhẹn 11:1-34
11 Bha re egbe khọkhọ imẹn beji mẹn yẹ rẹ re egbe khọkhọ Kristi.
2 Obọ bha dale nin bha rẹ wo ha ye mẹn re, yẹ ha re obọ rẹkhan ene adia rebhe nin mẹn re nin bha.
3 Ọkpakinọn, mẹn guanọ nin bha lẹn ghe, Kristi hi ebeanlẹn* ọsi okpea; okpea hi ebeanlẹn* ọsi okhuo; Osẹnobulua hi ebeanlẹn* ọsi Kristi.
4 Okpea nọn hi ki rẹ khin nọn re emhin gue uhọnmhọn ha nan erọnmhọn la ha kha akhasẹ, re ẹkhọle lo ebeanlẹn ọlẹn.*
5 Sẹyẹ, ahamiẹn okhuo nan erọnmhọn la kha akhasẹ, nin ọle bha da re emhin gue uhọnmhọn, ọle re ẹkhọle lo ebeanlẹn ọlẹn.* Inian okhuo nọn bha re emhin gue uhọnmhọn diabe okhuo nan gbẹn eto si ọle bhi uhọnmhọn re.
6 Ahamiẹn okhuo bha muegbe nin ọle rẹ re emhin gue uhọnmhọn, nin ọle wo gbẹn eto sibhi uhọnmhọn re. Sokpan, beji a miẹn ghe emhin ẹkhọle nọn nin okhuo rẹ gbẹn eto sibhi uhọnmhọn re, ọkhẹke nin ọle re emhin gue uhọnmhọn.
7 Ọ bha khẹke nin okpea ha re emhin gue uhọnmhọn, uyi bi arẹkhọkhọ nọnsi Osẹnobulua ọle khin. Bhi obọ nọnkẹle, uyi ọsi okpea, ọle okhuo khin.
8 Ọ iyi ẹkẹ okhuo, okpea na dagbare, okhuo na bhi ẹkẹ okpea dagbare.
9 Sẹyẹ, ọ iyi ranmhude okhuo zẹle nan da man okpea, sokpan, ranmhude okpea zẹle nan da man okhuo.
10 Ranmhude ọnan, bi ranmhude ene ẹhi, ọkhẹke nin ọne okhuo re emhin gue uhọnmhọn, nin ọle rẹ rẹman ghe, ọle mhọn ebeanlẹn.
11 Bhi agbotu ọsi Ebeanlẹn mhan, ikpea bi ikhuo mhọn ebi ele re egbe lu.
12 Arẹmiẹn ghe ẹkẹ okpea, okhuo da dagbare, okhuo, ọle biẹ okpea. Ọkpakinọn, obọ Osẹnobulua emhin rebhe na vae.
13 Mẹn guanọ nin bha tobọbha tare: Emhin nọn khẹke be nọn nin okhuo nọn bha re emhin gue uhọnmhọn rẹ ha nan erọnmhọn?
14 Uwedẹ nan rẹ man eria bhọ rẹman bha ghe, emhin ẹkhọle nọn nin okpea rẹ mun eto nọn na.
15 Ọkpakinọn, okhuo ha mun eto nọn na, ọ re ọle mhọn-ose. A re eto nanlẹn rẹ gue uhọnmhọn.
16 Ahamiẹn ọria ho nin ọle ha muan ọne ẹmhọn nan, ebi mhan ha ta bhọ hi ghe, mhan imhọn akerebhotọ ọbhebhe. Agbotu nọnsi Osẹnobulua iyẹ mhọnlẹn.
17 Beji mẹn rẹ ha re ọne adia nan nin bha, mẹn bha gẹn bha hiehie, ranmhude, ikolo nin bha do irẹkpa bha, ọ bhọ riia bha a.
18 Mẹn họn ghe, bha ha sikoko bhi agbotu, bha ilu emhin kugbe, bha ki wa egbe a. Mẹn wo rẹọ bhi ọnan.
19 Iwaegbea dẹ gene ha ribhi ẹwẹ bha, ọkpakinọn, ọnan dẹ rẹman ene lu emhin ne ti Osẹnobulua bhọ.
20 Ọ iyi uwedẹ nọn khẹke bha rẹ le Ebale Emuan ọsi Ebeanlẹn mhan sade ibha sikoko nin bha dọ le ọle.
21 Ọne ẹghe ha sẹ nin bha ha rẹ le ọle, eso ki ka le ebale. Bhiriọ, anyọn ki ha mun eso, ohanmhẹn ki ha gbe enekẹle.
22 Ibha bha yẹ miẹn uwa da ha da yẹ le? La ọ be yẹẹ bha nin bha rẹ re ẹlo gbe agbotu nọnsi Osẹnobulua a, yẹ ha re ẹkhọle lo ẹbho ne imhọnlẹn? Be ibha ki guanọ nin mẹn taman ibha nian, ghe bha lu nọnsẹn? Ibha bha lu nọnsẹn hiehie.
23 Ebi mẹn luẹ bhi obọ Ebeanlẹn mhan, ọle mẹn yẹ man bha le. Bhi ọne ukpasọn nan dọ mun Jesu nin Ebeanlẹn mhan, ọle da re ibrẹd,
24 ọle ki nan erọnmhọn bhọ fo, ọle da khuẹnẹn ọlẹn an yẹ yole: “Ọnan mundia nin egbe nọnsẹmhẹn, nan ha rẹ zọese nin bha. Bha ha lu ọnan, nin bha rẹ ha ye mẹn re.”
25 Iriọ ọle yẹ lu rẹji ọne ukpu anyọn, ẹghe nin ele rẹ le ebale emuan fo. Ọle da yọle: “Ọne ukpu anyọn nan mundia nin akovẹn ọsọgbọn nan re aranlẹn nọnsẹmhẹn ve. Bha wo ha lu ọnan, bha yẹ ha ye mẹn re bhi ẹghe nọn hi ki rẹ khin nin bha rẹ wọn ọlẹn.”
26 Ẹghe rebhe nin bha rẹ le bhi ọne ibrẹd nan yẹ wọn bhi ọne anyọn nan, bha wo ha wewe ẹmhọn uyumhin nọnsi Ebeanlẹn mhan, rẹ dọ sẹbhi ẹghe nin ọle ha rẹ vae.
27 Bhiriọ, ọria nọn hi ki rẹ khin nọn le bhi ibrẹd, la da bhi anyọn ọsi Ebeanlẹn mhan bhi idia nọn bha khẹke, ki kiẹn ọria nọn lu olukhọ da egbe bi aranlẹn nọnsi Ebeanlẹn mhan.
28 Bhiriọ, ọkhẹke nin ọria ka fẹ egbe nọnsọle ghe nọnsẹn, ọle kuẹ le bhi ọne ibrẹd yẹ da bhi ọne anyọn.
29 Ahamiẹn ọria bha lẹn ebi ọne egbe mundia nan, nin ọle da le bhi ọne ibrẹd yẹ da bhi ọne anyọn, ọle tobọle tie ibhuohiẹn nọnsi Osẹnobulua ọbhi egbe.
30 Ọnan zẹle nin ene bunbun bhi ẹwẹ bha da kpẹwẹ a, nin bha da yẹ khọnmhọn. Eso bhi ẹwẹ bha bhọ yu.*
31 Ọkpakinọn, ahamiẹn ghe imhan fẹ egbe nọnsẹmhan ghe nọnsẹn, mhan ida miẹn ibhuohiẹn bhi egbe.
32 Jehova* bhọ ha rẹ bhuohiẹn gbe imhan, adia ọle re ọle re nin mhan, beji a ha da miẹn a bha fuẹn mhan an ba ọne agbọn nan.
33 Bhiriọ, ibhio mẹn, bha ha vae dọ le ebale emuan ọsi Ebeanlẹn mhan, bha mundia khẹ egbe.
34 Ahamiẹn ọne ohanmhẹn gbe ribhi ẹwẹ bha, ji ọle le ebale bhi uwa, beji a ha da miẹn a bha bhuohiẹn gbe bha bhi ẹghe nin bha ha rẹ sikoko. Mẹn dẹ talọ ọbhi ene ẹmhọn nekẹle sade mẹn vae.
Eba gbẹn bho otọle
^ Bhi Grik, “uhọnmhọn.”
^ Bhi Grik, “uhọnmhọn.”
^ Bhi Grik, “uhọnmhọn.”
^ Bhi Grik, “uhọnmhọn ọlẹn.”
^ Bhi Grik, “uhọnmhọn ọlẹn.”
^ Ebi ikolu nin ele bi Osẹnobulua ko mhọnlẹn dia yẹ, ọle Pọl ha tẹmhọnlẹn.
