Kọrint Nin Ọhẹnhẹn 12:1-31
12 Ibhio, mẹn guanọ nin bha lẹn otọ ọne ẹsele nin ẹlinmhin nọn khiale re nin mhan.
2 Bha lẹnmhin ghe, ọkuẹsẹ bha dọ lẹn Osẹnobulua, bha da ji ẹbọ ne italọ da ha dia bha yẹ ha hiẹ bha. Bha da ha rẹkhan ele.
3 Ejayenan nian, mẹn guanọ nin bha lẹn ghe, ọria soso iribhọ nin ẹlinmhin nọn khiale ha noo rẹ yọle: “Ọria nan fi ọle unun Jesu khin!” Sẹyẹ ọria soso iribhọ nọn ha yọle: “Jesu hi Ebeanlẹn mhan!” sade ẹlinmhin nọn khiale bha noo ọle rẹ tale.
4 Ẹsele kẹkẹ Osẹnobulua rẹ nin mhan, sokpan ẹlinmhin ọkpa ọle rẹ re ọle nin mhan.
5 Sẹyẹ, iwẹnna oga kẹkẹ, ele ribhọ, sokpan, Ebeanlẹn ọkpa mhan wẹnna nan.
6 Ẹsọn kẹkẹ, ọle ribhọ. Ọrẹyiriọ, Osẹnobulua hi ọnọn re ahu nin ọrebhe rẹ ha miẹn ene ẹsọn nan.
7 Ọne ẹlinmhin nọn khiale rẹkpa ọdeọde rẹ miẹn ẹsọn nọn khẹke ọle, beji ọ ha da mhẹn nin ọrebhe.
8 Ọne ẹlinmhin nan rẹkpa ọria rẹ ha re ẹwanlẹn talọ, sẹyẹ, ọne ẹlinmhin ki rẹkpa ọria ọbhebhe rẹ ha re ilẹnmhin talọ.
9 Ọne ẹlinmhin nọn rẹkpa ọria rẹ ha mhọn urẹọbhọ, ọle yẹ rẹkpa ọria ọbhebhe rẹ ha re egbe daan ẹbho.
10 Ọle yẹ rẹkpa ọria ọbhebhe rẹ ha lu iwẹnna ọhan-ilo, ọle yẹ rẹkpa ọria ọbhebhe rẹ ha kha akhasẹ, ọle yẹ rẹkpa ọria ọbhebhe rẹ sabọ ha lẹn otọ uhọnmhunje nọn na obọ Osẹnobulua vae, ọle yẹ rẹkpa ọria ọbhebhe rẹ sabọ ha zẹ urolo kẹkẹ, ọle yẹ rẹkpa ọria ọbhebhe rẹ sabọ ha zedu ebi a tale bhi ene urolo nan.
11 Ọne ẹlinmhin ọkpa nan, ọle re ahu nin ẹbho rẹ lu ene emhin nan kẹkẹ, ọne ẹlinmhin ki re ahu nan rẹ lu ene emhin nan nin ọdeọde, beji ọ rẹ ghọn ọlẹn.
12 Ije kẹkẹ, ọle ribhi egbe ọsi ọria. Arẹmiẹn ghe ene ije kẹkẹ bhi egbe bun, egbe ọkpa yẹ nọn. Inian egbe nọnsi Kristi yẹ dia.
13 Ẹlinmhin nọn khiale a rẹ gbe mhan rebhe ruẹ, beji mhan ha da kiẹn egbe ọkpa. Aharẹmiẹn obhokhan Ju mhan khin la obhokhan Grik, ọne ẹlinmhin nan a re nin mhan. Sẹyẹ, aharẹmiẹn igbọn mhan khin la ọria nan fan fia, ọne ẹlinmhin nan a yẹ re nin mhan.
14 Bhi ọsi ẹmhọanta, ọ iyi ijanlẹn ọkpa ribhi egbe, ije kẹkẹ ọle ribhọ.
15 Ahamiẹn ghe, oẹ yọle: “Ranmhude mẹn iyi obọ, mẹn bha deba ọne egbe,” ọnin bha rẹman ghe, ọle bha gene deba ọne egbe.
16 Ahamiẹn ghe, ehọ yọle: “Ranmhude mẹn iyi ẹlo, mẹn bha deba ọne egbe,” ọnin bha rẹman ghe ọle bha deba ọne egbe.
17 Ahamiẹn ghe ẹlo ọkpa ribhi egbe, be ọria ha ki rẹ ha hẹnmhọn? Sẹyẹ ahamiẹn ghe, ehọ ọkpa ribhi egbe, be ọria ha ki rẹ ha yaa emhin?
18 Ọkpakinọn, Osẹnobulua da mhanmhan ije kẹkẹ ọbhi egbe nọnsẹmhan beji ọ rẹ yẹẹ ọle.
19 Sade emhin ọkpa ribhi egbe rebhe, be egbe nọnsẹmhan ha rẹ dia yẹ?
20 Ọkpakinọn, ije kẹkẹ, ọle ribhi egbe, sokpan egbe ọkpa ọle ribhọ.
21 Ẹlo ida sabọ taman obọ yọle: “Mẹn imhọn ebi mẹn re uwẹ lu,” sẹyẹ, uhọnmhọn ida sabọ taman oẹ yọle: “Mẹn imhọn ebi mẹn re uwẹ lu.”
22 Bhi ọsi ẹmhọanta, ije eso bhi egbe nọn diabe ebe wẹghẹ mhọn ebi a re ọle lu.
23 Eji mhan riale ọ bha manman mhọn-ose bhi egbe nọnsẹmhan, ọle mhan ho ọle ose nẹ. Bhiriọ, eje bha manman mhọn-ose bhi egbe nọnsẹmhan ki dọ manman ha mhọn-ose.
24 Ọkpakinọn, eje ka mhọn-ose bhi egbe nọnsẹmhan, mhan ikpokpo egbe ba ọle. Osẹnobulua mhanmhan egbe nọnsẹmhan bhi uwedẹ nan ha da miẹn ghe, eje bha mhọn-ose, a ki mun ekpẹn ọle bhi egbe.
25 Ọle da lu ọnan beji a da miẹn ghe, ozughu ida ha ribhi egbe. Bhiriọ, ọkhẹke nin ije kẹkẹ bhi egbe ji ẹmhọn ibo ele da rẹtẹ ele.
26 Ahamiẹn obọ ọkpa bhi egbe ribhi ọbalọ, ije nekẹle bhi egbe ki yẹ ha ribhi ọbalọ. A ha mun ekpẹn nin obọ ọkpa bhi egbe, ije nekẹle ki deba ọle ha ghọnghọn.
27 Ibha hi egbe ọsi Kristi. Sẹyẹ, ọne egbe ọdeọde bhi ẹwẹ bha ye.
28 Osẹnobulua mun ẹsọn kẹkẹ nin ọdeọde bhi ẹkẹ agbotu: eso etuegbe; eso akhasẹ; eso ene man emhin; eso ene lu iwẹnna ọhan-ilo; eso ene re egbe daan ẹbho; eso ene re iyobọ nin ẹbho; eso ene dia ẹbho; eso ene zẹ urolo kẹkẹ.
29 Ọ iyi ele rebhe hi etuegbe. Ọ iyi ele rebhe hi akhasẹ. Ọ iyi ele rebhe man emhin. Ọ iyi ele rebhe lu emhin ọhan-ilo.
30 Ọ iyi ele rebhe re egbe daan ẹbho. Ọ iyi ele rebhe zẹ urolo kẹkẹ. Ọ iyi ele rebhe zedu ebi a tẹmhọnlẹn bhi ene urolo kẹkẹ nan.
31 Ọkpakinọn, bha wo ha khu ọbhọ, nin ọne ẹsele nọn lu uhọnmhọn-emhin nẹ da sẹ bha obọ. Ejayenan nian, mẹn dẹ re ọne uwedẹ nọn lu uhọnmhọn-emhin nẹ man bha.
