Kọrint Nin Ọhẹnhẹn 14:1-40
14 Rẹ gbera emhin rebhe, bha khu ọbhi oyẹe. Sokpan, bha yẹ khu ọbhi ẹsele nin ẹlinmhin nọn khiale re nin ọria, manman nọn, ẹsele nan rẹ kha akhasẹ.
2 Ọria nọn zẹ urolo kẹkẹ, Osẹnobulua ọle ne talọ ọ iyi eria, ranmhude, ọria soso bha lẹn ebi ọle ta. Ọta ẹkhokho nin ẹlinmhin nọn khiale rẹkpa ọle rẹ ta, ọle ọle ta dagbare.
3 Bhi obọ nọnkẹle, ọria nọn kha akhasẹ re ọta nin ọle ta rẹ bọn ẹbho okhun, ọle re izebhudu nin ẹbho yẹ ko ele udu re.
4 Ọria nọn zẹ urolo kẹkẹ, egbe ọle ọle bọn okhun, ọkpakinọn, ọria nọn kha akhasẹ agbotu ọle bọn okhun.
5 Ọ ha rẹ yẹẹ mẹn nin bha rebhe rẹ ha mhọn ẹsele nan rẹ zẹ urolo kẹkẹ. Ọkpakinọn, ọ dẹ yẹẹ mẹn nẹ, sade ibha kha akhasẹ. Bhi ọsi ẹmhọanta, ọria nọn kha akhasẹ, ọle nẹ ọria nọn zẹ urolo kẹkẹ nọn bha sabọ zedu ebi ọle ta rẹ ziẹn urẹọbhọ ọsi ene ribhi ọne agbotu.
6 Ibhio, mẹn ha vae dọ ha zẹ urolo kẹkẹ man bha, ibha ida miẹn elele bhọ. Ọkpakinọn, ibha dẹ miẹn elele sade mẹn taman ibha ebi mẹn miẹn bhi imianlo, sade mẹn taman ibha ilẹnmhin nọnsi Osẹnobulua, sade mẹn ta ọta akhasẹ man bha, la sade mẹn man bha emhin.
7 Iriọ yẹ nọn rẹji emhin nan khue bọsi ufele bi afan.* Ahamiẹn a bha khue ọne ufele la afan nọnsẹn, be ọria nọn kaehọ ha rẹ lẹn illo nan khue bhọ yẹ.
8 Ahamiẹn ọria nọn khue akala bha khue ọle nọnsẹn,* ọria soso dẹ be muegbe okhọnlẹn?
9 Iriọ yẹ nọn, ahamiẹn uwẹ bha zẹ urolo nin ẹbho ha sabọ lẹn otọle, ẹbho ida lẹn ebi uwẹ ta. Bhi ọsi ẹmhọanta, uwẹ ki wo diabe ọria nọn gheghe nyanangban.
10 Urolo kẹkẹ, ọle a zẹ bhi ọne agbọn nan, sẹyẹ, ẹbho sabọ lẹn otọle.
11 Ahamiẹn mẹn ihọn ọne urolo, mẹn ki kiẹn ọriọbhe rẹji ọria nọn talọ. Sẹyẹ, ọne ọria nọn talọ ki kiẹn ọriọbhe rẹji mẹn.
12 Iriọ ọ yẹ dia rẹji bha. Beji a miẹn bha wo ha khu ọbhi ẹsele nin ẹlinmhin nọn khiale re nin ọria, bha ha khu ọbhi ẹsele ne ha ziẹn urẹọbhọ ọsi ene ribhi agbotu.
13 Bhiriọ, ọkhẹke nin ọria nọn zẹ urolo kẹkẹ ha bhii Osẹnobulua nọn rẹkpa ọle rẹ sabọ ha zedu ebi ọle tẹmhọnlẹn.
14 Ahamiẹn mẹn re urolo kẹkẹ rẹ nan erọnmhọn, ẹsele nin ẹlinmhin nọn khiale re nin mẹn, ọle nan erọnmhọn. Ọkhọle nọnsẹmhẹn bha lu emhin soso.
15 Be ọ ki khẹke nin mẹn lu yẹ nian? Mẹn dẹ re ẹsele nin ẹlinmhin nọn khiale re nin mẹn rẹ nan erọnmhọn, yẹ re ọkhọle nọnsẹmhẹn rẹ nan erọnmhọn. Mẹn dẹ re ẹsele nin ẹlinmhin nọn khiale re nin mẹn rẹ so illo, yẹ re ọkhọle nọnsẹmhẹn rẹ so illo.
16 Ahamiẹn ẹsele nin ẹlinmhin nọn khiale re nin uwẹ, ọle uwẹ rẹ ha gẹn Osẹnobulua, be ọria khọnkhan nọn ribhi ẹwẹ bha ha rẹ gbe “Isẹ” ọbhọ yẹ, beji a miẹn ghe, ọle bha lẹn ebi uwẹ ta?
17 Ẹmhọanta nọn ghe, uwedẹ nọn mhẹn uwẹ rẹ ha re ekhuẹnmhẹn ji Osẹnobulua, ọkpakinọn, ebi uwẹ lu bha sabọ ziẹn urẹọbhọ ọsi ọria nọn ribhi ẹwẹ bha.
18 Osẹnobulua obulu ghe urolo nin mẹn zẹ, ọle bun nẹ ọsẹbha rebhe.
19 Ọrẹyiriọ, imẹn ha noo ikpọta isẹn nin ẹbho ha sabọ lẹn otọle rẹ man emhin bhi ẹkẹ agbotu, ọle ha yẹẹ mẹn nẹ nin mẹn rẹ re urolo nin ẹbho bha lẹn otọle rẹ ta ikpọta uli igbe.*
20 Ibhio, bha hẹi ha ria eria bii ibhokhan. Bha ha ria eria bii ọwanlẹn. Ọkpakinọn, bha diabe ibhokhan ne bha lẹn ọkpa lẹn eva rẹji emhin ebe.
21 A gbẹn ọlẹn bhi Uhi yọle: “Jehova* da yọle, imẹn dẹ noo ẹbho ne zẹ urolo kẹkẹ bi eriọbhe rẹ ne ene ẹbho nan talọ. Ọ ha rẹ ha yi iriọ, ele ida ka mẹn ehọ.”
22 Beji ẹbho ne iga Osẹnobulua ha da sabọ rẹọbhi Osẹnobulua, ọle zẹle nan da zẹ urolo kẹkẹ, ọ iyi nan rẹ man ẹbho ne ga Osẹnobulua emhin. Bhi obọ nọnkẹle, nan rẹ man ene ga Osẹnobulua emhin, ọle zẹle nan da ta ọta akhasẹ, ọ iyi ranmhude ene iga Osẹnobulua.
23 Ahamiẹn ghe ọrebhe bhi ẹkẹ agbotu munhẹn ha zẹ urolo kẹkẹ bhi eji bha da sikoko, eria khọnkhan la ẹbho ne iga Osẹnobulua ha vae bhi ẹwẹ bha, ele dẹ yọle ghe emhẹnmhẹn bha ye.
24 Ọkpakinọn, ahamiẹn ghe, ibha rebhe kha akhasẹ, nin ọria khọnkhan la ọria nọn iga Osẹnobulua da vae bhi ẹwẹ bha, ebi ọle họnlẹn ki dia ọle yẹ rẹkpa ọle fẹ egbe ọle ghe nọnsẹn.
25 Ẹghenin, ebe ri ọle bhi ọkhọle ki zegbere, sẹyẹ, ọle ki ne iguẹ sotọ ha ga Osẹnobulua. Ọle ki ha yọle: “Osẹnobulua gene ribhi ẹwẹ bha.”
26 Ibhio mẹn, be ọkhẹke nin bha lu yẹ? Ahamiẹn ibha sikoko, otuọnkpa bhi ẹwẹ bha ki so illo, ọnọnkẹle ki ha man emhin, ọnọnkẹle ki ta ọta imianlo, ọnọnkẹle ki ha zẹ urolo, ọnọnkẹle ki ha zedu ọle. Bha ji emhin rebhe nin bha lu ziẹn urẹọbhọ ọsi ọne agbotu.
27 Ahamiẹn ghe bha ho nin bha zẹ urolo ọbhebhe, nọn hẹi gbera itue eva la itue ea ne ha lu iriọ. Sẹyẹ, ọkhẹke nin ele lu ọle ọsegbe-ọsegbe. Ọ yẹ khẹke nin ọria zedu ebi ele ta.
28 Ahamiẹn ọria iribhi ẹkẹ ọne agbotu nọn ha zedu ebi ọle ta, nin ọle hẹi talọ, nin ọle fẹkẹ ha ne egbe ọle bi Osẹnobulua talọ.
29 Akhasẹ eva la ea sabọ rẹ talọ, enekẹle ha guanọ otọ ebi ele tẹmhọnlẹn.
30 Ọkpakinọn, ahamiẹn ọria ọbhebhe miẹn imianlo bhi eji ọle da dotua, ji ọria nọn ka ha talọ nyangbe fo.
31 Ọsegbe-ọsegbe bha ha rẹ ha kha akhasẹ, beji bha rebhe ha da miẹn emhin luẹ bhọ, yẹ sabọ ziẹn urẹọbhọ nọnsẹbha.
32 Ọkhẹke nin ene akhasẹ ha noo ẹsele nin ẹlinmhin nọn khiale re nin ele nọnsẹn.
33 Osẹnobulua iyi Osẹ ọsi ozughu, Osẹ ọsi ọfure ọle khin.
Beji ọ khin bhi agbotu ọsi ene khiale,
34 ji ene ikhuo nyangbe bhi ẹkẹ agbotu, ranmhude, a bha re otọ nin ele rẹ ha talọ. Ọkpakinọn ji ele ha mhọn idegbere beji Uhi nọnsi Osẹnobulua tale.
35 Ahamiẹn ele mhọn ọta nin ele ho nin ele nọọn, ji ele nọọn ọdọ ele bhi uwa, ranmhude, emhin ẹkhọle nọn nin okhuo re ha talọ bhi ẹkẹ agbotu.
36 Obọ ibha ọta nọnsi Osẹnobulua be na vae? La ibha ọkpa a be ta ọta nọnsi Osẹnobulua man?
37 Ọria nọn hi ki rẹ khin nọn riale ghe akhasẹ ọle khin, la ọle mhọn ẹsele nin ẹlinmhin nọn khiale re nin ọria, ọkhẹke nin ọle lẹn sẹbhọ ghe, obọ Ebeanlẹn mhan ọne uhi nan nin mẹn gbẹn ji bha na vae.
38 Ahamiẹn ghe ọria re ẹlo gbe ọne ẹmhọn nan, a ki re ẹlo gbe ọle a.*
39 Bhiriọ ibhio mẹn, bha ha khu ọbhọ nin bha rẹ ha kha akhasẹ. Ọ ha rẹ ha yi iriọ, bha hẹi rẹban urolo kẹkẹ nan zẹ.
40 Ọkpakinọn, bha ha lu emhin rẹkhan emhanmhan bhi emhin rebhe nin bha lu, bha ha yẹ ha re ekpẹn lu emhin.
Eba gbẹn bho otọle
^ Ebi a rẹ khue illo, nin ebo tiọle hap.
^ Bhi Grik, “bha khue ọle nọn khiakhia bhi ehọ.”
^ 10,000
^ Ọ sabọ ha yi, “ahamiẹn ọria yọle ghe ọle bha ho nin ọle lẹn ọnan, ọle ida lẹn ọlẹn ghee.”
