Kọrint Nin Ọhẹnhẹn 16:1-24
16 Bha re obọ rẹkhan adia nin mẹn re nin agbotu nọn ribhi Galesha sade bha koko igho nan ha rẹ re iyobọ nin ene khiale.
2 Bhi ukpẹdẹ ọhẹnhẹn bhi uzana, ọkhẹke nin ọdeọde bhi ẹwẹ bha ha re emhin ọbhi otọ, beji ọle mhọn sẹ, na hẹi dọ miẹn ghe mẹn ha ki vae fo ibha kuẹ dọ ha koko ọle.
3 Mẹn ha vae, mẹn dẹ je ene ikpea nin bha tẹmhọnlẹn bhi ebe nin bha gbẹn ji mẹn, nin ele mun emhin nin bha koko ji ene ribhi Jerusalẹm.
4 Ọkpakinọn, ahamiẹn ghe ọkhẹke nin mẹn rẹkhan ele ha khian, mhan ki ko ha khian.
5 Mẹn dẹ ka sẹbhi Masẹdonia mẹn kuẹ bu ibha re, ranmhude, enin mẹn ha na.
6 Asabọmiẹn mẹn dẹ deba bha gbe ẹghe eso. A bhọ sabọ miẹn mẹn dẹ deba bha gbe ẹghe ulinlin, beji bha ha da sabọ hoho* imẹn sẹbhi odẹ sade mẹn ki khian eji mẹn khian.
7 Mẹn bha guanọ nin mẹn gheghe mundia bhi odẹ tuẹ bha nian, ranmhude, bhi ahu nọnsi Jehova,* mẹn dẹ vae nin mẹn dọ deba bha gbe ẹghe.
8 Ẹfẹsọs mẹn da ha ye rẹ sẹbhi ẹghe nan ha rẹ lu Iluemhin Ọsi Pẹntikọst,
9 ranmhude, mẹn wo miẹn isẹhoa bhi enan rẹ manman lu iwẹnna oga. Ọkpakinọn, ẹbho ne bunbun ne imẹn suan.
10 Timoti ha bu ibha re, bha wo miẹn ọlẹn bhi egbe nọnsẹn, beji a ha da miẹn ọle bha kpokpo egbe ba ẹmhọn emhin soso beji ọle rẹ ribhi ẹwẹ bha. Iwẹnna nọnsi Jehova* ọle yẹ lu beji mẹn rẹ lu ọle.
11 Bhiriọ, ibha soso hẹi re ẹlo gbe ọle a. Bha je ọle bu mẹn re egbehẹnẹdẹ, ranmhude, imẹn bi ene ibhio mhan nekẹle khẹ ọle.
12 Mẹn rẹ wo taman obhio mhan nin Apọlọs nin ọle rẹkhan ene ibhio mhan nekẹle bu bha re. Ọkpakinọn, ọle bha sẹ muegbe nin ọle rẹ vae nian. Ọle dẹ bu bha re sade ọle miotọ.
13 Bha ha babegbe, bha mun urẹọbhọ nọnsẹbha mhọn nọnsẹn, bha ha mhọn izebhudu, bha ha yẹ wo deziẹn.
14 Bha re oyẹẹ rẹ ha lu emhin rebhe.
15 Ibhio, bha lẹnmhin ghe azagba-uwa ọsi Stẹfanas hi eria ọhẹnhẹn ne dọ ha rẹkhan Kristi bhi agbaẹbho ọsi Akea. Sẹyẹ, ele da wo manman ha wẹnna kaka rẹ rẹkpa ene khiale.
16 Bhiriọ, mẹn taman ibha nin bha ha hẹnmhọn nin eria ne sẹ iriọ, bi ọrebhe ne wo kuobọgbe yẹ deba ele ha wẹnna kaka.
17 Ọ wo re imẹn ghọnghọn ghe, Stẹfanas, Fọtunatọs, bi Akeakọs ribhi enan. Ele ene ki ha rẹkpa mẹn beji a miẹn ibha iribhi enan.
18 Ele wo rẹkpa mẹn, yẹ rẹkpa bha. Bha ha mun ekpẹn nin ikpea ne sẹ iriọ.
19 Ibhio mhan ne ribhi agbotu ne ribhi otọ Esia je otuẹ ibha. Akuila bi Priska bi agbotu nọn ribhi uwa nọnsele yẹ re ọkhọle rebhe je otuẹ ibha nin ibhio ele bhi oga.
20 Ibhio mhan rebhe je otuẹ ibha. Bha tuẹ ọdeọde mun egbe nọnsẹn.*
21 Imẹn nin Pọl je otuẹ ibha. Imẹn re obọ mẹn gbẹn ọlẹn.
22 Ọria nọn ki rẹ khin nọn bha hoẹmhọn Ebeanlẹn mhan, ọria nan fi ọle unun ọle khin. Ebeanlẹn mhan, huẹan, vae!
23 Mẹn bhii nin Jesu nin Ebeanlẹn mhan manman mhọn ifuẹkẹ da bha.
24 Mẹn hoẹmhọn bha rebhe nin edibo nesi Jesu Kristi.
Eba gbẹn bho otọle
^ La “hehe.”
^ Bhi Grik, “re unun fiofio egbe bhi uwedẹ nọn khiale.” Inian edibo nesi Jesu rẹ ha tuẹ egbe bhi ẹghe ẹdẹlẹ.
