Kọrint Nin Ọhẹnhẹn 2:1-16
2 Bhiriọ ibhio, ẹghe nin mẹn rẹ dọ ta ọta ẹkhokho nọnsi Osẹnobulua man bha, mẹn bha ha noo ikpọta nin ibha ida lẹn otọle, mẹn bha ha re ewanlẹn nọnsẹmhẹn man.
2 Ẹmhọn Jesu Kristi bi ebi a rẹ gbe ọle a yẹ bhi okhun oran, ọle ọkpa mẹn zẹ nin mẹn rẹ taman ibha.
3 Ẹghe nin mẹn rẹ bu bha re, mẹn wo wẹghẹ a, ofẹn da yẹ wo manman ha mun mẹn.
4 Ọ iyi ọta elẹlẹ bi ọta nọn ha re ẹwanlẹn nọnsẹmhẹn man, mẹn rẹ ha tẹmhọn Osẹnobulua man bha. Ọta nin mẹn ta da re ahu ọsi ẹlinmhin nọn khiale man,
5 beji bha ha da rẹọ bhi ahu nọnsi Osẹnobulua, ọ iyi ẹwanlẹn ọsi eria.
6 Bhi ẹwẹ eria ne manman lẹn ẹmhọn Osẹnobulua, ọle mhan da ta ọta ẹwanlẹn, sokpan, ọ iyi ọta ẹwanlẹn ọsi ọne agbọn* nan mhan ta, la ẹwanlẹn ọsi ene gbẹloghe ọne agbọn nan, ne ha kẹ fuẹn an.
7 Ọkpakinọn, ọta ẹkhokho, ọle mhan rẹ ta ọta ẹwanlẹn nọnsi Osẹnobulua, ẹwanlẹn nin ọle re nẹhe. Ọ buele nin Osẹnobulua mhanmhan ọne ọta ẹkhokho nan ọbhi otọ, beji ọ ha da re uyi nin mhan.
8 Ene gbẹloghe ọne agbọn nan soso bha lẹn ọne ẹwanlẹn nan. Sade ele lẹn ọlẹn nọn, ele irẹ gbe Jesu nin Ebeanlẹn mhan an.
9 Beji Ebenọnkhiale tale: “Ọria soso bha sẹ re ẹlo daghe emhin nin Osẹnobulua mhanmhan nin ene ọle hoẹmhọnlẹn, a bha sẹ miẹn ọria nọn re ehọ họn, la nọn re ọkhọle ria ẹmhọn ọlẹn.”
10 Osẹnobulua da noo ẹlinmhin nọnsọle rẹ re ene emhin nan man mhan. Ọne ẹlinmhin lẹn emhin rebhe, rẹ dọ sẹbhi ilẹnmhin ne dinmhin nesi Osẹnobulua.
11 Ọria be ribhọ nọn lẹn ebe ri ọria ọbhebhe bhi ọkhọle gbera ọne ọria tobọle? Eye. Iriọ yẹ nọn, ọria soso iribhọ nọn lẹn ebi Osẹnobulua mhọn bhi ọkhọle gbera ẹlinmhin nọnsi Osẹnobulua.
12 Ẹlinmhin ọsi Osẹnobulua dia mhan, ọ iyi ẹlinmhin ọsi ọne agbọn nan. Ọne ẹlinmhin rẹkpa mhan rẹ lẹn ene emhin nin Osẹnobulua rẹ lu ẹsele nin mhan.
13 Mhan yẹ tẹmhọn ene emhin nan, ọkpakinọn, o iyi ẹwanlẹn ọsi eria mhan rẹ re otọle man. Ẹlinmhin nọnsi Osẹnobulua mhan rẹ re otọ ẹmhọn Osẹnobulua man.
14 Ẹlinmhin nọnsi Osẹnobulua ha zẹ emhin egbe dagbare, ọria nọn ria eria beji ọne agbọn nan rẹ ria eria ida ka miẹn ọlẹn bhi egbe. Ọle ki ha ghe ene emhin nan bii emhin uhuki. Ọle ida sabọ lẹn otọle, ranmhude, ẹlinmhin nọnsi Osẹnobulua, ọle rẹkpa ọria rẹ lẹn otọ ene emhin nan.
15 Bhi obọ nọnkẹle, ọria nin ẹlinmhin nọnsi Osẹnobulua dia lẹn otọ emhin rebhe, ọkpakinọn, ọria soso isabọ lẹn otọ uwedẹ nin ọle rẹ lu emhin.
16 Ebenọnkhiale da yọle: “Họla lẹn ebe ri Jehova* bhi ọkhọle, beji ọle ha da sabọ re adia nanlẹn?” Ọkpakinọn, mhan lẹn uwedẹ nin Kristi rẹ ria eria.
