Kọrint Nin Ọhẹnhẹn 4:1-21
4 Ọkhẹke nan ha ghe mhan bii eguọmhandia nesi Kristi, nan mun ọta ẹkhokho nọnsi Osẹnobulua ele bhi obọ.
2 Ebi a guanọ bhi obọ eguọmhandia ne sẹ inian, ọle hi nin ele rẹ ha yi eria nan gbaẹkẹ ọle.
3 Ọ iyi emhin soso bhi ẹlo mẹn sade eria la ikotu nọn hi ki rẹ khin tie mẹn ọria ọbe. Imẹn tobọmẹn bhọ ibhuohiẹn egbe imẹn.
4 Mẹn bhọ bha riale emhin ebe ribhọ nin mẹn lu. Ọnan bha ki rẹman ghe, ọria nọn khiale mẹn khin. Jehova* hi ọnọn ha bhuohiẹn imẹn.
5 Bhiriọ, bha hẹi bhuohiẹn ọria soso ọkuẹsẹ ọne ẹghe nin Ebeanlẹn mhan ha rẹ vae dọ bhuohiẹn. Ọle dẹ re ẹfua bhi emhin rebhe yẹ zọ emhin ebe nin ẹbho lu bhi ẹkhokho egbe dagbare. Ọle ki rẹman ebe ribhi ọkhọle ọsi ọdeọde. Ẹghenin, Osẹnobulua ki re ihaosa nọn khẹke nin ọdeọde.
6 Ibhio, mẹn da ta ene ẹmhọn nan ji egbe mẹn bi Apọlọs, beji ọ ha da rẹkpa bha lẹn ebi mhan temhọnlẹn. Bhiriọ, rẹ na obọ mhan, bha ki sabọ re obọ rẹkhan ọne adia nan nọn yọle: “Hẹi re obọ gbera ebi a gbẹn ọbhi Ebenọnkhiale.” Ahamiẹn bha re obọ rẹkhan ọne adia nan, bha ida ha tẹngbemun, la nin bha ha lu ẹbho eso nọnsẹn gbera ẹbho nekẹle.
7 Be re uwẹ riale ghe uwẹ mhẹn gbera ẹbho nekẹle? Bhi ọsi ẹmhọanta, be uwẹ mhọnlẹn nan bha re nin uwẹ? Beji a miẹn ghe Osẹnobulua re nin uwẹ, bezẹle nin uwẹ da dẹgbọ bọsi ghe, ahu ẹ gbe ọle?
8 Bha be ha riale ghe ibha mhọn emhin rebhe fo? Ibha be ha riale ghe ibha fe fo? La bha ki be zẹ mhan obọ dọ munhẹn ha gbẹloghe bọsi ojie fo? Ọ ha rẹ ha mhẹn sade bha munhẹn ha gbẹloghe bọsi ojie, beji mhan ha da yẹ deba bha ha gbẹloghe.
9 Ọ diabe ghe, mhan kiẹn silima rẹji ọne agbọn nan, eria bi ẹhi. Osẹnobulua ji imẹn bi etuegbe nekẹle da ha yi eria nan ne dagbare kike bhi esẹ nan ha gbono a.
10 Ẹbho ghe mhan bii uhuki ranmhude Kristi. Ọkpakinọn, bha riale ghe edibo nesi Kristi ne mhọn ẹwanlẹn bha khin. Mhan diabe eria ne wẹghẹ, ọkpakinọn, bha diabe eria ne wolo. A mun ekpẹn nin bha, ọkpakinọn, a re ẹlo gbe mhan an.
11 Rẹ sẹbhi ọne ẹghe nan, mhan bha miẹn ebale le, mhan bha miẹn amẹn wọn, mhan bha miẹn ukpọn-agbọn yọ,* a wo ha gbe mhan, mhan bha miẹn uwa dia,
12 mhan wo re obọ nọnsẹmhan ha miẹnsọn nọn kaka. Ọria ha ghunmhun mhan, mhan ki nan erọnmhọn nanlẹn. Ọria ha kpokpo mhan, mhan ki ziẹngbe.
13 Ọria ha re unun riia mhan an, mhan ki re ekpẹn-ekpẹn wanniẹn ọlẹn. Rẹ dọ sẹbhi ọne ẹghe nan, ẹbho ne ribhi ọne agbọn nan wo ha ghe mhan bii iku bi eyaya.
14 Ọ iyi nin mẹn rẹ re ẹkhọle lo bha zẹle nin mẹn da gbẹn ene ẹmhọn nan ji bha. Nin mẹn rẹ re adia nin bha bọsi imọn nin mẹn hoẹmhọnlẹn, ọle zẹle nin mẹn da gbẹn ọlẹn.
15 Aharẹmiẹn bha mhọn itue uli igbe* ne dia bha bhi oga, bha imhọn aba ne bunbun. Mẹn hi aba ibha, ranmhude, imẹn hi ọnọn ta ọne ọta nọn mhẹn man bha, yẹ ha man bha ebi bha ha rẹ rẹkhan Kristi yẹ.
16 Bhiriọ, mẹn bhii bha nin bha re egbe khọkhọ mẹn,
17 Ọnan zẹle nin mẹn ha da ji Timoti bu bha re. Ọmọn nọnsẹmhẹn ọle khin bhi oga. Mẹn wo hoẹmhọn ọlẹn yẹ gbaẹkẹ ọle. Ọle dẹ rẹkpa bha rẹ yere uwedẹ nin mẹn rẹ ha miẹnsọn nọnsi Jesu Kristi. Ọle dẹ yẹ rẹkpa bha rẹ yere ene emhin nin mẹn man bhi agbotu nekẹle rebhe.
18 Eso bhi ẹwẹ bha wo ha tẹngbemun, ele riale ghe imẹn ida vae bhi eji bha ye.
19 Ọ ha yi iho nọnsi Jehova,* mẹn dẹ kẹ bu bha re. Ọ iyi nin mẹn rẹ dọ kaehọ ọta nin ene eria nan ne tẹngbemun ta, ọkpakinọn nin mẹn rẹ dọ daghe ahu nin ele mhọnlẹn.
20 Ahu nọnsi Osẹnobulua nin ọria mhọnlẹn, ọle ha rẹman si Ejele nọnsi Osẹnobulua wẹnna bhi iẹnlẹn nọnsọle, ọ iyi ọta nin ọle tale.
21 Ọnela yẹẹ bha nẹ? Nin mẹn rẹ re asan bu bha re, la nin mẹn rẹ re oyẹẹ bi ẹkẹ nọn fu bu bha re?
