Kọrint Nin Ọhẹnhẹn 6:1-20
6 Bezẹle nin bha da mun egbe yo ikotu, sade ibha bi obhio bha mhọn ẹmhọnlẹn, nin eria ne ire obọ rẹkhan uwedẹ nesi Osẹnobulua talọ bhọ. Bezẹle nin ibha bha da mun ọne ẹmhọn bu ene khiale bhi agbotu?
2 Ibha bha be lẹn ghe ene khiale, ele ha bhuohiẹn ọne agbọn nan? Beji a miẹn ghe ibha ha bhuohiẹn ọne agbọn nan, be ki zẹ nin ibha bha da sabọ talọ bhi ẹmhọn ne bha sẹ emhin soso?
3 Ibha bha be lẹn ghe ibha ha bhuohiẹn ene ẹhi? Be ki zẹ nin ibha bha da sabọ talọ bhi ikuẹkuẹ ẹmhọn ne zegbere bhi ọne agbọn nan?
4 Ahamiẹn ẹmhọn ribhi otọ, eria nin agbotu re ẹlo gbe a, bha ha be tie ne dọ talọ bhọ?
5 Bha ji ẹkhọle ha lo bha. Ọria nọn wanlan ibe zẹwẹ ribhi ẹwẹ bha, nin bha ha mun ọne ẹmhọn bu nọn talọ bhọ?
6 Nin bha rẹ lu ọnan, bha ki ha mun egbe bha yi ikotu dọ ha guiẹzọ man ẹbho ne bha lẹn Osẹnobulua!
7 Emhin ẹkhọle nọn nin bha rẹ tie ibhio bha ẹzọ bhi ikotu. Zẹ ọle obọ nin ọle lu uwẹ khọ. Zẹ ọle obọ nin ọle mun uwẹ lu.
8 Ọkpakinọn, ibha bha lu iriọ. Bha bhọ ki ha lu ibhio bha khọ, yẹ mun ele lu!
9 La ibha bha be lẹn ghe, eria ne imhẹn ida nabhi Agbejele nọnsi Osẹnobulua? Bha hẹi ji a hiẹ bha. Ẹbho ne gboghẹ,* ẹbho ne ga ẹbọ, ọdọ la amhẹn nọn dọ ha ne ọria ọbhebhe nowẹ, ikpea ne re otọ nin ikpea ebhebhe da ne ele nowẹ, ikpea ne ne ikpea ibo ele nowẹ,
10 oyi, ene mhọn ẹlobhiamhin, ene da anyọn gbe egbe, ene re unun riia ẹbho a, ene mun ẹbho lu, ele ida nabhi Agbejele nọnsi Osẹnobulua.
11 Iriọ eso bhi ẹwẹ bha rẹ ha ye. Ejayenan nian, Osẹnobulua kpe bha khia; ọle re bha kiẹn ene khiale; a tie bha eria ne khiale bhi elin nọnsi Jesu Kristi nin Ebeanlẹn mhan bi bhi ahu ẹlinmhin nọnsi Osẹnobulua.
12 Mẹn dẹ sabọ lu emhin nọn hi ki rẹ khin nọn ghọn mẹn, ọkpakinọn, ọ iyi emhin rebhe ha re elele ji mẹn. Mẹn dẹ sabọ lu emhin nọn hi ki rẹ khin nọn ghọn mẹn, ọkpakinọn, imẹn ida re egbe imẹn kiẹn igbọn nin emhin soso.
13 Ebale a le ọbhi ẹkẹ, ẹkẹ a le ebale ọi, ọkpakinọn, Osẹnobulua dẹ re ele de ihoho a. Egbe nọnsẹmhan iyi ọsi oghẹ,* ọsi Ebeanlẹn mhan nọn, Ebeanlẹn mhan gbẹloghe ọne egbe.
14 Osẹnobulua riọ Ebeanlẹn mhan kpanọ bhi uu, ọle dẹ yẹ re ahu nọnsọle rẹ riọ mhan kpanọ bhi uu.
15 Ibha bha be lẹn ghe egbe nọnsẹbha ki deba egbe ọsi Kristi? Emhin nọn gbale be nọn nin bha rẹ mun egbe ọsi Kristi dọ ku ọle kugbe deba ọsi agbilẹ? Hiehie!
16 Ibha bha be lẹn ghe, ọria nọn ku egbe ọle kugbe deba agbilẹ deba ọle kiẹn efun ọkpa? Osẹnobulua yọle: “Ele veva dẹ kiẹn efun ọkpa.”
17 Ọnọn kugbe deba Ebeanlẹn mhan ki deba ọle ha yi ọkpa bhi oriọn.
18 Re egbe nẹ bhi oghẹ!* Emhin ebe ọbhebhe iribhọ nin ọria ha rẹ kuan egbe ọle sẹ bii oghẹ. Ọria nọn hi ki rẹ khin nọn gboghẹ, egbe ọle ọle lu khọlọ.
19 Ibha bha be lẹn ghe, egbe nọnsẹbha, ọle hi uwa ọsi ẹlinmhin nọn khiale nọn ne ibha? Obọ Osẹnobulua ọne ẹlinmhin nan na vae. Sẹyẹ, ọ iyi bha nyan egbe bha.
20 Okpemhin Osẹnobulua rẹ dẹ bha. Bhiriọ, bha re egbe nọnsẹbha rẹ ha gẹn ọlẹn.
Eba gbẹn bho otọle
^ Fẹ Ikpọta Nan Re Otọle Man, “Oghẹ.”
^ Bhi urolo Grik, ponia. Fẹ Ikpọta Nan Re Otọle Man.
^ Bhi urolo Grik, ponia. Fẹ Ikpọta Nan Re Otọle Man.
