Kọrint Nin Ọhẹnhẹn 7:1-40
7 Ejayenan nian, mẹn dẹ talọ nyan ebi bha gbẹn ji mẹn. Ọ dẹ mhẹn nẹ sade okpea bha zẹwẹ sikẹ* okhuo hiehie.
2 Ọkpakinọn, ranmhude ilọnmhọn oghẹ* nọn ki vuọn otọ vuọn okhun, ji okpea ha mhọn amhẹn nọnsọle, okhuo ha yẹ ha mhọn ọdọ nọnsọle.
3 Ọkhẹke nin ọne okpea ha re ebe khẹke okhuo ọle nanlẹn, ọne okhuo ha yẹ ha re ebe khẹke ọdọ ọle nanlẹn.*
4 Ọ iyi ọne okhuo nyan egbe nọnsọle, ọdọ ọle nyan ọlẹn. Sẹyẹ, ọ iyi ọne okpea nyan egbe nọnsọle, okhuo ọle nyan ọlẹn.
5 Bha hẹi re inegbenowẹ siakhaẹn nin egbe. Ahamiẹn okhuo bi ọdọ ko mhanmhanlẹn nin ele rẹ dobọ i fo, beji ele ha da sabọ re ọne ẹghe rẹ nan erọnmhọn, emhin esili nọn. Ọkpakinọn, ọkhẹke nin ele kie fikiere ha ne egbe nowẹ, ranmhude, ahamiẹn ele bha sabọ mun egbe ele ọbhi ibẹẹ, Esu sabọ rẹ dọnmhẹn ele.
6 Ọne emhin nan nin mẹn taman ibha, ọ iyi uhi, ebi bha ha sabọ lu sade ọ yẹẹ bha nọn.
7 Ọ ha rẹ wo yẹẹ mẹn gbe sade ọrebhe sabọ diabe imẹn. Ọkpakinọn, ọdeọde mhọn emhin kẹkẹ nin Osẹnobulua rẹ lu ẹsele nanlẹn. Ọ iyi ebi ọle rẹ lu ẹsele nin ọnan, ọle rẹ lu ẹsele nin ọnọnkẹle.
8 Rẹji ene bha sẹ bọ ọdọ la re okhuo, bi rẹji ikhuo nin ọdọ ele yu, ọ dẹ mhẹn nẹ sade ele wo ribhi idia nin ele ye bọsi mẹn.
9 Ahamiẹn ele bha sabọ mun egbe ele ọbhi ibẹẹ,* ele ha re okhuo la ele ha bọ ọdọ. Ranmhude, nin ele rẹ re okhuo la bọ ọdọ, ọle ha fu ele bhi egbe nẹ, nin egbe nọnsele rẹ ha nyọn ba ẹmhọn inegbenowẹ.
10 Ọnan hi adia nin mẹn re nin ene bọ ọdọ bi ene re okhuo, ghe nin okhuo hẹi zẹ ọdọ ọle obọ. Adia nin Ebeanlẹn mhan re nin mhan khọnan.
11 Aharẹmiẹn ọle zẹ ọdọ ọle obọ, ọle hẹi bọ ọdọ ọbhebhe. Ahamiẹn ọle bha sabọ re iriọ dotua, ọle ha fikie bu ọdọ ọle. Sẹyẹ, ọdọ hẹi zẹ okhuo ọle obọ.
12 Rẹji enekẹle, ọnan hi adia nin mẹn re nin ele, ehe, imẹn hi ọnọn ta ọnan, ọ iyi Ebeanlẹn mhan: Ahamiẹn obhio mhan nin okpea mhọn okhuo nọn iribhi oga, ọ bha khẹke nin ọle zẹ ọle obọ sade ọne okhuo muegbe nin ọle rẹ nanlẹn dia;
13 ahamiẹn okhuo mhọn ọdọ nọn iribhi oga, ọ bha khẹke nin ọne okhuo zẹ ọdọ ọle obọ sade ọne okpea muegbe nin ọle rẹ re ọle ha nyẹnlẹn.
14 Aharẹmiẹn ghe okhuo mhọn ọdọ nọn iribhi oga, Osẹnobulua dẹ re ẹlo esili ghe ibọdọ bi ireokhuo nọnsele ranmhude ọne okhuo. Sẹyẹ, Aharẹmiẹn okpea mhọn okhuo nọn iribhi oga, Osẹnobulua dẹ re ẹlo esili ghe ibọdọ bi ireokhuo nọnsele ranmhude ọne okpea. Sade ọ iyi iriọ nọn, Osẹnobulua ida ghe imọn nesele bii imọn ne khiale. Bhi ejayenan nian, ele khia bhi ẹlo nọnsọle.
15 Ọkpakinọn, ahakimiẹn ọnọn iribhi oga zẹ nin ọle rẹ kpanọ, ji ọle da kpanọ. Ọ iyi oko nin uwẹ rẹ nanlẹn dia, Osẹnobulua re ọfure nin bha.
16 Okhuo, uwẹ bha be lẹn ghe, asabọmiẹn uwẹ hi ọnọn ha hinmhin ọdọ ẹ? Okpea, uwẹ bha be lẹn ghe, asabọmiẹn uwẹ hi ọnọn ha hinmhin okhuo ẹ?
17 Ọrẹyiriọ, ji ọrebhe sẹ yẹ wo ha ribhi idia nin ọle ha ye, ẹghe nin Osẹnobulua nin Jehova* rẹ tie ọle. Ọnan ebi mẹn man bhi ene agbotu rebhe.
18 Ahamiẹn ọria nọn ruẹle uwẹ khin ẹghe nin Osẹnobulua rẹ tie uwẹ, wo ha ribhi ọne idia nin. Hẹi dọ fi ọle denọ. Ahamiẹn ọria nọn bha ruẹ uwẹ khin, hei dọ ruẹ.
19 Ọ iyi emhin soso nin ọria rẹ ruẹ, la nan rẹ miẹn a bha ruẹ. Ebe lu uhọnmhọn emhin hi, nan rẹ ha re obọ rẹkhan uhi nọnsi Osẹnobulua.
20 Ji ọdeọde wo ha ribhi idia nin ọle ha ye ẹghe nan rẹ tie ọle.
21 Ahamiẹn igbọn uwẹ khin bhi ẹghe nin Osẹnobulua rẹ tie ẹ, hẹi ji ọnin kpokpo uwẹ. Ọkpakinọn, uwẹ ha miẹn isẹhoa nin uwẹ rẹ fan egbe ẹ fia, lu ọle.
22 Ọria nọn hi ki rẹ khin nọn ha yi igbọn ẹghe nin Ebeanlẹn mhan rẹ tie ọle, ki dọ ha yi ọria nin Ebeanlẹn mhan fan fia. Sẹyẹ, ọria nọn hi ki rẹ khin nọn bha ha yi igbọn ẹghe nan rẹ tie ọle, ki dọ kiẹn igbọn ọsi Kristi.
23 Okpemhin Osẹnobulua rẹ dẹ bha, bha hẹi yẹ re egbe bha rẹ lu igbọn ọsi eria.
24 Ibhio, idia nọn hi ki rẹ khin nin ọdeọde bhi ẹwẹ bha ha ye bhi ẹghe nin Osẹnobulua rẹ tie ọle, ji ọle sẹyẹ wo re ọne idia nin rẹ ha ga Osẹnobulua.
25 Ebeanlẹn mhan bha taman imẹn uhi nin mẹn ha gbe nin ene bha sẹ bọ ọdọ la re okhuo.* Ọkpakinọn, mẹn dẹ taman ibha ebi mẹn ghe ọne ẹmhọn nan yẹ, ranmhude, Ebeanlẹn mhan mhọn itohan da mẹn, yẹ ghe mẹn bi ọria nan ha sabọ gbaẹkẹ ọle.
26 Mẹn riale ghe, ọ dẹ mhẹn nẹ nin okpea wo ha ribhi idia nin ọle ye, ranmhude uwedẹ nin emhin rẹ kaka nian.
27 Ahamiẹn uwẹ mhọn okhuo, hẹi ha guanọ ebi uwẹ ha re zẹ ọle obọ yẹ. Ahamiẹn uwẹ imhọn okhuo, hẹi ha guanọ okhuo nin uwẹ ha re.
28 Ọkpakinọn, ahamiẹn uwẹ re okhuo, uwẹ bha lu emhin ọbe. Ọria nọn bha sẹ bọ ọdọ la re okhuo ha zẹ nin ọle rẹ bọ ọdọ la re okhuo, ọne ọria nin bha lu emhin ebe. Ọkpakinọn ene lu iriọ dẹ miẹn ekpokpo bhi egbe, Ọne ekpokpo nan mẹn guanọ nin bha re egbe nẹ nan.
29 Ibhio, ebi mẹn tẹmhọnlẹn khọnan: ẹghe iyẹ ribhọ. Rẹ na bhi ọne ẹghe nan rẹ ha khian, ji ẹbho ne mhọn ikhuo ha lu bii eria ne imhọnlẹn,
30 ji ẹbho ne lu akhiẹ ha lu bọsi ene ilu akhiẹ, ji ẹbho ne ghọnghọn ha lu bọsi ene ighọnghọn, ji ene dẹnẹ emhin yẹ ha lu bọsi ghe, ọ iyi ele nyan emhin nin ele dẹ.
31 Sẹyẹ, ene noo ọne agbọn nan hẹi wo gbe iẹnlẹn nọnsele rebhe ruẹ bhi ẹkẹ ọle, ranmhude, emhin fi egbe denọ bhi ọne agbọn nan.
32 Mẹn bha guanọ nin bha re obọ ọbhi emhin nọn ha re bha ha kpokpo egbe. Iwẹnna ọsi Ebeanlẹn mhan, ọle rẹtẹ okpea nọn bha sẹ re okhuo. Ọle ki ha ria ẹmhọn ebi ọle ha rẹ lu ebe ha ti Ebeanlẹn mhan bhọ.
33 Bhi obọ nọnkẹle, okpea nọn re okhuo ki wo ha kpokpo egbe ba emhin ne ribhi ọne agbọn nan. Ọle ki ha ria ẹmhọn ebi ọle ha rẹ lu ebe ti okhuo ọle bhọ yẹ.
34 Bhiriọ, ọkhọle nọnsọle iribhi ijanlẹn ọkpa. Iriọ yẹ nọn, iwẹnna ọsi Ebeanlẹn mhan, ọle rẹtẹ okhuo nọn bha sẹ bọ ọdọ bi okhuo nọn imhọn ọdọ, beji ọle ha da ha yi ọria nọn khiale bhi egbe bi ọkhọle. Bhi obọ nọnkẹle, okhuo nọn bọ ọdọ ki wo ha kpokpo egbe ba emhin ne ribhi ọne agbọn nan. Ọle ki ha ria ẹmhọn ebi ọle ha rẹ lu ebe ti ọdọ ọle bhọ yẹ.
35 Ọ iyi nin mẹn rẹ mun bha gba zẹle nin mẹn da ta ene ẹmhọn nan. Ọmhẹn nọnsẹbha zẹle nin mẹn da tale. Mẹn guanọ nin bha lu emhin nọn khẹke, beji bha ha da sabọ denọ ẹlo bhi iwẹnna ọsi Ebeanlẹn mhan yẹ ha re ọkhọle rebhe lu ọle.
36 Ahamiẹn okpea nọn bha sẹ re okhuo riale ghe ọle bha yẹ sabọ mun egbe mhọnlẹn, ji ọle lu ebe ghọn ọlẹn sade ọle wanre sẹ. Ji ọle re okhuo; ọle bha lu ọbe.
37 Ahamiẹn okpea rẹọbhọ ghe ọle imhọn ebi ọle re okhuo lu, nin ọle da tobọle zẹ ghe ọle ida re okhuo, ghe ọle dẹ sabọ mun egbe mhọn, emhin esili ọle zẹle.
38 Ọria ha zẹ nin ọle rẹ re okhuo la bọ ọdọ, ọle dẹ miẹn elele. Ọkpakinọn, ọnọn yọle ọle ida re okhuo la bọ ọdọ, ọle ha miẹn elele nẹ.
39 Ahamiẹn okpea sẹyẹ ribhi agbọn, okhuo ọle ida sabọ dọ bọ ọdọ ọbhebhe. Ọkpakinọn, ahamiẹn ọne okpea yu, ọne okhuo sabọ dọ bọ ọria nọn hi ki rẹ khin nọn ghọn ọlẹn. Sokpan, ọ dẹ ha yi ọria nọn ribhi oga.
40 Mẹn rẹọbhọ ghe, ahamiẹn ọle bha kie bọ ọdọ, ọle ọle ha da ha ghọnghọn nẹ. Mẹn lẹnmhin ghe ẹlinmhin nọnsi Osẹnobulua noo mẹn.
Eba gbẹn bho otọle
^ Ọnin hi nin ọle hẹi ne okhuo nowẹ.
^ Bhi urolo Grik, ponia. Fẹ Ikpọta Nan Re Otọle Man.
^ Ọnin hi, inegbenowẹ.
^ La “mun egbe mhọn.”
^ Bhi Grik, “ene bha sẹ ne ọria nowẹ khẹ.”
