Kọrint Nin Ọhẹnhẹn 8:1-13
8 Mẹn dẹ tẹmhọn ebale nan rẹ ze nin ẹbọ: Imhan rebhe lẹn otọ ọne ẹmhọn nan. Ọkpakinọn, ilẹnmhin re ọria tẹngbemun, sokpan, oyẹẹ bọn ọria okhun.
2 Ahamiẹn ọria riale ghe, ọle lẹn otọ emhin nọnsẹn, ọle bha sẹ gene lẹn ọlẹn beji ọkhẹke nọn rẹ lẹn ọlẹn.
3 Ahamiẹn ọria hoẹmhọn Osẹnobulua, Osẹnobulua lẹn ọne ọria nin.
4 Rẹji ebale nan rẹ ze nin ẹbọ, mhan lẹnmhin ghe, ẹbọ iyi emhin soso, ghe, Osẹnobulua ọkpa sẹsẹ ọle ribhọ.
5 Emhin ne bunbun ribhi ọne otọ nan bi okhun nin ẹbho tiọle osẹ. Gene-gene, osẹ ne bunbun bi ebeanlẹn ne bunbun, ele ribhọ.
6 Ọrẹyiriọ, Osẹnobulua ọkpa mhan mhọnlẹn. Ọle hi ọne Aba nọn man emhin rebhe, nọn yẹ nyan mhan. Sẹyẹ, Ebeanlẹn ọkpa mhan mhọnlẹn. Ọle hi Jesu Kristi, nin emhin rebhe na obọ ọle vae, rẹ sẹbhi imhan.
7 Ọkpakinọn, ọ iyi ẹbho rebhe lẹn ọnin. Ẹbọ ẹbho eso ka ha ga. Ranmhude ọnan, ele ha le ebale nan rẹ ze nin ẹbọ, ele ki ha ghe ọne ebale mun ọne ẹbọ. Ọkhọle nọnsele ki ha gbe ele asan ranmhude ele bha sẹ manman ziẹn.
8 Ọ iyi ebale nin mhan le ha re imhan sikẹ Osẹnobulua; emhin soso ida lu mhan sade mhan bha le ebale, sẹyẹ, mhan ida mhẹn gbera ọnikhẹ sade mhan le ọne ebale.
9 Ọkpakinọn, bha mhọn ẹwanlẹn, nan hẹi dọ miẹn ghe, ọne ahu nin bha mhọn nin bha rẹ tobọbha zẹ ebe ghọn bha, dọ rẹ bha kiẹn idobolo rẹji eria nin urẹọbhọ nọnsele wẹghẹ.
10 Aharẹmiẹn uwẹ lẹn ghe, ẹbọ iyi emhin soso, ọria nin urẹọbhọ nọnsọle wẹghẹ ha daghe ọle ghe, uwẹ le ebale bhi aluẹbọ, ọnan sabọ rẹ ọle dọ le ebale nan rẹ ze nin ẹbọ.
11 Arẹmiẹn uwẹ lẹnmhin ghe, ọ iyi emhin ọbe nin uwẹ rẹ le ọne ebale, uwẹ ki gbe urẹọbhọ ọsi obhio uwẹ nọn bha ka ziẹn khẹ sotọ sẹsẹsẹ, obhio uwẹ nin Kristi yu nan.
12 Bha ha re inian lu ibhio bha khọlọ, yẹ re ele lu emhin nin ọkhọle nọnsele bha re obọ ọi, Kristi bha lu olukhọ da.
13 Ahamiẹn ebi mẹn le dẹ kiẹn idobolo ji obhio mẹn, mẹn iyẹ da le elanmhẹn hiehie. Ranmhude mẹn bha guanọ nin mẹn wẹghẹ urẹọbhọ ọsi obhio mẹn an.
