Kọrint Nin Ọhẹnhẹn 9:1-27
9 Mẹn ida be sabọ lu ebe ghọn mẹn? Mẹn ibe yi odibo? Imẹn bha be sẹ miẹn Jesu nin Ebeanlẹn mhan? Ọ ibe yi bha hi iwẹnna obọ nesẹmhẹn ne rẹman ghe odibo mẹn khin?
2 Aharẹmiẹn ẹbho nekẹle ighe mẹn bii odibo, odibo mẹn wo khin rẹji bha, ranmhude, ibha hi ebe rẹman ghe odibo ọsi Ebeanlẹn mhan mẹn khin.
3 Ebi mẹn ha taman ẹbho ne guiẹzọ imẹn khọnan:
4 Mhan dẹ sabọ le ebale yẹ da anyọn nin ẹbho mun nin mhan.
5 Bọsi Sifas,* ibhio Jesu, bi ene etuegbe nekẹle, mhan mhọn ọne isẹhoa nin mhan rẹ re okhuo bhi ẹkẹ oga, yẹ ha re ọle rẹkhan egbe.
6 Imẹn bi Banabas ọkpa ọ be khẹke ne sẹyẹ ha wẹnna, beji mhan ha da miẹn emhin rẹ gbẹloghe egbe?
7 Ọyokhọnlẹn soso be ribhọ nọn ga agbaẹbho nọnsọle, nọn yẹ tobọle gbẹloghe egbe ọle? Ọmungbo soso be ribhọ nọn ida le bhi ebi ọle kọ? Sẹyẹ, ọsun-ohuan soso be ribhọ nọn ida wọn bhi miliki ọsi ihuan nesọle?
8 Ọ iyi ranmhude inian eria rẹ ghe emhin zẹle nin mẹn da ha ta ene emhin nan. Uhi bhọ yẹ re obọ bhọ.
9 A bhọ gbẹn ọlẹn ọbhi Uhi ọsi Mozis yọle: “Bha hẹi re emhin rẹ gba unun ọsi ẹmena nan rẹ ha wẹnna bhi eji a da gbe wit.” Ẹmena ọkpa Osẹnobulua be ha mhọn bhi ọkhọle?
10 La, ranmhude imhan zẹle nin ọle da ta ọnan? Bhi ọsi ẹmhọanta, ranmhude imhan zẹle nan da gbẹn ọlẹn. Ọne okpea nọn gua egua bhi ugbo bi ọne okpea nọn gbe ọne wit dẹ le bhi ene emhin ugbo.
11 Beji a miẹn ghe imhan hi ene taman ibha ẹmhọn Osẹnobulua, emhin ọbe be nọn nin mhan rẹ nọọn emhin bhi obọ bha?
12 Ahamiẹn ghe ikpea nekẹle mhọn ọne ahu nin ele rẹ nọọn emhin bhi obọ bha, imhan kii? Mhan ibe mhọn ọne ahu? Ọkpakinọn, mhan bha noo ọne ahu nan. Nin mhan rẹ lu iriọ, mhan da ha ziẹngbe ọkakale kẹkẹ, nan hẹi dọ miẹn ghe, imhan ki zẹ ẹbho bha yẹ rẹọbhi ọne ọta nọn mhẹn rẹji Kristi.
13 Ibha bha be lẹn ghe, ene ikpea ne wẹnna bhi uwa oga le bhi ene emhin ne ẹbho munọ re bhi uwa oga. Sẹyẹ, ene re emhin ze bhi ukhuo-izọese le bhi ene emhin nan rẹ zọese?
14 Iriọ yẹ nọn, Ebeanlẹn mhan da yọle nin ọria nọn lu iwẹnna itẹmhọn Osẹnobulua ha miẹn emhin rẹ le ebale bhi ọne iwẹnna nin ọle lu.
15 A bha sẹ miẹn ọkpa bhi ene emhin nan ne khẹke imẹn, nin mẹn miẹn bha le khẹ. Ọ iyi ranmhude mẹn guanọ nin bha lu ene emhin nan nin mẹn zẹle nin mẹn da ha ta ene ẹmhọn nan nian. Mẹn ha yu, ọle ha mhẹn gbera mẹn ji ọria soso da miẹn mẹn ebe rẹ re imẹn ha hio!
16 Ọ bha khẹke nin mẹn ha dẹgbọ ranmhude mẹn tẹmhọn Osẹnobulua. Ẹsọn nọn khẹke nin mẹn miẹn nọn. Ọkhọbhegbe hi ọsẹmhẹn sade imẹn bha wewe ọne ọta nọn mhẹn!
17 Elele ri mẹn bhọ sade mẹn re ọkhọ obọ mẹn lu ọle. Aharẹmiẹn ghe ranmhude oko nọn zẹle nin mẹn da lu ọle, ẹsọn nọn khua a yẹ mun mẹn bhi obọ.
18 Be bhọ hi elele nọn ha ki sẹ mẹn obọ? Ọle hi nin mẹn rẹ re ọsọhẹ rẹ wewe ọne ọta nọn mhẹn. Bhiriọ, mẹn ida gheghe wo ha noo ahu nin mẹn mhọnlẹn rẹ nọọn emhin bhi obọ bha ranmhude mẹn tẹmhọn Osẹnobulua.
19 Arẹmiẹn mẹn iyi igbọn ọsi ọria soso, mẹn da re egbe mẹn kiẹn igbọn ọsi ọrebhe, beji mẹn ha da sabọ rẹkpa ẹbho ne bunbun dọ ha rẹkhan Kristi.
20 Mẹn da ha lu emhin beji ibhokhan Ju rẹ lu emhin, beji mẹn ha da sabọ rẹkpa ele dọ ha rẹkhan Kristi. Arẹmiẹn mẹn iribhi odotọ uhi, mẹn da ha nyẹnlẹn bii ọria nọn ribhi odotọ uhi, beji mẹn ha da sabọ rẹkpa ene ribhi odotọ uhi.
21 Mẹn da yẹ ha lu emhin bii ọria nọn iribhi odotọ uhi, beji mẹn ha da sabọ rẹkpa ẹbho ne iribhi odotọ uhi rẹ dọ lẹn Kristi. Mẹn da lu ọnan arẹmiẹn mẹn re obọ rẹkhan uhi ọsi Osẹnobulua bi uhi ọsi Kristi.
22 Mẹn da ha lu emhin bii ọria nọn wẹghẹ, beji mẹn ha da sabọ rẹkpa ene wẹghẹ rẹ dọ lẹn Kristi. Mẹn kiẹn emhin rebhe rẹji unan ẹbho kẹkẹ, yẹ lu emhin rebhe nin mẹn ha sabọ lu, beji mẹn ha da sabọ rẹkpa eso bhi ẹwẹ ele rẹ miuhọnmhọn.
23 Ranmhude imẹn guanọ nin mẹn ta ọne ọta nọn mhẹn man ẹbho, ọle zẹle nin mẹn da ha lu ene emhin nan rebhe.
24 Ibha bha be lẹn ghe, bhi ẹwẹ ẹbho rebhe ne vae dọ runẹ, otuọnkpa ọkpa miẹn ọne elele? Bhiriọ, bha runẹ nọnsẹn beji ọne elele ha da sẹ bha obọ.
25 Ọrebhe ne hinmhin egbe ọbhi emhin, mun egbe ọbhi ibẹẹ bhi emhin rebhe. Ele ha lu ọnan, elele* nọn ida tọ, ọle ele miẹn. Bhi ọsẹmhan, elele nọn ha tọ, ọle mhan ha miẹn.
26 Bhiriọ, mẹn igheghe runẹ bii ọria nọn bha lẹn eji ọle khian. Sẹyẹ, mẹn kọn etin nọnsẹmhẹn nọnsẹn, beji a ha da miẹn ghe, mẹn bha ha fino ọlẹn bhi ahoho.
27 Mẹn man egbe nọnsẹmhẹn emhin,* yẹ dia ọle bọsi igbọn, nan hẹi dọ miẹn ghe, mẹn ha ki tẹmhọn Osẹnobulua man ẹbho fo, imẹn tobọmẹn ki dọ kiẹn ọria nọn fidọn.
Eba gbẹn bho otọle
^ Ọle a yẹ tiọle Pita.
^ Bhi Grik, “ukparu.” Ebe bi ilunmhun a rẹ do ọne ukparu.
^ La “Mẹn re oya nin egbe nọnsẹmhẹn.”
