Jọni Nin Ọzeva 1:1-13
1 Imẹn nin ọwanlẹn gbẹn ọne ebe nan ji ọne okhuo nan zẹle, bi imọn nesọle. Mẹn manman hoẹmhọn bha. Ọ iyi imẹn ọkpa, ọrebhe ne dọ lẹn ẹmhọanta yẹ hoẹmhọn bha
2 ranmhude ẹmhọanta nin mhan mhọn, nọn ha yẹ ha ne imhan rẹ sẹbhi ighegheghe.
3 Osẹnobulua nin Aba mhan, bi Jesu Kristi nin Ọmọn nọnsọle dẹ mhọn itohan bi ifuẹkẹ da mhan. Ele dẹ re ọfure bi ẹmhọanta nin mhan. Ele dẹ yẹ mhọn oyẹẹ da mhan.
4 Mẹn wo manman ghọnghọn, ranmhude, mẹn kere ghe eso bhi imọn nesẹ wo khian bhi uwedẹ ẹmhọanta, beji Aba mhan rẹ gbe ọne uhi nin mhan.
5 Bhiriọ okhuo, bha ji mhan hoẹmhọn egbe. (Ọnan iyi uhi ọsọgbọn. Uhi nin mhan ka ha mhọn khẹ rẹ na otọ ha de nọn.)
6 Ọnan hi ebi oyẹẹ mundia nan, ghe nin mhan re obọ rẹkhan uhi nin ọle gbe nin mhan. Ọne uhi khọnan, ghe nin bha wo ha re oyẹẹ man. Ọnan hi uhi nan gbe nin bha bhi ẹghe ọhẹnhẹn.
7 Eria ne bunbun ne hiẹ ẹbho zegbere bhi ọne agbọn nan. Ele bha rẹọbhọ ghe Jesu gene vae bhi ọne agbọn nan bọsi ọria. Ene ẹbho nan hi eghian Kristi ne hiẹ ẹbho.
8 Bha gbẹlokotọ nan hẹi dọ miẹn ghe, ebezẹle nin mhan da wẹnna kaka bhi egbe ibha bha yẹ sẹ ibha obọ. Ahamiẹn bha gbẹlokotọ, ọne elele rebhe ki sẹ ibha obọ.
9 Ahamiẹn ọria dọ ha lu ọsọle, nin ọle bha da re obọ rẹkhan iman-emhin nesi Kristi, ẹmhọn ọlẹn ida ti Osẹnobulua bhọ. Ọkpakinọn, ọria nọn re obọ rẹkhan ene iman-emhin, ọle ẹmhọn ọlẹn ha ti ọne Aba bi ọne Ọmọn bhọ.
10 Ahamiẹn ọria vae dọ ha man emhin nọn dikẹ bhi iman-emhin nesi Kristi, bha hẹi ji ọle na bha bhi uwa, bha bhọ hẹi tuẹ ọle.
11 Ranmhude, ọria nọn hi ki rẹ khin nọn tuẹ ọle, re obọ ọbhi emhin ebe nin ọle lu.
12 Mẹn mhọn emhin ne bunbun nin mẹn ho nin mẹn taman ibha, ọkpakinọn, mẹn bha ho nin mẹn gbẹn ọlẹn bhi ebe ji bha. Mẹn mhọnlẹn bhi ọkhọle ghe, mẹn dẹ kẹ dọ miẹn ibha. Ẹghenin, mẹn ki tale man bha, beji bha ha da manman ha ghọnghọn.
13 Imọn nesi obhio ẹ nin okhuo (ọnanzẹle) je otuẹ ibha.
