Jọni Nin Ọzea 1:1-14
1 Imẹn nin ọwanlẹn gbẹn ọne ebe nan ji uwẹ nin Geyọs nin obhio mẹn nọn dan mẹn, nin mẹn manman hoẹmhọn ọlẹn.
2 Obhio mẹn nin mẹn hoẹmhọnlẹn, mẹn bhii nin uwẹ sẹyẹ wo ha lu nọnsẹn bhi emhin rebhe, yẹ ha mhọn egbe nọn daanlẹn beji uwẹ rẹ ha lu nọnsẹn nian.
3 Mẹn wo manman ha ghọnghọn ẹghe nin ibhio mhan rẹ vae dọ ha tẹmhọn ebi uwẹ rẹ mun ẹmhọanta mhọn yẹ, bi ebi uwẹ rẹ ha khian bhi uwedẹ ẹmhọanta yẹ.
4 Emhin ọbhebhe iribhọ nọn rẹ mẹn ghọnghọn* gbera ọnan, nin mẹn rẹ họn ghe imọn nesẹmhẹn wo ha khian bhi uwedẹ ẹmhọanta.
5 Obhio mẹn nin mẹn hoẹmhọnlẹn, uwẹ wo re urẹọbhọ man bhi emhin nin uwẹ wo ha lu nin ene ibhio mhan, arẹmiẹn eriọbhe ele khin rẹji uwẹ.
6 Ele wo tẹmhọn oyẹẹ nọnsẹ man ọrebhe bhi ẹkẹ agbotu. Huẹan, ele ha ki ha muegbe nin ele rẹ kpanọ, re iyobọ nin ele bhi uwedẹ nọn ha rẹ ti Osẹnobulua bhọ.
7 Ranmhude, elin nọnsi Osẹnobulua zẹle nin ele da dagbare. Ele bha miẹn ẹbho ne ribhi ẹkẹ ọne agbọn nan emhin soso.
8 Bhiriọ, ebe khẹke nin mhan lu nọn nin mhan rẹ ha miẹn eria ne sẹ inian ọbhi egbe, beji imhan ha da sabọ deba ele ha tuẹn oga ẹmhọanta okhun.
9 Mẹn gbẹn ebe ji bha rebhe bhi agbotu, ọkpakinọn, Daotrẹfis nọn guanọ nọn ha mun ọkalo bhi ẹwẹ ibha, bha muegbe nin ọle rẹ miẹn emhin soso nọn na obọ mhan vae ọbhi egbe.
10 Ọnan zẹle mẹn ha vae, mẹn ki talọ ọbhi emhin nin ọle lu, nin ọle rẹ ha ta ọta nọn imhẹn mhan bhi egbe. Ọnin bha yẹ sẹ ọle, ọle da he nin ọle rẹ miẹn ene ibhio mhan ọbhi egbe. Sẹyẹ, ene ho nin ele miẹn ele ọbhi egbe, ọle da kiẹn ele idobolo, yẹ ha guanọ nin ọle khu ele sibhi agbotu re.
11 Obhio mẹn nin mẹn hoẹmhọnlẹn, hẹi re egbe khọkhọ ijiẹmhin nọn imhẹn, sokpan, re egbe khọkhọ ijiẹmhin nọn mhẹn. Ọria nọn lu ebe mhẹn, ibo nọnsi Osẹnobulua ọle ye. Ọria nọn lu ebe imhẹn bha lẹn Osẹnobulua.*
12 Ibhio mhan rebhe wo ha ta ọta esili rẹji Dẹmitriọs. Uwedẹ nin ọle rẹ nyẹnlẹn wo yẹ re ọnan man. Bhi ọsi ẹmhọanta, imhan tobọmhan yẹ ha sọsali nanlẹn, sẹyẹ, bha lẹnmhin ghe ẹmhọanta mhan ta.
13 Mẹn rẹ ha mhọn emhin ne bunbun nin mẹn ho nin mẹn taman uwẹ. Ọkpakinọn mẹn bha guanọ nin mẹn gbẹn ọlẹn ọbhi ebe ji uwẹ.
14 Mẹn mhọnlẹn bhi ọkhọle ghe, mhan dẹ kẹ miẹn egbe, beji mhan ha da ko talọ ghe-mẹn-ghe-uwẹ.
Egbe fu ẹ re.
Ibhio mhan ne ribhi enan je otuẹ uwẹ. Je otuẹ ọdeọde bhi ibhio mhan ne ribhi enin.
