Arẹman 18:1-24
18 Ene emhin nan ki sunu fo, mẹn da daghe ẹhi ọbhebhe na bhi okhun vade. Ọle da wo manman ha mhọn ahu. Sẹyẹ, otọ rebhe da ha bhala ranmhude uyi nọn rẹkhan ọlẹn.
2 Ọle da re urulu nọn deziẹn rẹso yọle: “Ọ dele! Babilọn Nọn Khua dele! Ọ kiẹn eji ẹlinmhin-ebe bi ẹlinmhin ne bha khia* da nyẹnlẹn. Afianmhẹn ne sọnnọn ẹbho bi afianmhẹn ne bha khia, ele ki nyẹnlẹn bhọ!
3 Ranmhude uwedẹ nin anyọn ọsi igboghẹ* nọnsọle rẹ mun ọria, ene agbaẹbho rebhe deba ọle gboghẹ. Ene ijie ne ribhi ọne otọ nan da yẹ deba ọle gboghẹ. Sẹyẹ, ene do ẹki* da fe ranmhude, emhin ne ghanlẹn ọle dẹ.”
4 Mẹn da họn ukpuru ọbhebhe na okhun yọle: “Ẹbho nesẹmhẹn, ahamiẹn ibha bha họ nin bha deba ọle gha bhi olukhọ nọnsọle, yẹ miẹn ọkhọbhegbe nin ọle ha miẹn bhi egbe, bha sibhi eji ọle ye re.
5 Osẹnobulua dẹ bhuohiẹn ọlẹn bhi emhin ebe rebhe nin ọle lu, ranmhude olukhọ nọnsọle bun gbe.
6 A dẹ lu ọle ebi ọle lu ẹbho le. Ehe, a dẹ lu ọle le igba eva. Ukpu nin ọle rẹ sa anyọn nin ẹbho, ọle a ha rẹ sa nanlẹn igba eva.
7 Beji ọle rẹ manman ha mhọn uyi, yẹ ha fuẹn bhi ẹkẹ afe bi ua, iriọ a yẹ rẹ re akhiẹ bi oya nanlẹn. Ranmhude, ọle wo ha tale bhi ọkhọle nọnsọle yọle: ‘Esọn mẹn khin, mẹn iyi okhuo nọn imhọn ọdọ. Mẹn ida lu akhiẹ ghee.’
8 Ọnin zẹle ukpẹdẹ ọkpa ọkhọbhegbe nọn bu ọle vade ha rẹ sunu. Uu, akhiẹ, bi ohanmhẹn ki bu ọle re. Sẹyẹ, a ki re eranlẹn tuẹ ọle a sẹsẹsẹ, ranmhude, Osẹnobulua nin Jehova* nọn bhuohiẹn ọlẹn wo manman wo.
9 “Ene ijie ne ribhi ọne otọ nan, ne deba ọle gboghẹ,* yẹ fuẹn bhi ẹkẹ afe bi ua nọnsọle, dẹ ha lu akhiẹ, yẹ viẹ ọle, sade ele daghe ighogho nọn zẹ bhi eranlẹn nan rẹ tuẹ ọle a.
10 Ele ki gban egbe fia, ranmhude ofẹn mun ele nan hẹi re oya nan re nanlẹn nin ele. Ele ki na enin ha yọle: ‘Ọnan khọ gbe, ọnan khọ gbe, eo, Babilọn Non Khua nọn yi agbaẹbho nọn deziẹn, osukpa a rẹ wo bhuohiẹn uwẹ nian!’
11 “Sẹyẹ, ene do ẹki bhi ọne otọ nan da ha lu akhiẹ, ele da ha viẹ ọle. Ranmhude, ọria soso iyẹ ribhọ nọn ha ne ele de emhin nin ele khiẹn.
12 Ene emhin nan hi emhin nin ele khiẹn, igolu, isiliva, udo ne ghanlẹn, ikpileghe, ukpọn linẹn ọsaje, ukpọn nọn mhọn alo ipọpo,* olu, ukpọn nọn gian, emhin rebhe nan re eran nọn vin-ohin lu, emhin rebhe nan re akọn-eni lu, emhin rebhe nan re eran nọn ghanlẹn lu, emhin rebhe nan re oze lu, emhin rebhe nan re ẹlọnmhọn lu, bi emhin rebhe nan re udo natiọle mabo lu.
13 Ene emhin nan yẹ deba emhin ne ele khiẹn: Sinamọn, emhin nọn vin-ohin nan miẹn bhi India,* emhin nan tuẹ a nọn vin-ohin, abhii nọn vin-ohin, frankisẹns, anyọn, abhii oliv, ẹlubọ nan rẹ lu ibrẹd, wit, ẹmena, ohuan, akasi, awẹnẹwẹnẹ, igbọn, bi eria.
14 A miẹn uwẹ emhin esili ne yẹẹ ẹ. Sẹyẹ, ene ebale ne mhẹn bhi unun rebhe, bi emhin ne mhẹn an, ba uwẹ ku. Uwẹ iyẹ da miẹn ele.
15 “Ene eria ne khiẹn ene emhin nan, ne rẹ ha khuan igho bhi obọ ọle, ki gban egbe fia. Ranmhude, ofẹn mun ele, nan hẹi re oya nan rẹ nanlẹn nin ele. Ele ki ha lu akhiẹ yẹ ha viẹ ọle.
16 Ele ki ha yọle: ‘Eo, uwẹ nin agbaẹbho nọn khua, uwẹ nọn mun ukpọn linẹn ọsaje yọ, yẹ mun ukpọn nọn mhọn alo ipọpo* bi ukpọn nọn gian yọ, uwẹ nọn re igolu nọn ghanlẹn, udo ne ghanlẹn, bi ikpileghe rẹ te egbe, ebe sunu ji uwẹ khọ gbe, ọ khọ gbe.
17 Ranmhude, osukpa ẹfe bi ua nọnsẹ rẹ wo fo sẹsẹsẹ!’
“Ene ewanlẹn ne re emhin khian bhi ẹkẹ okọ, ẹbho ne gua okọ, ẹbho rebhe ne wẹnna bhi ẹkẹ okọ, bi ẹbho ne nabhi okọ yo ije kẹkẹ dọ ha do ẹki, da gban egbe fia.
18 Ele da ha so, beji ele ha ghe ighogho nọn ha zẹ dagbare bhi eranlẹn nan rẹ tuẹ ọle a. Ele da yọle: ‘Agbaẹbho ọbhebhe iribhọ nan ha rẹ khọkhọ agbaẹbho nọn khua nan.’
19 Ele da ha bi ẹbubu bhi uhọnmhọn yẹ so. Ele da ha lu akhiẹ yẹ viẹ, ele da yọle: ‘Eo, ọne agbaẹbho nọn khua, uwẹ nọn re ọrebhe ne mhọn okọ bhi okpẹdẹ rẹ kiẹn ene fele, ebe sunu ji uwẹ khọ gbe, ọ khọ gbe. Ranmhude, a wo re osukpa re uwẹ obọ sotọ!’
20 “Ibha ne ribhi okhun, bha ha ghọnghọn ranmhude ebe sunu ji ọle. Ibha ne khiale, ene etuegbe bi ene akhasẹ, bha sẹyẹ ha ghọnghọn. Ranmhude emhin nin ọle lu bha le, ọle zẹle nin Osẹnobulua da re oya nanlẹn.”
21 Ẹhi ọkpa nọn manman wo da mun udede udo nọn diabe udo nan rẹ nọ emhin, ọ da mun fi fiọbhi ẹkẹ okpẹdẹ, yẹ yọle: “Inian a ha rẹ re osukpa khuẹ Babilọn nin agbaẹbho nọn khua lo. A iyẹ da kie miẹn ọlẹn.
22 A iyẹ da kie họn ukpuru ọsi eria ne so illo bhi ọne agbaẹbho, ne ne afan* mhọn rẹ ha khue emhin. A iyẹ da họn urulu ọsi eria ne fi ufele. A iyẹ da họn urulu ọsi ẹbho ne khue akala, la ukpuru ọsi ọria nọn hi ki rẹ khin nọn so illo. A iyẹ da kie miẹn eria ne lu iwẹnna obọ bhi ọne agbaẹbho, a bhọ iyẹ da kie họn uromhin ọsi ọria nọn nọ emhin bhi uke udo.
23 A iyẹ da kie re orukpa ru bhi ọne agbaẹbho ghee. A iyẹ da họn ukpurulu ọsi ọdafẹn bi ọsi obhiaha bhi ọne agbaẹbho, ranmhude, ẹbho nesọle ne do ẹki, ele hi okperia ne ribhi ọne otọ nan. Ọle da yẹ re ilọnmhọn ikpẹbo nesọle rẹ hiẹ agbaẹbho rebhe.
24 Ehe, ọle hi ọnọn gbono ene akhasẹ bi eria ne khiale a. Sẹyẹ, aranlẹn ọsi ọrebhe nan gbono a bhi ọne otọ nan ri ọle bhi obọ.”
Eba gbẹn bho otọle
^ Ọ sabọ ha yi, “ohiẹnhiẹn; ọta nọn nabhi obọ ẹlinmhin-ebe vae.”
^ Bhi urolo Grik, ponia. Fẹ Ikpọta Nan Re Otọle Man, “Oghẹ.”
^ La “ene do ẹki nabhi agbaẹbho kẹkẹ.”
^ Fẹ Ikpọta Nan Re Otọle Man, “Oghẹ.”
^ Ọne alo nan diabe ọsi alubasa.
^ Ebale a re ọle nyẹn.
^ Ọne alo nan diabe ọsi alubasa.
^ Ebi a rẹ khue illo, nin ebo tiọle hap.
