Arẹman 7:1-17
7 Ene emhin nan ki sunu fo, mẹn da daghe ẹhi enẹn ne mundia bhi obọ nenẹn ọsi ọne otọ nan. Ele da mun ahoho nọn fi re bhi obọ nenẹn ọsi ọne otọ nan mhọnlẹn, beji a da miẹn ahoho bha fi ọbhi ọne otọ nan, ọne okpẹdẹ, la eran soso.
2 Mẹn da daghe ẹhi ọbhebhe, ọle da ha nabhi obọ nin oẹnlẹn da hẹnre dagbare. Ọle da re emhin nin Osẹnobulua nọn nyẹnlẹn rẹ re iyaman nin ẹbho mhọnlẹn. Ọle da sotie ene ẹhi enẹn nan je nin ele dọ dunmhun ọne otọ nan an bi ọne okpẹdẹ.
3 Ọle da taman ele yọle: “Bha hẹi sẹ dunmhun ọne otọ nan an, la ọne okpẹdẹ, la ene eran. Bha mundia fo nin mhan ka re iyaman bhi ukẹhae ọsi eguọmhandia nesi Osẹnobulua nọnsẹmhan.”
4 Mẹn da họn ghe, itue uli enẹn nyan egbọ eva nyan iyisẹn,* ele a re iyaman nan. Ulin-uwa ọsi ibhokhan Izrẹl ene ẹbho na vae:
5 Bhi ulin-uwa ọsi Juda, itue uli igbeva* a re iyaman nan;bhi ulin-uwa ọsi Rubẹn, itue uli igbeva* a re iyaman nan;bhi ulin-uwa ọsi Gad, itue uli igbeva* a re iyaman nan;
6 bhi ulin-uwa ọsi Asha, itue uli igbeva* a re iyaman nan;bhi ulin-uwa ọsi Naftalai, itue uli igbeva* a re iyaman nan;bhi ulin-uwa ọsi Manasẹ, itue uli igbeva* a re iyaman nan;
7 bhi ulin-uwa ọsi Simiọn, itue uli igbeva* a re iyaman nan;bhi ulin-uwa ọsi Livai, itue uli igbeva* a re iyaman nan;bhi ulin-uwa ọsi Isaka, itue uli igbeva* a re iyaman nan;
8 bhi ulin-uwa ọsi Zẹbulọn, itue uli igbeva* a re iyaman nan;bhi ulin-uwa ọsi Josẹf, itue uli igbeva* a re iyaman nan;bhi ulin-uwa ọsi Bẹnjamin, itue uli igbeva* a re iyaman nan.
9 Ọne emhin nan ki sunu fo, ghọle! mẹn da daghe usun ẹbho ne bunbun, nin ọria soso bha sabọ ka. Agbaẹbho kẹkẹ bi ulin-uwa kẹkẹ ne ribhi otọ ọne agbọn nan rebhe ele na vae. Urolo kẹkẹ ele yẹ zẹ. Ele da muno ukpọn nọn fua yọ, yẹ mundia bhi odalo ọne ojukhuo bi odalo ọne Ohuan. Ele da ne ikpilanmhẹn mhọn bhi obọ.
10 Ele da ha so yọle: “Osẹnobulua nọnsẹmhan nọn dotua bhi uke ọne ojukhuo, bi ọne Ohuan, ele re umiẹnfan nin mhan.”
11 Ene ẹhi rebhe, ene ewanlẹn, bi ene emhin enẹn ne nyẹnlẹn da mundia nẹga ọne ojukhuo. Ele da debhẹre bhi odalo ọne ojukhuo yẹ ha ga Osẹnobulua.
12 Ele da ha yọle: “Isẹ! Ogẹn, uyi, ẹwanlẹn, ekhuẹnmhẹn, ọghọ, ahu, bi ẹtin hi ọsi Osẹnobulua nọnsẹmhan rẹ sẹbhi ighegheghe. Isẹ.”
13 Ọkpa bhi ene ewanlẹn da ki nọọn mẹn yọle: “Uwẹ be lẹn ene ẹbho nan ne muno ukpọn nọn fua yọ? Uwẹ be lẹn eji ele na vae?”
14 Mẹn da jẹje wanniẹn ọlẹn yọle: “Heye ebeanlẹn mẹn, uwẹ hi ọnọn ha taman imẹn.” Ọle da ki taman imẹn yọle: “Enan hi ene ẹbho ne miuhọnmhọn bhi ekpokpo nọn khua. Ele re aranlẹn ọsi ọne ohuan rẹ họ ukpọn nọnsele fua.
15 Ọnin zẹle nin ele da mundia bhi odalo ojukhuo nọnsi Osẹnobulua, yẹ ha re oga nọn khiale ji ọle bhi asọn bi odanmhẹn bhi uwa oga nọnsọle. Ọnọn dotua bhi uke ọne ojukhuo dẹ taan ibọkpọ nọnsọle a nyan ele.
16 A iyẹ da miẹn ele bha miẹn ebale le, la nan miẹn ele bha miẹn amẹn wọn. Ovuẹnlẹn iyẹ da ha to mun ele, la nọn wawa ele egbe a.
17 Ranmhude, ọne ohuan nọn ribhi adesẹ ọne ojukhuo dẹ sun ele, ọle ki dia ele diọbhi eji amẹn ọsi iẹnlẹn ye. Sẹyẹ, Osẹnobulua ki gbo amẹn-eviẹ sibhi ẹlo nọnsele re.”
Eba gbẹn bho otọle
^ 144,000
^ 12,000
^ 12,000
^ 12,000
^ 12,000
^ 12,000
^ 12,000
^ 12,000
^ 12,000
^ 12,000
^ 12,000
^ 12,000
^ 12,000
