Filẹmọn 1:1-25
1 Pọl nin onighan ranmhude Jesu Kristi, bi Timoti nin obhio mhan gbẹn ọne ebe nan ji Filẹmọn nin obhio mhan nin mhan hoẹmhọnlẹn,
2 Afia nin obhio mhan nin okhuo, Akipọs nọn deba mhan sun rẹkhan Kristi bọsi ọyokhọnlẹn, bi agbotu nọn ko bhi uwa ọsi Filẹmọn.
3 Mẹn bhii nin Osẹnobulua nin Aba mhan, bi Jesu Kristi nin Ebeanlẹn mhan manman mhọn ifuẹkẹ da bha yẹ re ọfure nin bha.
4 Ẹghe rebhe nin mẹn rẹ nan erọnmhọn, ọle mẹn rẹ so elin ẹn. Mẹn ki wo ha khuẹnmhẹn Osẹnobulua ranmhude uwẹ.
5 Ẹbho wo ha taman imẹn ebi uwẹ rẹ hoẹmhọn Jesu nin Ebeanlẹn imhan yẹ, bi urẹọbhọ nin uwẹ mhọn da ọle. Mẹn yẹ họn ẹmhọn oyẹẹ nin uwẹ mhọn da ene khiale rebhe.
6 Mẹn bhii nin urẹọbhọ nin mhan ko mhọnlẹn rẹkpa ẹ rẹ lẹn emhin esili rebhe nin mhan miẹn rẹ na obọ Kristi.
7 Ẹghe nin mẹn rẹ họn ẹmhọn uwedẹ nin uwẹ rẹ ha re oyẹẹ man, mẹn da wo ha ghọnghọn. Ọ da yẹ wo ko mẹn udu re. Filẹmọn nin obhio, oyẹẹ nin uwẹ rẹman wo mun udu ọsi ene khiale ziẹn.
8 Ọnan zẹle arẹmiẹn mẹn mhọn ọne ahu bọsi odibo nọnsi Kristi, nin mẹn rẹ taman uwẹ ebe khẹke nin uwẹ lu, mẹn ida lu iriọ.
9 Mẹn dẹ bhii ẹ, ranmhude, mẹn lẹnmhin ghe uwẹ manman mhọn oyẹẹ. Uwẹ lẹnmhin ghe ọwanlẹn imẹn nin Pọl khin, sẹyẹ, onighan mẹn khin ranmhude Jesu Kristi.
10 Ẹmhọn Onẹsimọs nin ọmọn nọnsẹmhẹn zẹle nin mẹn da bhii ẹ. Ighan mẹn da kiẹn aba ọle.
11 Ọria oya ọle rẹ ha khin rẹji uwẹ, ejayenan nian, ọle kiẹn ọria esili. Ọle ki dẹ sabọ ha rẹkpa ẹ, ọle bhọ rẹkpa mẹn fo.
12 Mẹn ho nin mẹn je ọle fikie bu uwẹ re. Mẹn wo manman hoẹmhọn ọlẹn.
13 Ọ ha rẹ yẹẹ mẹn nin ọle ne imẹn debhi enan an bhi ọne ẹghe nan nan rẹ mun mẹn khue ranmhude iwẹnna itẹmhọn Osẹnobulua. Ọle ki fẹkẹ ha miẹnsọn nin uwẹ ha rẹ ne imẹn miẹn.
14 Sokpan, mẹn guanọ nin mẹn ka nọọn ẹn fo, ranmhude mẹn bha guanọ nin mẹn lu emhin nin uwẹ bha re obọ ọi. Mẹn bha guanọ nan miẹn ghe, imẹn sua ẹ rẹ lu ọne emhin esili nan. Mẹn guanọ nọn na ọkhọle nọnsẹ vae.
15 Asabọmiẹn beji ọle ha da kiẹn ọsi uwẹ rẹ ha khian, ọle bhọ zẹle nin ọle da ka nẹgbe bhi obhi ẹghe khere.
16 Ọle iyẹ da gheghe ha yi igbọn, obhio mhan nọn dan mhan ọle ki khin nian. Mẹn wo manman hoẹmhọn ọlẹn. Mẹn lẹnmhin ghe, uwẹ dẹ yẹ wo manman hoẹmhọn ọlẹn, ranmhude, ọle iyẹ gheghe yi igbọn nọnsẹ, obhio ẹ ki nọn nian.
17 Ahamiẹn uwẹ tie mẹn ọmọẹ ẹ, miẹn ọlẹn ọbhi egbe bhi uwedẹ nin uwẹ ha yẹ rẹ miẹn imẹn ọbhi egbe.
18 Sẹyẹ, ahamiẹn ghe ọle mhọn ebi ọle lu uwẹ le, la ọle mhọn uwẹ osa, ka ọle mẹn bhi uru.
19 lmẹn nin Pọl, imẹn re obọ nọnsẹmhẹn rẹ gbẹn ọnan: Mẹn dẹ ha uwẹ ọne osa. Ọkpakinọn, uwẹ hẹi yele a ghe, osa nin uwẹ mhọn mẹn le bhọ kpọnọ nẹ.
20 Huẹan obhio mẹn, lu ọne emhin nan nin mẹn ranmhude Ebeanlẹn mhan. Re ọkhọle nọnsẹmhẹn ha ghọnghọn ranmhude Kristi.
21 Mẹn lẹnmhin ghe uwẹ dẹ lu rẹkhan ebi mẹn tale. Ọle zẹle nin mẹn da gbẹn ọne ebe nan ji uwe. Mẹn rẹọbhọ ghe, uwẹ bhọ dẹ lu gbera ebi mẹn bhii uwẹ le.
22 Rẹ deba ọnin, huẹan, mhanmhan eji mẹn ha dia khẹ mẹn. Mẹn mhọnlẹn bhi ọkhọle ghe a dẹ kẹ fan imẹn fia bhi ighan, ranmhude erọnmhọn nin bha wo ha nan ji mẹn.
23 Ẹpafras nin mẹn bi ọle ko ribhi ighan ranmhude Jesu Kristi je otuẹ uwẹ.
24 Mak, Aristakọs, Dimas, bi Luk yẹ je otuẹ uwẹ. Imẹn bi ele ko wẹnna.
25 Mẹn bhii nin Jesu Kristi nin Ebeanlẹn imhan manman mhọn ifuẹkẹ da bha ranmhude ọkhọle esili nin bha rẹ lu emhin.
