Filipai 2:1-30
2 Bha dọnmhegbe nin bha rẹ ha re izebhudu nin ibhio bha nin bha ko ga, nin bha rẹ re ikoudure nin ele yẹ re oyẹẹ man ele, nin bha rẹ ha ne egbe muobọ, re ẹjẹjẹ man egbe, yẹ mhọn itohan da egbe.
2 Bha ha lu iriọ, bha ki re imẹn manman ha ghọnghọn. Bha ha mhọn ọkhọle ọkpa, bha ha yẹ ha re oyẹẹ man egbe. Bha wo kugbe nọnsẹn, bha ha ria eria ọkpa.
3 Bha hẹi re itẹn-abọ la okpẹhio ha lu emhin. Bha ha mhọn idegbere, bha ha ghe eria nekẹle bii eria ne mhẹn gbera bha.
4 Ọ iyi ọsi egbe ibha ọkpa bha ha khu ọi, bha ha khu ọbhi ọmhẹn ọsi eria nekẹle.
5 Bha ha ria eria beji Jesu Kristi rẹ ha ria eria.
6 Arẹmiẹn ghe ọle diabe Osẹnobulua, ọle bhọ bha riale bhi ọkhọle hiehie nin ọle rẹ re egbe ọle ọbhi ihe nọnsi Osẹnobulua.
7 Ọle bhọ da degbere sẹsẹsẹ, yẹ re egbe ọle kiẹn ọguọmhandia, yẹ ka nan biẹ ọle bọsi ọria.
8 Rẹ gbera ọnin, ẹghe nin ọle rẹ vae bhi ọne otọ nan bọsi ọria, ọle da degbere yẹ hẹnmhọn nin Osẹnobulua rẹ sẹbhi ukpẹdẹ uu. Ehe, a bhọ da gbe ọle a bhi okhun oran.*
9 Ranmhude ọnan, Osẹnobulua da khua ọle okhun, yẹ re ihe nọn khua nanlẹn, ọle da yẹ re elin nọn khua okhun gbera elin nekẹle rebhe rẹ lu ẹsele nanlẹn.
10 Osẹnobulua da lu ọnan, beji a da miẹn ọrebhe, rẹ sẹbhi ene ribhi okhun, ene ribhi otọ, bi ene ribhi ẹkẹ otọ ki mun ekpẹn nin elin nọnsi Jesu.
11 Sẹyẹ, ọrebhe ki re unun nọnsele tale ghe Jesu Kristi hi Ebeanlẹn mhan. Ọnan ki re uyi ji Osẹnobulua nin Aba mhan.
12 Ibhio mẹn ne dan mẹn, ẹghe rebhe bha wo rẹ hẹnmhọn nin Osẹnobulua. Ọ iyi sade imẹn ribhi ẹwẹ bha ọkpa, manman nọn bhi ọne ẹghe nan nin mẹn irẹ ribhi eji bha ye. Bhiriọ, bha sẹyẹ wo re ofẹnmunmhin ha wẹnna kaka nin bha rẹ khu ọbhi umiẹnfan nọnsẹbha.
13 Osẹnobulua hi ọnọn rẹkpa bha rẹ lu ebe ha ti ọle bhọ. Ọle hi ọnọn re ọhubhudu bi ahu nin bha rẹ ha lu ọle.
14 Emhin nọn hi ki rẹ khin nin bha lu, bha hẹi ha guinẹzọ la gbugan.
15 Bha ha rẹban ene emhin nan, bha ki sabọ ha yi imọn ne khiale nesi Osẹnobulua, ne bha lẹn ọkpa lẹn eva. Ahamiẹn ibha khiale, bha ki diabe ukpa nọn bhala bhi ọne agbọn nan, arẹmiẹn ghe bha nyẹnlẹn bhi ẹwẹ ẹbho ne tẹkhekhe.
16 Bha mun ọne ọta nọn re iẹnlẹn nin ọria mhọn nọnsẹn. Bha ha lu ọnan, mẹn ki manman ha ghọnghọn bhi ukpẹdẹ nọnsi Kristi, ranmhude, mẹn lẹnmhin ghe, mẹn bha miẹnsọn kua.
17 Aharẹmiẹn a rẹ mẹn zọese bọsi anyọn nan rẹ zọese, izọese nọnsẹmhẹn deba izọese nin bha lu, bi oga nọn khiale nin bha re ji Osẹnobulua ranmhude urẹọbhọ nin bha mhọnlẹn. Ọnan wo ti mẹn bhọ. Mẹn yẹ deba bha ghọnghọn.
18 Ọ khẹke nin bha yẹ deba mẹn ha ghọnghọn.
19 Ọ a ha yi iho nọnsi Jesu nin Ebeanlẹn mhan, mẹn dẹ je Timoti bu bha re bhi ẹghe nọn bha ree gbe, beji mẹn ha da hẹnmhọn bha, yẹ ha mhọn izebhudu.
20 Mẹn imhọn ọria ọbhebhe nọn diabe ọle, nọn ha re ẹkẹata gbẹloghe bha.
21 Enekẹle rebhe ze iwẹnna ọsi Jesu Kristi obọ dọ ha khu ọsi egbe ele.
22 Sokpan bha lẹnmhin ghe, Timoti wo rẹman unan ọria nin ọle khin, ranmhude, ọle wo sun rẹkhan mẹn ha wewe ọne ọta nọn mhẹn, beji ọmọn rẹ sun rẹkhan aba.
23 Bhiriọ, ọle hi ọne imẹn ha je bu bha re sade mẹn ki lẹn ebe ha sunu ji mẹn.
24 Mẹn wo rẹọbhọ ghe, ọ a ha yi iho nọnsi Ebeanlẹn mhan, imẹn tobọmẹn dẹ kẹ dọ fẹ bha ghe.
25 Bhi ejayenan nian, mẹn dẹ je Ẹpafrodaitọs bu bha re. Obhio mẹn nin mhan ko wẹnna ọle khin. Imhan ko khọnlẹn nin Kristi. Ọle yẹ hi ukọ nin bha je bu mẹn re, nọn yẹ wo ha rẹkpa mẹn.
26 Ẹlo bha wo ha nyan ọlẹn. Ọle izẹwẹ ghọnghọn, ranmhude, ọle họn ghe, bha lẹn ghe ọle khọnmhọn.
27 Ọle gene ha khọnmhọn, rẹ sẹbhọ ghe ẹlo-ẹlo a ki ha ghe ọle le. Ọkpakinọn, Osẹnobulua da mhọn itohan da ọle, ọ bhọ iyi ọle ọkpa, ọ da yẹ mhọn itohan da mẹn, nin mẹn hẹi gbo dọ ha lu akhiẹ.
28 Mẹn dẹ re ẹjẹje je ọle bu bha re, beji bha ha da miẹn ọlẹn yẹ ha ghọnghọn. Udu nọnsẹmhẹn ki yẹ sotọ.
29 Bha re eghọnghọn rẹ gbe obokhian nanlẹn bhi uwedẹ nọn khẹke odibo nọnsi Ebeanlẹn imhan. Bha ji ẹmhọn ikpea ne sẹ iriọ ha ti bha bhọ.
30 Ọle da rẹ yu ranmhude iwẹnna nọnsi Kristi.* Ọle da mun egbe ọle ọbhi okhẹnan ranmhude imẹn, beji a miẹn ibha bha sabọ vae dọ rẹkpa mẹn bhi enan.
