Filipai 4:1-23
4 Ibhio mẹn ne dan mẹn, nin ẹlo ele yẹ nyan mẹn, ibha wo re imẹn ghọnghọn. Inian bha diabe ukparu ojie bhi uhọnmhọn nọnsẹmhẹn. Bha huẹan, bha sẹyẹ wo mundia nọnsẹn bhi oga. Ẹmhọn bha manman ti mẹn bhọ.
2 Yuodia bi Sintikẹ, bha huẹan, bha ku ọkhọle gbe. Iriọ ọkhẹke nin ene rẹkhan Ebeanlẹn mhan ha lu.
3 Mẹn yẹ bhii ẹ obhio mẹn nin mhan ko ga, nin uwẹ wo ha rẹkpa ene ikhuo nan. Ene ikhuo nan bi Klẹmẹnt bi ibhio mhan nekẹle nin mhan ko ga, ele wo wẹnna kaka rẹkhan mẹn bhi iwẹnna itẹmhọn Osẹnobulua. Elin nọnsele ribhi ebe ọsi iẹnlẹn.
4 Bha wo ha ghọnghọn bhi oga ọsi Ebeanlẹn mhan. Mẹn taman ibha, bha ha ghọnghọn!
5 Bha ji ẹbho rebhe daghe ọle ghe eria ne re ẹwanlẹn lu emhin bha khin. Ebeanlẹn mhan bha ree bhi eji mhan ye.
6 Bha hẹi ha kpokpo egbe ba emhin soso. Bhi emhin nọn hi ki rẹ khin, bha ha nan erọnmhọn ji Osẹnobulua, bha ha bhii ọle nin ọle dia bha, bha yẹ ha khuẹnmhẹn ọlẹn.
7 Bha ha lu iriọ, ọfure nọn na obọ Osẹnobulua vae, nin ọria isabọ lẹn otọle, ki gbega ọkhọle nọnsẹbha bi eria nin bha ria, rẹ na obọ Jesu Kristi.
8 Bhi ọkike ọle ibhio mẹn, bha wo ha ria eria nyan ene emhin nan: emhin ne yi ẹmhọanta, emhin ne lu uhọnmhọn-emhin, emhin ne gbale, emhin ne khiale, emhin ne ha re ẹbho hoẹmhọn egbe, emhin nan tẹmhọnlẹn nọnsẹn, emhin ne mhẹn, bi emhin ne re ogẹn re.
9 Bha wo ha lu ene emhin nin bha luẹ bhi obọ imẹn, nin bha họn bhi unun mẹn, nin bha daghe mẹn lu—ene emhin nan nin bha yẹ miẹn ọbhi egbe. Ahamiẹn bha wo ha lu iriọ, Osẹnobulua ọsi ọfure ki ne ibha dia.
10 Mẹn wo manman ghọnghọn. Mẹn yẹ wo khuẹnmhẹn Ebeanlẹn mhan, ghe bha gbo miẹn isẹhoa rẹ rẹman ghe ẹmhọn mẹn rẹtẹ bha. A bha miẹn ẹghe nin ẹmhọn mẹn bha ka rẹ rẹtẹ bha khẹ, isẹhoa ibha bha miẹn nin bha rẹ re ọle man.
11 Ọ iyi ọsi ghe, emhin mẹn guanọ zẹle nin mẹn da ha ta ọnan. Idia nọn hi ki rẹ khin nin mẹn da ke egbe imẹn re, mẹn wo ji emhin nin mẹn mhọn khọn mẹn.
12 Mẹn ha manman ha mhọn emhin, mẹn le wọrọ-wọrọ. Ahakimiẹn mẹn imhọnlẹn, mẹn fẹkẹ khiokhio egbe. Bhi idia nọn hi ki rẹ khin nin mẹn ye, mẹn ki luẹ ebi a rẹ ziẹngbe ohanmhẹn yẹ, yẹ lẹn ebi a rẹ le ebale khọn yẹ. Mẹn lẹn ebi ọ khin nin ọria rẹ ha mhọn emhin ne bunbun bi nin emhin rẹ ka ọria bhi obọ.
13 Osẹnobulua hi ọnọn re ahu nin mẹn rẹ ziẹngbe bhi idia nọn hi ki rẹ khin nin mẹn da ke egbe imẹn re.
14 Ọrẹyiriọ, bha wo lu nọnsẹn nin bha rẹ rẹkpa mẹn bhi ẹghe nin mẹn rẹ ha ribhi ọnọghọ.
15 Bhi ọsi ẹmhọanta, ibha nin ibhokhan Filipai lẹnmhin ghe, ẹghe nin mẹn rẹ sibhi Masẹdonia re, beji mẹn ta ẹmhọn Osẹnobulua man bha fo bhi ọsi ọhẹnhẹn, agbotu nọnsẹbha ọkpa agbotu nọn re emhin ji mẹn.
16 Ẹghe nin mẹn rẹ ha ribhi Tẹsẹlonaika, igba eva ibha bhọ je emhin ji mẹn nin mẹn rẹ gbẹloghe egbe.
17 Ọ iyi ọsi ghe, mẹn guanọ nin bha re emhin ji mẹn, ọkpakinọn, mẹn guanọ nin bha miẹn elele nọn nabhọre sade ọria zẹ emhin bhi obọ.
18 Ejayenan nian, mẹn wo mhọn emhin rebhe nin mẹn guanọ, mẹn bhọ mhọn gbera eka nin mẹn guanọ, ranmhude, ebi bha mun nin Ẹpafrodaitọs nọn mun ji mẹn wo sẹ mẹn. Inian ẹsele nin bha lu nin mẹn wo diabe emhin nọn vin-ohin nan re zọese ji Osẹnobulua, izọese nọn ti Osẹnobulua bhọ.
19 Osẹnobulua nọnsẹmhẹn nọn nyan emhin rebhe dẹ yẹ re ebi bha guanọ nin bha rẹ na obọ Jesu Kristi.
20 Uyi hi ọsi Osẹnobulua nin Aba mhan rẹ sẹbhi ighegheghe. Isẹ.
21 Je otuẹ ene khiale rebhe ne rẹkhan Jesu Kristi. Ibhio mẹn ne ribhi enan je otuẹ bha.
22 Ene khiale rebhe, manman nọn, ene ribhi azagba-uwa ọsi Siza yẹ je otuẹ ibha.
23 Jesu Kristi nin Ebeanlẹn imhan dẹ mhọn ifuẹkẹ da bha, ranmhude ọkhọle esili nin bha mhọnlẹn.
