Hibru 1:1-14
1 Bhi ẹghe nọn gbera, Osẹnobulua da na obọ ene akhasẹ ha ne aba mhan nin ẹdẹlẹ talọ. Igba ne bunbun ọle lu ọnan. Sẹyẹ, uwedẹ kẹkẹ ọle rẹ ha lu ọle.
2 Ọkpakinọn, bhi ejayenan nian, ọle noo Ọmọn nọnsọle rẹ ne mhan talọ. Ọne Ọmọn ọle noolo rẹ man emhin rebhe ne ribhi ọne agbọn nan.* Sẹyẹ, ọle hi ọnọn ha le emhin rebhe bhi uku.
3 Ọle hi ọnọn re uyi nọnsi Osẹnobulua man. Ọle hi arẹkhọkhọ nọnsi Osẹnobulua. Ọta nọnsi Osẹnobulua nin ahu ye ọle rẹ re iẹnlẹn nin emhin rebhe. Ọle ki kpe mhan khia bhi olukhọ fo, ọle da dọ dotua bhi obera ọsi Ọnọn Ke Okhun Nẹ.
4 Ọle ki da khua okhun gbera ene ẹhi rẹ sẹbhọ ghe, ọle da dọ ha mhọn ihe* nọn khua okhun gbera ọsi ene ẹhi.
5 Bhi ọsi ijiẹmhin, ẹhi soso be ribhọ nin Osẹnobulua taman yọle: “Ọmọn nọnsẹmhẹn uwẹ khin; ẹlẹnan, imẹn kiẹn aba uwẹ”? Heye. Sẹyẹ, ọ iyi ọsoso bhi ẹwẹ ele ọle ha talọ je, ẹghe nin ọle rẹ yọle: “Ọle dẹ ha yi ọmọn nọnsẹmhẹn, imẹn ki ha yi aba ọle.”
6 Rẹji ẹghe nin ọle ha rẹ kie je Ọmọndiọn nọnsọle vae bhi ọne otọ nan, Osẹnobulua da yọle: “Bha ji ẹhi rebhe nesi Osẹnobulua debhẹre nanlẹn.”
7 Sẹyẹ, ẹghe nin ọle rẹ ha tẹmhọn ẹhi nesọle, ọle da yọle: “Ọle re ẹhi nesọle kiẹn ẹlinmhin, sẹyẹ, ọle re eguọmhandia nesọle kiẹn olanmhẹn eranlẹn.”
8 Ọkpakinọn, ẹghe nin ọle rẹ ha tẹmhọn ọne Ọmọn, ọle da yọle: “Osẹnobulua, ọle hi ojukhuo nọnsẹ rẹ sẹbhi ighegheghe, sẹyẹ, ọkpọ* ọsi ikhiale, ọle uwẹ ha rẹ gbẹloghe bhi Ejele nọnsẹ.
9 Ranmhude, uwẹ hoẹmhọn ikhiale, yẹ he emhin ebe, ọle zẹle nin Osẹnobulua nin Osẹ nọnsẹ da re abhili zẹ uwẹ, yẹ re eghọnghọn nin uwẹ gbera ibo ẹ.”
10 Sẹyẹ, Ebenọnkhiale da yọle: “Ebeanlẹn mẹn, uwẹ hi ọnọn gbe ayotọ ọsi ọne otọ nan bhi ẹghe umunhẹn. Uwẹ yẹ re obọ nọnsẹ rẹ man okhun.
11 Ene emhin nan dẹ fuẹn an, ọkpakinọn uwẹ ki sẹyẹ ha ribhọ. Ele dẹ fafa a bọsi ukpọn.
12 Uwẹ dẹ khi ele re sibhi otọ re bọsi igbu. Uwẹ ki fi ele denọ, beji ọria rẹ kuọ ukpọn, yẹ re ọbhebhe yọ. Ọkpakinọn, uwẹ ida fidenọ. Uwẹ dẹ ha ribhọ rẹ sẹbhi ighegheghe.”
13 Ẹhi ọbhebhe iribhọ nin ọle taman ghe: “Dotua bhi obera nọnsẹmhẹn, rẹ sẹbhi ẹghe nin mẹn ha rẹ ne eghian nesẹ ọbhi otọ oẹ nọnsẹ.”
14 Ẹlinmhin ene ẹhi rebhe khin. Iwẹnna oga ele lu. A je ele nin ele dọ rẹkpa ene ẹbho ne ha miẹn umiẹnfan.
Eba gbẹn bho otọle
^ La “ene ore kẹkẹ.” Fẹ Ikpọta Nan Re Otọle Man, “Ore.”
^ Bhi Grik, “elin.”
^ Ukpokpo nin ojie, la ọria nọn ribhi ihe nọn khua re mhọnlẹn.
