Hibru 11:1-40
11 Urẹọbhọ hi, nin mhan rẹ mun ọkhọle ọbhọ ghe, emhin nin mhan khẹ dẹ gene vae. Ọle yẹ hi, ebe rẹ mhan lẹn ghe, emhin nin mhan idaghe gene ribhọ.
2 Ranmhude urẹọbhọ nin ẹbho ne nyẹnlẹn bhi ẹghe ẹdẹlẹ rẹman, Osẹnobulua da rẹman ele ghe, ẹmhọn ele ti ọle bhọ.
3 Urẹọbhọ rẹ mhan lẹn ghe, ọta nin Osẹnobulua ta dagbare, ọle zẹle nin ọne agbọn nan* da ribhọ. Bhiriọ, obọ emhin nin mhan idaghe, ọle emhin nin mhan daghe na vae.
4 Urẹọbhọ nin Ebẹl ha mhọnlẹn, ọle re ọle lu izọese nọn mhẹn gbera ọsi Keni ji Osẹnobulua. Ọne urẹọbhọ nan yẹ zẹ nin Osẹnobulua da miẹn izọese nọnsọle ọbhi egbe, yẹ rẹman ọlẹn ghe, ọria nọn khiale ọle khin. Arẹmiẹn ọle yu, urẹọbhọ nọnsọle sẹyẹ talọ.
5 Urẹọbhọ nin Enọk ha mhọnlẹn, ọle zẹ nin Osẹnobulua da re ọle kpanọ, nọn hẹi yu uyumhin oya. Ranmhude Osẹnobulua re ọle kpanọ, a bha yẹ miẹn ọlẹn bhi ije soso. Ọkuẹsẹ Osẹnobulua re ọle kpanọ, ọ da ka rẹman ọlẹn ghe, ọle lu ebe ti Ọle bhọ.
6 Ahamiẹn ọria imhọn urẹọbhọ, ọle ida sabọ lu ebe ti Osẹnobulua bhọ. Ọkhẹke nin ọria nọn hi ki rẹ khin nọn bu Osẹnobulua re, rẹọbhọ ghe Osẹnobulua ribhọ, sẹyẹ, ọle hi ọnọn re ihaosa nin ọrebhe ne gene ho ne ga ọle.
7 Urẹọbhọ nin Noa ha mhọnlẹn, ọle zẹle nin ọle da mun ofẹn Osẹnobulua yẹ bọn okọ nọn ha gbega ọle bi azagba-uwa nọnsọle, ẹghe nin Osẹnobulua rẹ taman ọlẹn, emhin nan bha sẹ ka miẹn khẹ ne ha sunu. Urẹọbhọ nọnsọle ọle rẹ bhuohiẹn gbe ọne agbọn nan. Ranmhude ọne urẹọbhọ, a da tiọle ọria nọn khiale.
8 Urẹọbhọ nin Ebraham ha mhọnlẹn, ọle zẹ nin ọle da hẹnmhọn nin Osẹnobulua ẹghe nin Osẹnobulua rẹ tie ọle. Ọle da ha khian agbaẹbho nan yọle a dẹ mun nanlẹn. Arẹmiẹn ọle bha lẹn eji a taman ọlẹn nin ọle ha khian, ọle da sẹyẹ ha khian.
9 Urẹọbhọ zẹle nin ọle da ha nyẹnlẹn bọsi ọriọbhe bhi ọne otọ nan ve nanlẹn. Ọle bi Aiziki, bi Jekọp, ne ha deba ọle le ọne ive nan bhi uku, da ha nyẹnlẹn bhi ibọkpọ.
10 Ọle da ha khẹ ọne agbaẹbho nọn mhọn ayotọ ọsaje. Osẹnobulua hi ọnọn mhanmhan ọne agbaẹbho nan yẹ bọn ọlẹn.
11 Urẹọbhọ nin Sera ha mhọnlẹn zẹle nin Osẹnobulua da re ahu nanlẹn rẹ hanmhan ọmọn, arẹmiẹn ghe, ọle wanre gbera ẹghe nan rẹ biẹ. Ọle da rẹọbhọ ghe, Osẹnobulua nọn ve ọne ive nan nanlẹn ihiẹ ọria.
12 Ranmhude ọnan, okpea nin egbe nọnsọle bhọ ki rẹ diabe ọsi ọria nọn yu fo, da dọ ha mhọn imọn ne bunbun. Ene imọn da bunbun bọsi ahiẹnhiẹn ne ribhi okhun, bi ekẹn nọn ribhi egbẹdẹ nan isabọ ka.
13 Ene ẹbho nan rebhe da wo ha mhọn urẹọbhọ rẹ sẹbhi ukpẹdẹ uu. Arẹmiẹn emhin nin ele ha khẹ bha munsẹ bhi ẹghe nọnsele, ele da daghe ọle ghe, ọ dẹ munsẹ bhi ẹghe odalo. Ele da re eghọnghọn miẹn ọlẹn obhi egbe, yẹ wo ha tale ghe, eriọbhe bi erunmhunyẹn ele khin bhi ọne otọ nin ele da ha nyẹnlẹn.
14 Ẹbho ne guanọ eji ele ha da nyẹnlẹn, nin ele ha tiọle ọsele, ele re inian talọ.
15 Sade, ele sẹyẹ wo ha ria ẹmhọn eji ele da kpanọ ha vade, ele ha sẹyẹ miẹn isẹhoa rẹ fikie.
16 Eje mhẹn nẹ ele ha khuaẹloghe, ọnin hi, ọnọn na okhun vae. Bhiriọ, ẹkhọle ilo Osẹnobulua, ghe, a tiọle Osẹ nọnsele.
17 Ranmhude urẹọbhọ nin Ebraham ha mhọnlẹn, ọle da rẹ re Aiziki ze fo, ẹghe nan re dọnmhẹn ọlẹn. Ọne okpea nọn re eghọnghọn miẹn ive nan ve nanlẹn ọbhi egbe da rẹ ha guanọ nin ọle re ukpọmọn ọkpa sẹsẹ nọnsọle rẹ zọese,
18 arẹmiẹn ghe, a taman ọlẹn ghe: “Obọ Aiziki imọn nesẹ ha na vae.”
19 Ọle da rẹọbhọ ghe, Osẹnobulua dẹ sabọ re Aiziki kpanọ bhi uu. Ọle da gene kie miẹn Aiziki, bọsi ọria nan riọ kpanọ bhi uu. Ọnan da ha yi arẹkhọkhọ ọsi ebe ha sunu bhi ẹghe odalo.
20 Urẹọbhọ nin Aiziki ha mhọnlẹn, ọle zẹle nin ọle da nan erọnmhọn nin Isọ bi Jekọp, yẹ taman ele ebe ha sunu bhi ẹghe odalo.
21 Urẹọbhọ nin Jekọp ha mhọnlẹn zẹle nin ọle da nan erọnmhọn nin imọn nesi Josẹf, bhi ẹghe nọn rẹ ha kẹ khere nin ọle rẹ yu. Ọle da re ukpokpo rẹ tẹ otọ yẹ gbe uhọnmhọn kotọ.*
22 Urẹọbhọ nin Josẹf ha mhọnlẹn, ọle zẹle ọ ki kẹ khere nin ọle rẹ yu, ọle da taman ibhokhan Izrẹl ghe, ele dẹ sibhi otọ Ijipt re. Ọle da yẹ taman ele ebi ele ha khian iguẹ nesọle yẹ.*
23 Urẹọbhọ nin ene biẹ Mozis ha mhọnlẹn, ọle re ele mun ọlẹn nẹhe, rẹ na bhi uki ea, beji ele biẹ ọle fo. Ele da kere ghe ọne ọmọn wo mhọn-ose. Ranmhude ọnan, ofẹn bha mun ele rẹ gbobọra uhi ọsi ọne ojie.
24 Urẹọbhọ nin Mozis ha mhọnlẹn, ọle zẹle nin ọle bha da ka nan ha tiọle ọmọn ọsi ọmokhuo nọnsi Fero, beji ọle wanre fo.
25 Ọle da zẹ nin ọle rẹ deba ẹbho nesi Osẹnobulua loya. Ọle bha guanọ ọlẹnlẹnbhegbe ọsi obhi ẹghe khere nan miẹn bhi olukhọ.
26 Bhi ẹlo nọnsọle, oya nin Ọnanzẹle* miẹn bhi egbe, ọle lu okpemhin nẹ afe bi ua ọsi Ijipt. Ọle da wo ha ria ẹmhọn elele nan ha re nanlẹn.
27 Urẹọbhọ re ọle sibhi Ijipt re, ofẹn ọne ojie bha mun ọlẹn. Ọle da wo ziẹngbe ha ga Osẹnobulua. Ọ da diabe ọle wo ha daghe Osẹnobulua, arẹmiẹn a isabọ daghe ọle.
28 Urẹọbhọ nin ọle ha mhọnlẹn, ọle re ọle lu iluemhin ọsi Anagbera, yẹ fianmhẹn aranlẹn ọbhi odẹ, beji a da miẹn ẹhi nọnsi Osẹnobulua bha gbe ọmọndiọn nọnsele a.
29 Urẹọbhọ nin ibhokhan Izrẹl ha mhọnlẹn, ọle zẹle nin ele da sabọ na bhi adesẹ Okpẹdẹ Nọn Gian gbera, bọsi ghe otọ nọn kale nọn. Ọkpakinọn, ẹghe nin ibhokhan Ijipt ki rẹ ha ho nin ele dọnmhẹn ọlẹn, ele da ruẹ bhi ẹkẹ ọne ẹdẹ.
30 Ranmhude urẹọbhọ nin ibhokhan Izrẹl ha mhọnlẹn, ogbe nọnsi Jẹriko da siẹn sotọ, ẹghe nin ele rẹ khian nẹga ọle igba ihinlọn.
31 Urẹọbhọ nin Rehab nin agbilẹ ha mhọnlẹn, ọle zẹle nin ọle bha da deba ene mhọn akan-ehọ fuẹn an. Ọle da miẹn ene ikpea ne dọ baba otọ nọnsele fẹghe ọbhi egbe.
32 Eka mẹn ha kuẹ ta? Mẹn ha yọle nin mẹn tẹmhọn Gidiọn, Berak, Samsin, Jẹfta, Devid, Samuẹl, bi akhasẹ nekẹle, ẹghe ida sẹ.
33 Urẹọbhọ nin ele ha mhọnlẹn, ọle zẹle nin ele da sabọ khọn agbaẹbho miotọ. Ele da sabọ rẹkpa ẹbho ha lu emhin nọn gbale. Ele da sabọ miẹn ive nan ve nin ele. Ele da sabọ gue unun ọsi oduman.
34 Eranlẹn bha sabọ lu ele emhin soso. Ele da sabọ nẹ bhi unun agbada. Ele da kiẹn eria ne mhọn ahu, arẹmiẹn ele ka rẹ wẹghẹ. Ele da manman ha mhọn ahu nan rẹ khọn. Ele da vẹ ene rẹ mun okhọn bu ele kua.
35 Ranmhude urẹọbhọ nin ikhuo eso ha mhọnlẹn, ẹbho nesele ne rẹ yu da riọ kpanọ. Bhi obọ nọnkẹle, ikpea eso nan ha re oya nan, da he nin ele rẹ lu emhin nọn ha zẹ a bha gbono ele a, beji iẹnlẹn nọn mhẹn nẹ ha da sẹ ele obọ sade ele riọkpanọ.
36 A da zuọzuọ eso, yẹ re asan gbe ele. Rẹ deba ọnin, a da ne ighan eso bhi obọ, yẹ muno ele khue.
37 A da re udo gbono eso a, a da dọnmhẹn urẹọbhọ ọsi eso, a da sọ eso yi eva, a da re agbada gbono eso a. Ohian ohuan bi ohian ẹbhe, ọle ukpọn nin ele ha yọ. Ele bha miẹn rẹ lu. A da ha kpokpo ele, yẹ re obọ oya mun ele.
38 Ele bhọ mhẹn gbe nin ele rẹ ha ribhi ọne agbọn nan. Ele da ha nyẹnlẹn bhi ẹkẹ ẹgbo, bhi uke oke, bhi uhio ne ribhi ẹkẹ udo bi bhi ẹkhokho kẹkẹ bhi ọne otọ nan.
39 Ranmhude urẹọbhọ nin ene eria nan rẹman, Osẹnobulua da wo rẹman ele ghe, emhin nin ele lu ti ọle bhọ. Sokpan, ive nin ọle vele bha sẹ sẹ ele obọ.
40 Ranmhude Osẹnobulua mhanmhan emhin nọn mhẹn nẹ khẹ mhan, ọle zẹ nin emhin da dia inian, beji a ha da miẹn ele bha ka mhan kiẹn ene khiale.
Eba gbẹn bho otọle
^ La “ene ore kẹkẹ.” Fẹ Ikpọta Nan Re Otọle Man.
^ La “yẹ ga Osẹnobulua.”
^ La “ebi ele ha rẹ re ọle tọ yẹ.”
^ Bhi Grik, “Kristi.”
