Hibru 12:1-29
12 Beji a miẹn ghe mhan mhọn esali ne bunbun ne nẹga mhan bọsi adudu amẹn, bha ji mhan muno ihẹ rebhe kua, mhan ha yẹ rẹban ọne olukhọ nọn kẹ de imhan idobolo.* Bha ji mhan re iziẹngbe re ọne unẹ sotọ.
2 Bha ji mhan wo ha ghe Jesu. Ọle hi ọria nan ha na bhi obọ ọle miẹn iẹnlẹn, bi ọria nọn zẹle nin urẹọbhọ nọnsẹmhan da gba. Ranmhude ọle lẹnmhin ghe ọle dẹ miẹn eghọnghọn nọn khua bhi ẹghe odalo, ọle da ziẹngbe oya bhi okhun oran.* Ọle bha ji ẹkhọle lu ọle. Ejayenan nian, ọle dọ dotua bhi obera ọsi ojukhuo nọnsi Osẹnobulua.
3 Bha manman gbẹlokotọ bhi egbe ọle, beji a ha da miẹn egbe bha lọ bha, sẹyẹ, ibha bha zobọ bhi ọne unẹ. Ọle wo manman ziẹngbe ẹghe nin eria olukhọ rẹ ha re unun je ọle, arẹmiẹn ghe ọmhẹn nọnsele ọle ha guanọ.
4 Bhi ọne odan nin bha bi olukhọ ko dan, ibha bha sẹ nanlẹn dan sẹ bhọ nan miẹn ghe a gbono ibha a.
5 Bha wo ye ibhude nin Osẹnobulua re nin bha nin imọn nesọle a, ẹghe nin ọle rẹ yọle: “Ọmọn nọnsẹmhẹn, hẹi re ẹlo gbe adia nọnsi Jehova* a. Hẹi ji egbe lọ uwẹ sade ọle re adia nin uwẹ.
6 Ẹbho nin Jehova* hoẹmhọnlẹn, ele ọle re adia nan. Ọrebhe nin ọle tiọle imọn, ele ọle re asan gbe.”
7 Ọkhẹke nin bha ziẹngbe oya. Ọ deba emhin nin Osẹnobulua rẹ dia bha. Beji aba rẹ ne ọmọn lu emhin, iriọ Osẹnobulua rẹ ha ne ibha lu emhin. A imiẹn aba nọn ire adia nin ọmọn.
8 Ahamiẹn ghe, a bha re ọne adia nan nin bha, ọnin rẹman ghe, bha iyi imọn nesọle. Imọn ọsi ọria ọbhebhe bha khin.
9 Ẹghe rebhe aba mhan ne biẹ mhan rẹ ha re adia nin mhan. Mhan da yẹ wo ha mun ekpẹn nin ele. Ọ bha be yẹ khẹke nin mhan ha hẹnmhọn nin Aba mhan nọn ribhi okhun, nọn re ẹlinmhin nọn khiale rẹ dia iẹnlẹn nọnsẹmhan, beji mhan ha da sabọ ha nyẹnlẹn? Ọ wo manman khẹke.
10 Obhi ẹghe khere aba ne biẹ imhan rẹ re adia nin mhan. Ele da lu ọle beji ele rẹ riale ọ rẹ mhẹn. Bhi obọ nọnkẹle, ọmhẹn nọnsẹmhan zẹle nin Osẹnobulua da dia mhan. Ọle guanọ nin mhan khia beji ọle rẹ khia.
11 Ọ iyi emhin nọn rẹ ọria ghọnghọn, sade a re adia nanlẹn.* Ọ ba bhi egbe. Ọkpakinọn, ọne ọria ha miẹn ọne adia ọbhi egbe, ọ ki rẹkpa ọle rẹ ha mhọn ọfure yẹ ha lu emhin ne gbale.
12 Bhiriọ, bha ziẹn obọ nesẹbha ne wẹghẹ a, bi igogo nesẹbha ne guọ.
13 Bha ha khian okhian ọwala, nan hẹi dọ miẹn ghe oẹ nọn ka kpẹnjẹn khẹ wo sibhi ako-uguẹ re. Ahamiẹn bha khian okhian ọwala, ọne oẹ ki sabọ fu bha re.
14 Bha khu ọbhọ nin bha rẹ deba ọrebhe ha ribhi ọfure, bha ha yẹ khu ọbhi ikhiale, ranmhude, ahamiẹn ọria bha khia, ọ ida sabọ daghe Ebeanlẹn imhan.
15 Bha gbẹlokotọ, nan hẹi dọ miẹn ọria bhi ẹwẹ bha nọn bha miẹn ifuẹkẹ nọnsi Osẹnobulua ọbhi egbe. Ahamiẹn ibha bha gbẹlokotọ, iniẹn nọn imhẹn sabọ rẹ zegbere bhi ẹwẹ bha. Ọ ki si ozughu re, yẹ riia ẹbho ne bunbun an.
16 Bha yẹ gbẹlokotọ nan hẹi miẹn ọria nọn gboghẹ* bhi ẹwẹ bha, la ọria nin emhin ne rẹtẹ Osẹnobulua iti ọle bhọ, bọsi Isọ nọn re ihe ọsi ọmọndiọn rẹ dẹ ebale le.
17 Bha lẹnmhin ghe, ẹghe ki sẹ nin ọle ha rẹ miẹn erọnmhọn nọn khẹke ọle, ọne erọnmhọn bha yẹ sẹ ọle obọ. Ọle rẹ wo ha viẹ, beji ọle ha da fi ọkhọle ọsi aba ọle denọ, ọ bha wẹnna.
18 Ọ iyi odalo oke nan sabọ daghe bha da mundia, bọsi ibhokhan Izrẹl. Bhi ọne oke nin ele da mundia, eranlẹn da ha nyọn, okpahoho da ha fi, adudu amẹn da degue ọne oke, sẹyẹ, ijerebhe da so ebiuki a.
19 A da ha họn uromhin ọsi akala, ukpuru da ha ne ele talọ. Ẹghe nin ene ẹbho re họn ọne ukpuru, ele da yọle ghe, ele bha yẹ ho nin ọne ukpuru ha ne ele talọ.
20 Ẹmhọn nin Osẹnobulua taman ele bhọ da ha re ofẹn mun ele. Ọle da yọle: “Aharẹmiẹn ghe elanmhẹn re egbe so ọne oke, nan re udo gbe ọle a.”
21 Emhin nọn ha sunu bhọ da re ofẹn ha mun Mozis, ọle bhọ da yọle: “Ofẹn mun mẹn, mẹn yẹ wo guọ.”
22 Odalo oke ọsi Zaiyọn, ọle bha vae. Ọne oke nan hi agbaẹbho ọsi Osẹnobulua nọn nyẹnlẹn. Ọle hi Jerusalẹm nọn ribhi okhun. Ẹhi ne manman bunbun
23 ele sikoko bhi enin. agbotu ọsi ọne ọmọndiọn nan gbẹn elin nọnsele ọbhi ebe bhi okhun, ribhi enin. Osẹnobulua nọn ha bhuọhien ọrebhe ribhi enin. Ene khiale ne nyẹnlẹn rẹkhan adia ọsi ẹlinmhin nọn khiale, nan ki rẹ kiẹn ene gbale yẹ ribhi enin.
24 Jesu nin ọsuọnmhan ọsi ọne akovẹn ọsọgbọn ribhi enin. Ọne aranlẹn nan khakha nyan mhan, nọn mhẹn gbera ọsi Ebẹ yẹ ribhi enin.
25 Bha mhọn ẹwanlẹn, nan hẹi dọ miẹn bha mhọn akan-ehọ da ọne ọria nọn ne ibha talọ. Ẹbho ne bha hẹnmhọn nin ọria nin Osẹnobulua ha noo bhi ọne otọ nan rẹ ne ẹbho talọ, bha miuhọnmhọn. Bhiriọ, ahamiẹn mhan bha hẹnmhọn nin ọnọn na okhun talọ, mhan ida yẹ miuhọnmhọn!
26 Bhi ọne ẹghe nin, ukpuru nọnsi Osẹnobulua da mun ọne otọ nan lueghe. Ejayenan nian, ọle ve ọne ive nan yọle: “Mẹn dẹ kie mun ọne otọ nan lueghe. Ọbhọ iyi otọ ọkpa. Mẹn dẹ yẹ mun okhun lueghe.”
27 Ọne ukpọta nin, “mẹn dẹ kie” rẹman ghe, a dẹ ne ene emhin nan mun lueghe kie, emhin nin ọria manlẹn ene emhin nan khin. Emhin nan bha mun lueghe, ele ha kẹre.
28 Beji a miẹn ghe, Ejele nan ida sabọ mun lueghe ọle ha sẹ mhan obọ, bha ji mhan sẹyẹ wo ha miẹn ifuẹkẹ nọnsi Osẹnobulua ọbhi egbe. Ọne ifuẹkẹ nan ha rẹkpa mhan rẹ sabọ re ekpẹn bi ofẹnmunmhin ha ga Osẹnobulua nọnsẹn.
29 Eranlẹn nọn ha sabọ tuẹ emhin a sẹsẹsẹ, ọle Osẹnobulua nọnsẹmhan khin.
Eba gbẹn bho otọle
^ La “nọn kẹ gbanọ mhan.”
^ La “gbe ọle bhi esankan.”
^ Fẹ Ikpọta Nan Re Otọle Man, “Oghẹ.”
