Hibru 2:1-18
2 Ọ wo khẹke nin mhan manman re ehọ bhi ebi a taman imhan, beji a da miẹn ghe mhan bha bibi sibhi odẹ re.
2 Ahamiẹn ghe ẹmhọanta, ọle uhọnmhunje nin Osẹnobulua noo ene ẹhi rẹ taman aba imhan nin ẹdẹlẹ khin, sẹyẹ emhin nọn diale nọn nan rẹ re oya nin ọria nọn mhọn akan-ehọ yẹ gbobọra ọne uhi,
3 eka-eka ki ọria nọn re ẹlo gbe ọne umiẹnfan nọn khua nan an? A ida miẹn a bha re oya nanlẹn. Ebeanlẹn imhan, ọle Osẹnobulua noolo rẹ taman imhan ọne uhọnmhunje nan. Ene họn ebi ọle tale da sọsali ọbhọ man mhan.
4 Osẹnobulua da yẹ sọsali ọbhọ. Ọle da re ahu nin ele rẹ ha lu emhin ọhan-ilo bi emhin ọnyunuan kẹkẹ. Ọle da yẹ re ẹlinmhin nọn khiale nin ele beji ọ rẹ yẹẹ ọle.
5 Ọ iyi ene ẹhi Osẹnobulua zẹle ne gbẹloghe ọne agbọn ọsọgbọn nin mhan tẹmhọnlẹn.
6 Bhi ijan ọkpa bhi Ebenọnkhiale, okpea ọkpa da yọle: “Be imhan nin eria bhọ kuẹ khin, nin uwẹ da ji ẹmhọn mhan da rẹtẹ uwẹ? Bezẹle nin uwẹ da re inian ha gbẹloghe eria khọnkhan?
7 Bhi uwedẹ nin uwẹ rẹ manlẹn, khere ene ẹhi rẹ khua okhun gbera ọle. Uwẹ da re uyi nanlẹn yẹ mun ekpẹn ọle bhi egbe. Uwẹ da yẹ zẹ ọle nọn ha gbẹloghe emhin nin uwẹ manlẹn.
8 Uwẹ da mun emhin rebhe ọle bhi obọ.” Beji a miẹn ghe, emhin rebhe Osẹnobulua mun ọlẹn bhi obọ, emhin soso bha yẹ kẹre nin ọle bha mun ọle bhi obọ. Sokpan, ejayenan nian, mhan bha sẹ daghe ọle ghe ọle gbẹloghe emhin rebhe.
9 Ranmhude ifuẹkẹ nọn khua nọnsi Osẹnobulua, ọle da ri Jesu kiẹn ọria nin ene ẹhi ri khere khua okhun gbera, beji ọle ha da sabọ yu nin mhan. Ọkpakinọn, ejayenan nian, mhan daghe ọle ghe Osẹnobulua re ekpẹn bi uyi hin ọlẹn, ranmhude nin ọle rẹ yu nin mhan rebhe.
10 Osẹnobulua hi ọnọn man emhin rebhe. Ọle hi ọnọn yẹ nyan ele. Beji ọle ha da re uyi nin imọn nesọle, ọ da khẹke nin ọle ji ọne ọria nin ele ha na obọ ọle miẹn umiẹnfan da loya, beji ọ ha da gba nanlẹn.
11 Aba ọkpa, ọle ene a kpe khia, bi ọnọn kpe ele khia ko mhọnlẹn. Ranmhude ọnan, ẹkhọle ilu ọle nin ọle rẹ tie ele ibhio ọle.
12 Ọle da yọle: “Mẹn dẹ wewe elin nọnsẹ man ibhio mẹn. Bhi ẹkẹ agbotu, mẹn ki so illo rẹ gẹn uwẹ.”
13 Ọle da yẹ yọle: “Mẹn dẹ mun udu nyan ọlẹn.” Sẹyẹ ọle da yọle: “Imẹn bi ene ibhokhan nin Jehova* ne nin mẹn.”
14 Bhiriọ, beji a miẹn ghe, eria ne mhọn efun bi aranlẹn ene “ibhokhan” nan khin, ọle da yẹ kiẹn ọria nọn mhọn efun bi aranlẹn, beji a ha da miẹn ghe, ọle ki sabọ re uu nọnsọle rẹ gbe Ojuu khuẹlo. Ojuu hi ọnọn si uu re.
15 Sẹyẹ, ọrebhe nin ofẹn uu mun gba, rẹ na bhi ẹghe nan rẹ biẹ ele ha de, ọle ki fan ele fia.
16 Bhi ọsi ẹmhọanta, ọ iyi ene ẹhi ọle rẹkpa, imọn nesi Ebraham ọle rẹkpa.
17 Bhiriọ, ọ da khẹke nin ọle diabe “ibhio” ọle bhi uwedẹ rebhe, beji ọle ha da sabọ ha yi ojohẹn nọn mhọn itohan, nọn yẹ ga Osẹnobulua nọnsẹn. Sẹyẹ, ọle ki sabọ zọese bhi olukhọ ọsi eria, beji ele ha da kie sabọ deba Osẹnobulua ha mhọn ikolu.
18 Ọle tobọle wo loya bhi ẹghe nan rẹ dọnmhẹn ọlẹn. Ranmhude ọnan, ọle dẹ sabọ re urẹkpa nin eria nan yẹ ha dọnmhẹn.
