Hibru 3:1-19
3 Bhiriọ, ibhio mẹn ne khiale, ibha nan tiele ne dọ nyẹnlẹn bhi okhun, bha ria ẹmhọn Jesu. Ọle hi ọne ukọ nan je re. Ọle yẹ hi ọne ojohẹn nin mhan wewe ẹmhọn ọlẹn.
2 Ọle wo hẹnmhọn nin Osẹnobulua nọn zẹ ọle, beji Mozis yẹ rẹ hẹnmhọn nin Osẹnobulua ẹghe nin ọle rẹ ha ga bhi uwa nọnsi Osẹnobulua.
3 Ọle* mhọn uyi gbera Mozis, ranmhude, ọnọn bọn uwa, ọle mhọn uyi gbera ọne uwa nin ọle bọn.
4 Bhi ọsi ẹmhọanta, uwa nọn hi ki rẹ khin, ọria bọn ọlẹn. Sokpan, Osẹnobulua hi ọnọn man emhin rebhe.
5 Mozis wo ga nọnsẹn bọsi ọguọmhandia bhi uwa nọnsi Osẹnobulua. Oga nọnsọle da sọsali ọbhi emhin nan ha tẹmhọnlẹn bhi ẹghe odalo.
6 Bhi obọ nọnkẹle, Kristi da ha gbẹloghe uwa nọnsi Osẹnobulua bọsi ọmọn. Ọle da yẹ ga nọnsẹn. Uwa nọnsi Osẹnobulua mhan khin, sade mhan lu emhin nọn ha rẹ mhan gbudu ha talọ, bi sade mhan wo ha lu emhin ne ha rẹkpa mhan rẹ miẹn emhin nin mhan khuaẹloghe. Ene emhin nan rẹ mhan ghọnghọn.
7 Bhiriọ, beji a gbẹn ọbhi otọ rẹ na obọ ẹlinmhin nọn khiale, “Ẹlẹnan, bha ha họn urulu nọnsẹmhẹn,
8 bha hẹi mhọn akan-ehọ, beji aba ibha nin ẹdẹlẹ ka lu bhi ẹghe nin ele rẹ re ẹkẹ khọ mẹn, bhi ọne ukpẹdẹ nin ele rẹ dọnmhẹn imẹn bhi ẹkẹ ojẹgbo.
9 Arẹmiẹn ele daghe iwẹnna obọ nesẹmhẹn bhi ẹkẹ ikpe egbọ eva,* ele da yẹ ha dọnmhẹn imẹn.
10 Ọnan zẹle nin ẹkẹ ọne ore nan da ha khọ mẹn. Ọnan yẹ zẹ nin mẹn da yọle: ‘Ẹghe rebhe ele rẹ mhọn akan-ehọ da mẹn, ele bha lẹn uwedẹ nọnsẹmhẹn.’
11 Bhiriọ, mẹn da re ẹkẹkhọmhin ve ihẹn ọbhọ ghe, ‘Imẹn ida ji ele da deba mẹn koahua.’”
12 Ibhio, bha mhọn ẹwanlẹn nan hẹi dọ miẹn ghe, ọria soso bhi ẹwẹ bha fikekegbe Osẹnobulua, ranmhude ọle jẹ ọkhọle ebe, ọnin hi, ọkhọle nọn imhọn urẹọbhọ.
13 Ọkpakinọn, beji a miẹn ghe, mhan sẹyẹ ribhi ọne ẹghe nan natiọle “Ẹlẹnan,” bha wo ha re izebhudu nin egbe ukpẹdẹ-ukpẹdẹ, nan hẹi dọ miẹn ghe, olukhọ hiẹ bha yẹ re ọkhọle nọnsẹbha gbin.
14 Ranmhude, mhan ha mun urẹọbhọ nọnsẹmhan mhọn sẹbhi ọkpẹnlẹn, ọle ọkpa emhin nọn sẹ Kristi obọ ha da yẹ sẹ mhan obọ.
15 Beji Ebenọnkhiale tale, “Ẹlẹnan, bha ha họn urulu nọnsẹmhẹn, bha hẹi mhọn akan-ehọ, beji aba ibha nin ẹdẹlẹ ka lu bhi ẹghe nin ele rẹ re ẹkẹ khọ mẹn.”
16 Hebhọ ene re ẹkẹ khọ ọle arẹmiẹn ele họn ebi ọle tale? Ọ ibe yi ene ẹbho ne rẹkhan Mozis sibhi otọ Ijipt re.
17 Hela ene ẹbho ne wo re ẹkẹ ha khọ Osẹnobulua rẹ na bhi ikpe egbọ eva?* Ọ ibe yi ene ẹbho ne lu olukhọ yẹ yuno bhi ẹkẹ ojẹgbo?
18 Hela ọle ha ne talọ, ẹghe nin ọle rẹ ve ihẹn ọbhọ yọle, ‘Ibha ida deba mẹn koahua?’ Ọ ibe yi ene ẹbho ne mhọn akan-ehọ da ọle?
19 Mhan ki daghe ọle ghe, ranmhude ele bha ha mhọn urẹọbhọ, ọle zẹle nin ele bha da sabọ deba ọle koahua.
