Hibru 4:1-16
4 Bhiriọ, beji a miẹn ghe, ọne isẹhoa sẹyẹ ribhọ nin mhan rẹ deba Osẹnobulua koahua, bha ji mhan mhọn ẹwanlẹn, nan hẹi dọ miẹn ọria bhi ẹwẹ mhan, nọn bha sẹ ọnọn ha deba Osẹnobulua koahua.
2 Beji a rẹ ta ọne ọta nọn mhẹn man ibhokhan Izrẹl, iriọ a yẹ rẹ tale man mhan. Ọkpakinọn, ọne ọta nin ele họnlẹn bha rẹkpa ele, ranmhude ele bha re ọle lu. Urẹọbhọ nọnsele bha ziẹn sẹ bọsi ene re ọle lu, ọnan zẹle nin ele da mhọn akan-ehọ.
3 Ọkpakinọn, rẹji mhan ne mhọn urẹọbhọ, mhan deba Osẹnobulua ha koahua. Rẹji ene bha ha mhọn urẹọbhọ, ọle da yọle: “Mẹn da re ẹkẹkhọmhin ve ihẹn ọbhọ ghe, imẹn ida ji ele da deba mẹn koahua.” Ọle da ta ọnan, arẹmiẹn ghe, ẹghe nin ọle rẹ lu iwẹnna nọnsọle fo bhi ẹghe umunhẹn ọsi ọne agbọn nan ọle rẹ munhẹn ha koahua.
4 Ijan ọkpa bhi Ebenọnkhiale da talọ rẹji ọne ukpẹdẹ nọnzi ihinlọn, ọ da yọle: “Bhi ukpẹdẹ nọnzi ihinlọn, Osẹnobulua da koahua bhi iwẹnna rebhe nin ọle ha lu.”
5 Bhi ije ebhebhe, ọ da sẹyẹ yọle: “Imẹn ida ji ele da deba mẹn koahua.”
6 Bhiriọ, beji a miẹn ghe, ẹbho sẹyẹ ribhọ ne ha deba Osẹnobulua koahua, sẹyẹ, ene a ka ta ọne ọta esili man bha sabọ deba Osẹnobulua koahua ranmhude, ele mhọn akan-ehọ,
7 ọle da gbo kie re ẹghe yi. Ẹghe nọn rele ki gbera, ọle da tẹmhọn ọne ẹghe nan bhi ebe illo ọsi Devid. Ọne ẹghe nan a tiọle “Ẹlẹnan,” beji a rẹ tale bhi okhun ọlẹn yọle, “Ẹlẹnan, bha ha họn urulu nọnsẹmhẹn, bha hẹi mhọn akan-ehọ.”
8 Sade Joshua ka sabọ rẹkpa ibhokhan Izrẹl rẹ deba Osẹnobulua koahua nọn, Osẹnobulua irẹ tẹmhọn ukpẹdẹ ọbhebhe nin ẹbho ha rẹ deba ọle koahua.
9 Bhiriọ, ukpẹdẹ nin ẹbho nesi Osẹnobulua ha rẹ koahua* sẹyẹ ribhọ.
10 Ọria ha dọ deba Osẹnobulua koahua, ọle ki koahua bhi iwẹnna nesọle, beji Osẹnobulua yẹ rẹ koahua bhi iwẹnna nọnsọle.
11 Bhiriọ, bha ji mhan manman dọnmhegbe rẹ deba Osẹnobulua koahua, nan hẹi dọ miẹn ghe, ọria soso bhi ẹwẹ mhan diabe ene ha mhọn akan-ehọ.
12 Ọta nọnsi Osẹnobulua nyẹnlẹnmhin, ọ yẹ manman mhọn ahu. Ọ mun nẹ agbada nọn mhọn unun eva. Ọ sabọ rẹman unan ọria nin mhan gene khin bhi ẹkẹ ọkhọle, bi unan ọria nin mhan khin bhi ukinegbe. Ọ rẹso ọria bhi ako-uguẹ bi ekhọrọ-ekhọrọ nọn ribhi ẹkẹ uguẹ. Ọ sabọ lẹn ebi ọria ria ẹmhọnlẹn, bi ebi ọria mhanmhan bhi ọkhọle.
13 Emhin soso iribhọ nin Osẹnobulua idaghe. Ọle wo daghe emhin rebhe sẹsẹsẹ. Ọle mhan ha taman ebi mhan rẹ khian yẹ.
14 Mhan mhọn ojohẹn nọn khua nọn na bhi otọ diọbhi okhun. Ọle hi Jesu nin Ọmọn nọnsi Osẹnobulua. Bhiriọ, bha ji mhan wo ha wewe ẹmhọn ọlẹn.
15 Ojohẹn nọn ha sabọ tohan imhan, ọle mhan mhọnlẹn, ranmhude ọle lẹn oya nọn lo mhan. Bii imhan, ọle wo miẹn edọnmhẹn kẹkẹ bhi egbe, ọkpakinọn, ọle bha lu khọlọ.
16 Bhiriọ, bha ji mhan wo ha nan erọnmhọn ji Osẹnobulua nọn manman mhọn ifuẹkẹ. Ọ bha khẹke nin mhan ji ofẹn mun mhan rẹ ha lu iriọ. Mhan ha lu iriọ, ọle ki mhọn itohan bi ẹkẹ-ẹjẹjẹ da mhan, yẹ rẹkpa mhan bhi ẹghe nọn khẹke.
Eba gbẹn bho otọle
^ Bhi Grik, “Sabati.”
