Hibru 5:1-14
5 Ọria nọn hi ki rẹ khin nan zẹle nọn ha yi ojohẹn, a zẹ ọle nin ọle rẹkpa ene ẹbho bhi emhin ne rẹtẹ oga nọnsi Osẹnobulua. Ọle hi ọnọn re emhin ze ji Osẹnobulua—emhin nin ene ẹbho rẹ lu ẹsele ji Osẹnobulua, bi ọne ele rẹ zọese ọbhi olukhọ nọnsele.
2 Ranmhude ọ bha yẹ gba nanlẹn fo, ọle sabọ mhọn ẹkẹ-ẹjẹjẹ da ẹbho ne bha lẹn sẹ, bi eria ne lu khọlọ.
3 Sẹyẹ, ranmhude ọ bha gba nanlẹn fo, ọle yẹ zọese ọbhi olukhọ nọnsọle, beji ọle lu nin ẹbho nekẹle.
4 Ọria itobọle re egbe ọle ọbhi ọne ihe nan. Osẹnobulua hi ọnọn ha zẹ ọle, beji ọle rẹ zẹ Erọn.
5 Iriọ yẹ nọn, ọ iyi Kristi tobọle re uyi nin egbe ọle, yẹ re egbe ọle kiẹn ojohẹn. Osẹnobulua hi ọnọn re ọne uyi nanlẹn, ẹghe nin ọle rẹ taman ọlẹn yọle: “Ọmọn nọnsẹmhẹn uwẹ khin; ẹlẹnan, imẹn kiẹn aba uwẹ.”
6 Sẹyẹ, bhi ije ebhebhe bhi Ebenọnkhiale, Osẹnobulua da yọle: “Ohẹn uwẹ khin bọsi Mẹkizẹdẹk. Uwẹ dẹ ha yi ohẹn rẹ sẹbhi ighegheghe.”
7 Ẹghe nin Kristi rẹ ha ribhi ọne otọ nan, ọle da wo ha viẹ bu Osẹnobulua bhi erọnmhọn. Ọle da manman bhii ọnọn ha sabọ miẹn ọlẹn fan bhi obọ uu. Osẹnobulua da wo họn erọnmhọn nọnsọle, ranmhude, ọle wo ha mun ofẹn Osẹnobulua.
8 Arẹmiẹn Ọmọn nọnsi Osẹnobulua ọle khin, emhin nin ọle loya ọle, da man ọlẹn ebi ọ khin nan rẹ ha hẹnmhọn nin Osẹnobulua.
9 Ebi ọle miẹn bhi egbe ki re ọle gba fo, ọle da kiẹn ọnọn ha rẹkpa ene hẹnmhọn nanlẹn miẹn umiẹnfan bi iẹnlẹn ọsi ighegheghe,
10 ranmhude, Osẹnobulua zẹ ọle nọn ha yi ojohẹn, beji Mẹkizẹdẹk rẹ ha yi ojohẹn.
11 Emhin ne bunbun rẹ ha ribhọ nin mhan ho nin mhan ta rẹji ọle. Sokpan, ranmhude bha ikẹ lẹn otọ emhin, ọ bha lẹkhẹ nin mhan rẹ gbotọle fanọn an man bha.
12 Arẹmiẹn ejayenan nian, ibha ọ rẹ khẹke ne ha man ẹbho emhin, ibha bhọ ki guanọ ẹbho ne ha gbo kie na otọ munhẹn ha man bha ọta nọnsi Osẹnobulua. Nin bha rẹ ha le ebale nọn zeze, bha fikie dọ ha wọn amẹn-inyẹn.
13 Ọria nọn sẹyẹ ha wọn amẹn-inyẹn, bha lẹn ọta nọn khiale nọnsi Osẹnobulua. Obhokhan ọle sẹyẹ khin.
14 Ọkpakinọn, ene wanre, ele le ebale nọn zeze—eria ne wo ha noo ẹwanlẹn nọnsele rẹ ria eria. Bhiriọ, ele sabọ lẹn ikikẹ bhi ebe mhẹn bi ebe imhẹn.
