Hibru 6:1-20
6 Bhiriọ, beji a miẹn mhan ka luẹ ene emhin ọhẹnhẹn nọn khẹke nin mhan luẹ rẹji Kristi, bha ji mhan ha lu re alo. Ọ bha khẹke nin mhan kie munhẹn ha luẹ emhin nin mhan ka luẹ. Emhin bọsi: Ebi a ha rẹ fidenọ yẹ bhi iwẹnna ne imhẹn, ebi a rẹ mhọn urẹọbhọ da Osẹnobulua yẹ,
2 ẹmhọn imianmẹn, ẹmhọn obọ nan ne nyan ọria, ẹmhọn ariọkpanọ bhi uu, bi ẹmhọn ibhuohiẹn ọsi ighegheghe.
3 Bhi ahu Osẹnobulua, mhan dẹ wo ha lu re alo.
4 Ẹbho eso ribhọ ne ka rẹ lẹn ẹmhọanta, nan ka rẹ re ẹlinmhin nọn khiale nan, yẹ tie ne dọ nyẹnlẹn bhi okhun.
5 Ele ka lẹn ọta nọn mhẹn nọnsi Osẹnobulua, yẹ dọnmhẹn ukpọkhere bhi emhin esili nin Osẹnobulua ha lu nin ẹbho bhi agbọn* nọn vade.*
6 Ọkpakinọn, ele da de sibhi oga re. Ejayenan nian, ọria soso iyẹ da sabọ rẹkpa ele rẹ fidenọ, ranmhude, ele kie khan Ọmọn nọnsi Osẹnobulua ọbhi oran, yẹ ji ẹbho ha re unun ji ọle.
7 Erọnmhọn nọn na obọ Osẹnobulua vae, ọle amẹn nọn rọ bhi otọ khin. Ọne otọ ha re ọle mọn ebale nin ẹbho ne kọ emhin, ọ ki ha mhẹn.
8 Ọkpakinọn, ahamiẹn igbẹn bi ikhiakhiọ, ọle jẹre bhi ọne otọ, ọ iyẹ da ji a rẹ lu emhin soso. Ọ ki ha kẹ khere nan rẹ fi ọle unun. Bhi ọkike ọle, a ki tuẹ ọle a.
9 Ọkpakinọn ibhio, arẹmiẹn ghe mhan ta ene ẹmhọn nan, mhan lẹnmhin ghe, ibha bha diabe ene de sibhi oga re. Mhan lẹnmhin ghe emhin esili ne ha re ibha miẹn umiẹnfan, ele bha lu.
10 Osẹnobulua ilu emhin nọn bha gba. Ọle ida ye ẹsọn nin bha miẹn nanlẹn an. Ọle ida yẹ ye oyẹẹ nọnsẹbha a, nin bha mhọn da elin nọnsọle bhi uwedẹ nin bha rẹ wo situa ha rẹkpa ene khiale.
11 Ọkpakinọn, mhan guanọ nin ọdeọde bhi ẹwẹ bha sẹyẹ ha wẹnna kaka, beji bha ka lu khẹ. Beji bha da wo ha mhọn ọne iruduba rẹ sẹbhi ọkpẹnlẹn, ghe, ebi bha khuaẹloghe dẹ sẹ bha obọ.
12 Bhiriọ, bha hẹi ha mhọn ọdinbhẹlo. Bha re egbe khọkhọ ẹbho ne miẹn emhin nan ve nin ele, ranmhude nin ele rẹ ziẹngbe yẹ re urẹọbhọ man.
13 Ẹghe nin Osẹnobulua rẹ ve ive nin Ebraham, ọle da re egbe ọle ve ihẹn ọbhọ, ranmhude, ọria ọbhebhe iribhọ nọn gbera ọle.
14 Ọle da taman ọlẹn yọle: “Mẹn dẹ wo nan erọnmhọn nin uwẹ, yẹ lu ọle nin imọn nesẹ manman ha bun.”
15 Ranmhude Ebraham mhọn iziẹngbe, ọne ive nan da sẹ ọle obọ.
16 Ọria ha ve ive, ọle ki re ọria nọn khua okhun gbera ọle rẹ ve ihẹn ọbhọ. Bhiriọ, a iyẹ da ha muan ọne ẹmhọn, ranmhude, ọne ihẹn rẹman ghe, ọle dẹ gene lu ebi ọle tale.
17 Iriọ yẹ nọn, ẹghe nin Osẹnobulua rẹ ha ho nin ọle manman rẹman ẹbho ne ha le ọne ive bhi uku, ghe, emhanmhan nọnsọle ida fidenọ, ọle da ve ihẹn ọbhọ.
18 Ene emhin eva* nan ida sabọ fidenọ. Sẹyẹ, Osẹnobulua ida sabọ bha ohoghe. Ranmhude ọnan, imhan ne nẹ bu ọle re dẹ sabọ ha mhọn ọne isudu ghe, emhin nin mhan khuaẹloghe dẹ sẹ mhan obọ.
19 Ọne ikhuaẹloghe nan mun iẹnlẹn nọnsẹmhan mhọnlẹn, beji emhin nan fi ba bhi otọ ẹdẹ rẹ mun okọ mhọnlẹn. Mhan wo mun udu nyan ọlẹn. Ọne ikhuaẹloghe dẹ re mhan gbera ikọtin nọn ribhi ẹkẹ uwa oga.
20 Jesu da ka nabhọ dọ tuje uwedẹ a nin mhan. Ọle kiẹn ojohẹn bọsi Mẹkizẹdẹk. Ọle dẹ ha yi ojohẹn rẹ sẹbhi ighegheghe.
Eba gbẹn bho otọle
^ La “ore.” Fẹ Ikpọta Nan Re Otọle Man.
^ Bhi Grik, “bhi ahu ọsi agbọn nọn vade.”
^ Ọnin hi, “Ọne ive bi ihẹn nin Osẹnobulua ve ọbhọ.”
