Hibru 7:1-28
7 Ọne Mẹkizẹdẹk nan nin ojie ọsi Selẹm, nọn yẹ yi ohẹn ọsi Osẹnobulua Nọn Ke Okhun Nẹ, da miẹn Ebraham bhi uwedẹ, ẹghe nin Ebraham rẹ ha nabhi okhọnlẹn vade—okhọnlẹn nin ọle da khọn ene ijie miotọ.
2 Ebraham da ne ọkpa bhi igbe nanlẹn bhi emhin rebhe ne ha ne ọle. Ọhẹnhẹn, elin ọsi ọne okpea nan mundia nin “Ojie Ọsi Ikhiakhiale.” Sẹyẹ, ọle hi ojie ọsi Selẹm, ọnin hi, “Ojie ọsi Ọfure.”
3 A bha lẹn aba ọle la inẹn ọlẹn. A bha yẹ lẹn ulin-uwa nin ọle na vae. Rẹ deba ọnin, a bha lẹn ẹdẹ nan biẹ ọle bi ẹdẹ nin ọle yulu. Inian ọle wo diabe Ọmọn nọnsi Osẹnobulua. Bhiriọ, ohẹn ọle khin rẹ sẹbhi ighegheghe.
4 Ebraham nin ọdafẹn-uwa da ne ọkpa bhi igbe bhi emhin ne mhẹn nin ọle muno bhi okhọn nin ọne okpea nan. Okpọria ọne okpea nan wo gene khin.
5 Ẹmhọanta nọn ghe, beji uhi tale, imọn nesi Livai ne ga bhi ihe ọsi ohẹn, ele miẹn ibhio ele ọkpa bhi igbe bhi emhin nesele, arẹmiẹn ghe, imọn nesi Ebraham ene ibhio ele nan khin.
6 Ọkpakinọn, ọne okpea nan nọn miẹn Ebraham ọkpa bhi igbe bhi emhin nesọle, ọ iyi ọmọn nọnsi Livai. Ọle da nan erọnmhọn nin Ebraham, nin Osẹnobulua ve ive nan.
7 Bhi ọsi ẹmhọanta, mhan lẹnmhin ghe, ọria nọn nan erọnmhọn nin ọria, ọle kpọnọ nẹ ọnọn ọle nan erọnmhọn nan.
8 Eria khọnkhan ne ha sabọ yu, ele ibhokhan Livai nin a ha ọkpa bhi igbe nan khin. Bhi obọ nọnkẹle, ọria nin Ebenọnkhiale yọle ọ sẹyẹ nyẹnlẹn, ọle a ha ọkpa bhi igbe nan.
9 Bhi ọsi ẹmhọanta, mhan dẹ sabọ yọle ghe, Livai nan ha ọkpa bhi igbe nan, bhọ yẹ ha ọkpa bhi igbe nin ọne okpea nan, rẹ na obọ Ebraham,
10 ranmhude, ọmọn nọn ha na bhi ulin* ọsi Ebraham vae, ọle Livai ha khin, ẹghe nin Ebraham rẹ ha ọkpa bhi igbe nin Mẹkizẹdẹk.
11 Iwẹnna ọsi ohẹn nin ibhokhan Livai ha lu deba Uhi nin Osẹnobulua ne nin ibhokhan Izrẹl. Sade ohẹn ne na bhi ulin-uwa ọsi Livai vae sabọ rẹkpa ẹbho rẹ kiẹn ene gbale nọn, ọhẹn nọn diabe Erọn ọkpa a ha rẹ ha miẹn, a irẹ kie ha guanọ ohẹn ọbhebhe bọsi Mẹkizẹdẹk.
12 Beji a miẹn ghe, a fi ohẹn denọ, ọ da yẹ khẹke nan fi ọne Uhi denọ.
13 Ọne okpea nan na bhọ talọ je, ulin-uwa ọbhebhe ọle na vae, ulin-uwa nin ọria soso bha da sẹ ka lu iwẹnna ohẹn khẹ.
14 Mhan lẹnmhin ghe, ulin-uwa ọsi Juda Ebeanlẹn mhan na vae, arẹmiẹn Mozis bha tale ghe, ohẹn soso dẹ na bhi ọne ulin-uwa nin vae.
15 Ọne ẹmhọn nan da wo manman khia bhi ẹlo, ẹghe nin ohẹn ọbhebhe nọn diabe Mẹkizẹdẹk rẹ zegbere.
16 Ranmhude ọle mhọn ahu ọsi iẹnlẹn nan ida sabọ fuẹn an, ọle zẹle nin ọle da kiẹn ohẹn, ọ iyi ranmhude ọle na ulin-uwa ọsi ohẹn vae beji uhi tale.
17 Rẹji ọle, Ebenọnkhiale da yọle: “Ohẹn uwẹ khin bọsi Mẹkizẹdẹk. Uwẹ dẹ ha yi ohẹn rẹ sẹbhi ighegheghe.”
18 Bhiriọ, Osẹnobulua da rẹ ọkpẹnlẹn ọbhi uhi nọn ka rẹ ha ribhọ, ranmhude ọ bha gba fo, sẹyẹ, ọ bha sabọ rẹkpa mhan.
19 Ọne Uhi bha sabọ re emhin soso kiẹn ebe gbale. Bhi obọ nọnkẹle, ikhuaẹloghe ọsọgbọn nan re nin mhan da re emhin rebhe gba. Ọne ikhuaẹloghe nan zẹle nin mhan da sabọ ha sike Osẹnobulua.
20 Osẹnobulua ve ihẹn ọbhọ ẹghe nin ọle rẹ zẹ Jesu nọn ha yi ojohẹn.
21 (Bhi ọsi ẹmhọanta, ẹbho eso ribhọ nan bha ve ihẹn nan ọkuẹsẹ ele kiẹn ohẹn. Bhi obọ nọnkẹle, Osẹnobulua ve ihẹn ọbhọ ghe, Jesu dẹ ha yi ojohẹn. Ọle da yọle: “Mẹn nin Jehova* ve ihẹn ọbhọ, mẹn ida fi ọkhọle denọ. ‘Uwẹ dẹ ha yi ohẹn rẹ sẹbhi ighegheghe.’”)
22 Ranmhude ọnan, Jesu da ha yi ọria nan rẹ yi ọbhọ ghe, akovẹn nọn mhẹn nẹ ọnọn ka ribhọ dẹ munsẹ.
23 Sẹyẹ, ranmhude eria khọnkhan ne ha sabọ yu ene ohẹn khin, ele bha sabọ ha ga khian. Bhiriọ, ele ha yu, ọria ọbhebhe ki nabhi ihe nọnsele.
24 Bhi obọ nọnkẹle, ọria ọbhebhe ida nabhi ihe nọnsi Jesu, ranmhude, ọle dẹ ha nyẹnlẹn khian rẹ sẹbhi ighegheghe.
25 Ọle dẹ sabọ re umiẹnfan nin ẹbho ne na obọ ọle bu Osẹnobulua re. Ranmhude ọle ribhi agbọn rẹ sẹbhi ẹdẹdẹmhẹndẹ, ọle dẹ wo sabọ ha bhii nin ele.
26 Emhin nọn mhẹn nọn ghe, mhan mhọn ojohẹn nọn sẹ inian. Ọle mhọn asun-rẹkhan. Ọle ilu emhin ebe. Ọria nọn khiale ọle khin. Ọle bha diabe eria ne lu emhin ebe. Rẹ deba ọnin, ọle khua okhun gbera ene okhun.*
27 Ọle bha diabe ene ojohẹn ne re emhin zọese ukpẹdẹ-ukpẹdẹ bhi olukhọ nọnsele bi ọsi eria nekẹle, ranmhude, ọle ka lu ene izọese rebhe fo, bhi ọne ẹghe ọkpa nin ọle rẹ re iẹnlẹn nọnsọle zọese.
28 Eria khọnkhan nọn bha gba nan, ele Uhi nọnsi Mozis zẹle ne ha yi ojohẹn. Bhi obọ nọnkẹle, Ọmọn nọn gba nan rẹ sẹbhi ighegheghe, ọle Osẹnobulua zẹle, ẹghe nin ọle rẹ ve ive yẹ ve ihẹn ọbhọ, beji a mun ọne Uhi gbọ fo.
