Hibru 8:1-13
8 Ọnan hi ebi mhan bhọ tẹmhọn ọlẹn: Mhan mhọn ojohẹn nọn sẹ inian. Ọle dotua bhi obọ obera ọsi ojukhuo nọnsi Osẹnobulua nọn ribhi okhun.
2 Ọle hi ọnọn ga bhi eje khiale, bhi ọne uwa oga ọsaje nin Jehova* tobọle mun gbọ. Ọ iyi eria mun ọne uwa oga gbọ.
3 Iwẹnna ọsi ojohẹn nọn nin ọle rẹ re emhin ze—emhin nan rẹ lu ẹsele nin Osẹnobulua, bi emhin nan rẹ zọese ọbhi olukhọ. Bhiriọ, ọ da yẹ khẹke nin ọne ojohẹn nan ha mhọn ebi ọle ha rẹ zọese.
4 Sade ọne otọ nan ọle ye nọn, ọle irẹ ha yi ojohẹn, ranmhude, ẹbho ka ribhọ fo ne re emhin zọese beji Uhi tale.
5 Arẹkhọkhọ ọsi emhin ne ribhi okhun, ọle emhin nin ene ojohẹn nan ha lu khin. Uhi nin Osẹnobulua gbe nin Mozis ẹghe nin Mozis rẹ ha ho nin ọle bọn ibọkpọ ọsi oga da re ọnan man. Osẹnobulua da taman ọlẹn yọle: “Lu ene emhin rebhe ne diabe ene a rẹman ẹn bhi uke oke.”
6 Ọkpakinọn, bhi ejayenan nian, iwẹnna oga nọn mhẹn gbera ọsi ele, ọle a mun nin Jesu, ranmhude, ọle yẹ hi ọsuọnmhan ọsi akovẹn nọn mhẹn gbera ọnọn ka ribhọ. Ive ne mhẹn gbera ive ne ka ribhọ, ọle a rẹ mun ọne akovẹn nan gbọ.
7 Ranmhude ọne akovẹn nin ọhẹnhẹn bha gba fo, ọle zẹle nan da ha guanọ ọbhebhe.
8 Osẹnobulua ki daghe ọle ghe ọ bha gba nin ene ẹbho, ọle da yọle: “Inian imẹn nin Jehova* tale, ‘Ghọle! ẹghe vade nin mẹn ha rẹ deba ibhokhan Izrẹl, bi ibhokhan Juda ve akovẹn ọsọgbọn.’
9 Jehova* da yẹ yọle: ‘Ọne akovẹn nan ida diabe akovẹn nin mẹn deba aba ibha nin ẹdẹlẹ ve, bhi ẹghe nin mẹn rẹ ne ele sibhi otọ Ijipt re. Ele bha re obọ rẹkhan ọne akovẹn, bhiriọ, mẹn bha yẹ ha gbẹloghe ele.’
10 “Jehova* yọle: ‘Ọne ẹghe nin ha gbera, mẹn dẹ deba ibhokhan Izrẹl ve ọne akovẹn nan. Mẹn dẹ ne uhi nesẹmhẹn ele bhi otọ ẹkẹ, yẹ gbẹn ọlẹn ele bhi ọkhọle. Mẹn ki kiẹn Osẹnobulua nọnsele, ele ki ha yi ẹbho nesẹmhẹn.
11 “‘Ele iyẹ da ha taman ẹbho nesele bi ibhio ele yọle: “Bha lẹn Jehova!”* Ranmhude, ele rebhe dẹ lẹn mẹn, ke obhokhan ke ọwanlẹn.
12 Mẹn dẹ re emhin ebe nin ele lu hunmhan ele. Mẹn iyẹ da ye olukhọ nọnsele re.’”
13 Ẹghe nin ọle rẹ tẹmhọn akovẹn ọsọgbọn, ọle da re ọnọn ka ribhọ kiẹn emhin nan iyẹ mhọn ebi a rẹ lu. Emhin ha dọmanlẹn yẹ kiẹn ebe iyẹ mhọn ebi a rẹ ọle lu, ọne emhin dẹ kẹ si egbe kie.
