Hibru 9:1-28
9 Bhi odotọ ọne akovẹn nọn ka ha ribhọ khẹ, uhi kẹkẹ, ele ha ribhọ rẹji ebi a ha rẹ ha ga Osẹnobulua yẹ. Uwa oga nọn khiale nan da yẹ ga, da ha ribhi ọne otọ nan.
2 A da bọn eji a ka sẹ bhi ọne uwa oga. Enan a tiọle Eje Khiale. Ọne ugha nan ebi a mun orukpa ọi ye, ọle itebu ye, ọle ibrẹd nan mun wa bhi uke ọle yẹ ye.
3 Eji a tiọle Eje Khia Nẹ da ha ribhi ikeke ikọtin nọnzi eva.
4 Enan hi ẹkpẹti ọsi akovẹn nan re igolu lu bi ebi a rẹ tuẹ emhin nọn vin-ohin an ha ye. Igolu a yẹ rẹ lu ọle. Akhe nan re igolu lu nin mana ye, bi ukpokpo ọsi Erọn nọn mọn aroro, bi apapa udo nan gbẹn uhi ọsi ọne akovẹn ọi, ele ha ribhi ọne ẹkpẹti akovẹn.
5 Amanzẹ eva ọsi ene ẹhi natiọle chẹrob, da ha ribhi uke ugue ọsi ọne ẹkpẹti ọsi akovẹn bhi eji a da zọese ọbhi olukhọ. Ọkpakinọn, ọ iyi ene ẹmhọn nan mhan ha gbotọle fanọn an nian.
6 A ki re inian lu ene emhin nan fo, ẹghe rebhe ene ohẹn rẹ ha nabhi obọ ọhẹnhẹn bhi ọne uwa oga, dọ ha lu iwẹnna oga nọnsele.
7 Bhi obọ nọnkẹle, ọne ojohẹn ọkpa nabhi obọ nọnzi eva bhi ọne uwa oga bhi osukpa bhi ukpe. Ọle ki mun aranlẹn nabhọ, nin ọle rẹ zọese ọbhi olukhọ nọnsọle, bi olukhọ nin ene ẹbho dobọ lu.
8 Ẹlinmhin nọn khiale da wo re ọle man ghe, odẹ nan ha rẹkhan nabhi eje khiale bha sẹ tuje a, ranmhude, ọne ibọkpọ ọsi oga nin ọhẹnhẹn sẹyẹ ribhọ.
9 Arẹkhọkhọ ọsi emhin ne sunu bhi ọne ẹghe nan nian, ọle ọne ibọkpọ ọsi oga ha khin. Bhi odotọ ọne emhanmhan nin, ẹbho da ha re emhin lu ẹsele nin Osẹnobulua yẹ zọese ji ọle. Ọrẹyiriọ, ene emhin nan bha sabọ rẹkpa ọria nọn ga Osẹnobulua rẹ ha mhọn ọkhọle nọn wo khia fo.
10 Ebale bi anyọn bi emhin kẹkẹ nan lu nan rẹ kpe egbe khia, ele a rẹ ha lu ọne izọese nan. Ene emhin nan da ha yi uhi ne rẹtẹ ukinegbe. A da yọle na ha lu ene emhin nan ọkuẹsẹ ẹghe nan rẹyi nan rẹ dia emhin.
11 Ọkpakinọn, ẹghe nin Kristi rẹ kiẹn ojohẹn, yẹ rẹkpa mhan ha mhọn ene emhin esili nin mhan ki mhọnlẹn nian, ọle da nabhi ibọkpọ nọn mhẹn nẹ. Ọne ibọkpọ nan kpọnọ nẹ ọnọn ka ha ribhọ. Ọ iyi obọ a rẹ man ọlẹn. Sẹyẹ, ọ iyi ọne otọ nan ọ ye.
12 Ọ iyi aranlẹn ọsi ẹbhe bi ọsi ẹmena ọle mun nabhi eje khiale, aranlẹn nọnsọle ọle mun nabhọ. Osukpa ọkpa ọle lu ọnan. Ọle da rẹkpa mhan rẹ miẹn umiẹnfan ọsi ighegheghe.
13 Ene ohẹn ha khakha aranlẹn ọsi ẹbhe bi ọsi ẹmena, la ẹmọn* ọsi obhi ẹmena nan tuẹ a nyan ọria nọn bha khia, ọ sabọ kpe ọle khia.
14 Ahamiẹn ene emhin nan sabọ kpe ọria khia, eka-eka ki aranlẹn nọnsi Kristi? Rẹ na obọ ẹlinmhin nọnsi Osẹnobulua nọn da ha ribhọ rẹ sẹbhi ighegheghe, ọle Kristi rẹ re egbe nọnsọle nọn khiale rẹ zọese ji Osẹnobulua, beji ọle ha da kpe ọkhọle nọnsẹmhan khia bhi iwẹnna ne bha kiẹn ọlẹn. Bhiriọ, mhan ki sabọ ha re oga nọn khiale ji Osẹnobulua nọn nyẹnlẹn.
15 Ọnan zẹle nin ọle da yi ọsuọnmhan ọsi ọne akovẹn ọsọgbọn, beji a ha da miẹn ene a tiele ki sabọ miẹn ọne uku ọsi ighegheghe nan ve nin ele. Uyumhin nin ọle yu zẹle nan da sabọ fan ele fia, yẹ dẹ ele kiere bhi obọ olukhọ nin ẹbho ha lu bhi odotọ akovẹn nọn ka ha ribhọ.
16 Ahamiẹn ọria deba Osẹnobulua ve akovẹn, ọkhẹke nin ọne ọria nan deba ve ọne akovẹn yu,
17 ranmhude, ahamiẹn ọne ọria bha yu, ọne akovẹn ida wẹnna. Ọle ha yu, ọle ọne akovẹn ha da munhẹn ha wẹnna.
18 Iriọ yẹ nọn. Aranlẹn ọne akovẹn nọn ka ha ribhọ rẹ munhẹn ha wẹnna.
19 Ẹghe nin Mozis rẹ ta ene Uhi rebhe man ibhokhan Izrẹl fo, ọle da sa aranlẹn ọsi ẹmena bi aranlẹn ọsi ẹbhe yẹ sa amẹn ba ọle, ọle da diẹn olu nọn gian bhi eran hisọp, yẹ re ọle fianmhẹn ọne aranlẹn nyan ọne ebe bi ene ẹbho.
20 Ọle da yọle: “Ọne aranlẹn nan a rẹ mun ọne akovẹn nin Osẹnobulua deba bha ve gbọ. Ọle guanọ nin bha re obọ rẹkhan ọne akovẹn.”
21 Ọle da yẹ fianmhẹn ọne aranlẹn nyan ọne ibọkpọ bi ene emhin kẹkẹ nan rẹ lu iwẹnna oga.
22 Beji Uhi tale, aranlẹn a rẹ kpe emhin ne bunbun khia. Ahamiẹn a bha gbe aranlẹn kua, a ida sabọ rẹhunmhan olukhọ.
23 Bhiriọ, ọ da khẹke nan re aranlẹn ọsi elanmhẹn rẹ ha kpe ene emhin nan khia—ene emhin nan ne yi arẹkhọkhọ ọsi emhin ne ribhi okhun. Ọkpakinọn, izọese nọn mhẹn gbera ọsi elanmhẹn, ọle ọkhẹke nan rẹ kpe emhin ne ribhi okhun khia.
24 Ọ iyi eje khiale nan re obọ man Kristi na i. Arẹkhọkhọ ọsi eje khiale ọsaje, ọle ọne a re obọ man khin. Okhun-ẹlinmhin tee ọle na i. Ọle da dọ mundia bhi odalo Osẹnobulua ranmhude imhan.
25 Ọle ida ha re egbe nọnsọle zọese ẹghe-ẹghe, beji ọne ojohẹn rẹ mun aranlẹn nọn iyi ọsi ọle nabhi eje khiale ukpe-ukpe.
26 Sade iriọ ọle da ha lu, oya ọle ha wo rẹ ha le, rẹ na bhi ẹghe umunhẹn ọsi ọne agbọn* nan ha de. Ọkpakinọn, ọle bha lu iriọ. Osukpa ọkpa ọle re egbe nọnsọle man bhi ọne agbọn nan, bhi ẹghe ọkpẹnlẹn ọsi ọne ore nan. Ọle da yẹ re egbe nọnsọle zọese, nin ọle rẹ re olukhọ kie.
27 Osukpa ọria yu. Ọkpakinọn, mhan ha yu fo, a ki bhuohiẹn mhan.
28 Iriọ yẹ nọn, Kristi da yu ọbhi olukhọ ọsi ẹbho ne bunbun osukpa ọkpa. Ẹghe nin ọzeva nin ọle ha rẹ vae, ọ iyẹ yi olukhọ ha re ọle vae. Ene re ọkhọ rebhe ha guanọ ọlẹn, beji ele ha da miẹn umiẹnfan, ki miẹn ọlẹn.
