Jud 1:1-25
1 Imẹn nin Jud nin ọguọmhandia ọsi Jesu Kristi, nọn yẹ yi obhio Jemis gbẹn ọne ebe nan ji enanzẹle, nin Osẹnobulua nin Aba mhan hoẹmhọnlẹn yẹ gbega nin Jesu Kristi.
2 Imẹn bhii nin itohan bi ọfure bi oyẹẹ nin ibha miẹn bhi obọ Osẹnobulua ha tuẹn okhun.
3 Ibhio imẹn nin imẹn hoẹmhọnlẹn, ẹmhọn umiẹnfan nin imhan ko miẹn bhi obọ Osẹnobulua, ọle imẹn rẹ ha guanọ nin mẹn gbẹn ji ibha. Ọkpakinọn, imẹn da kere ghe, ọkhẹke nin imẹn taman ibha nin ibha manman dọnmhegbe rẹ gbega iman-emhin ọsi ẹmhọanta nan mun ọbhi obọ ọsi ene khiale. Osukpa ọkpa a mun ọne ẹmhọanta nan ele bhi obọ.
4 Ebezẹle mẹn ta ọnan hi, ikpea eso do nabhi ẹwẹ bha. Ebenọnkhiale ka tẹmhọn ele bhi ẹghe nọn gbera, ghe, ele dẹ miẹn ibhuohiẹn nọn sẹ inian. Eria olukhọ ele khin, ne re ifuẹkẹ nọnsi Osẹnobulua kiẹn emhin nọn re otọ nin ele rẹ ha lu ilọnmhọn okan.* Ele yẹ fikekegbe ọnọn nyan imhan, nin Jesu Kristi nin Ebeanlẹn imhan.
5 Imẹn lẹnmhin ghe ibha ka lẹn ene emhin nan. Ọkpakinọn, imẹn guanọ nin ibha yere ghe, arẹmiẹn Jehova* miẹn ẹbho nesọle fan bhi otọ Ijipt fo, ọle da sẹyẹ fuẹn ene bha ha mhọn urẹọbhọ a.
6 Sẹyẹ, ene ẹhi ne bha debhi ihe nọnsele a nin Osẹnobulua ne ele ọi bhi okhun, ọle mun ele ọbhi ighan bhi ighegheghe bhi ẹkpebiuki ha khẹ ukpẹdẹ ibhuohiẹn.
7 Iriọ ibhokhan Sodọm bi Gomora bi agbaẹbho ne nẹga ele yẹ lu. Ele da wo ha gboghẹ,* yẹ ha noo egbe nọnsele bhi uwedẹ nọn bha khẹke. Bhiriọ, Osẹnobulua da re eranlẹn ọsi ighegheghe rẹ fuẹn ele a. Ele da kiẹn ijiẹmhin nan rẹ sekha nin mhan.
8 Ọrẹyiriọ, emhin ebe ọkpa ene ikpea nan ria bhi ọkhọle.* Ele riia egbe ele a, yẹ mun eria ebhebhe riia a. Ele re ẹlo gbe ene ribhi ihe a, yẹ re unun ji ene Osẹnobulua re uyi nan.
9 Ẹghe nin Maikẹ nin ọdiọn ene ẹhi bi Ojuu bhọ rẹ ha gbegbe ọbhi ekuegbe nọnsi Mozis, Maikẹ bhọ bha gbudu re unun riia ọle a yẹ bhuohiẹn gbe ọle. Sokpan, ọle da yọle: “Jehova* ha ne uwẹ gui.”
10 Sokpan, ene ikpea nan re unun riia emhin rebhe nin ele bha lẹn otọle a. Ele diabe elanmhẹn ne iria eria. Emhin nin ele zẹwẹ lẹn, ọle ele lu rẹ riia egbe ele a.
11 Ohan ele to mẹn an, ranmhude ele zẹ ukpoẹ nin Keni zẹle, ele tua rẹkhan uwedẹ nọn bha gba nin Belam rẹkhan ranmhude elele nin ele guanọ, sẹyẹ, ele da ta ọta rẹ sọtẹ beji Kora lu. Bhiriọ, ele da miẹn ugbekhuelo bọsi Kora!
12 Ene ẹbho nan diabe udo ne nẹhe bhi odotọ amẹn bhi iluemhin nin ibha lu nin ibha da re oyẹẹ man. Ele deba bha le ebale. Esun-ohuan ne lẹn ọsi egbe ele ọkpa ele khin,* okhun nọn hẹyo-hẹre nọn bha ka rọ, eran ne bha ka mọn ikpẹ bhi ẹghe nọn khẹke, ne yu fo sẹsẹsẹ, nan yẹ vu sibhi otọ re.
13 Beji okpẹdẹ nọn fiyo-fire rẹ kpa iku bi eyaya dagbare, iriọ ele rẹ re emhin ẹkhọle ne ri ele bhi egbe man. Ahiẹnhiẹn ne bha lẹn eji ele khian ele khin, a re ẹkpebiuki ọsi ighegheghe ya khẹ ele.
14 Enọk nọn yi ọria nọnzi ihinlọn bhi ulin-uwa nọnsi Adam da kha akhasẹ rẹji ele yọle: “Jehova* bi ẹhi nesọle da vae
15 dọ bhuohiẹn ẹbho rebhe, yẹ bhuohiẹn gbe eria ọbe rebhe bhi emhin ebe nin ele lu, nin ele rẹ re ẹlo gbe Osẹnobulua a, yẹ ta ọta awaa da ọle.”
16 Ene ikpea nan wo sabọ guinẹzọ. Ele ki ha zaka-zuyọn yẹ lu emhin nin egbe ele guanọ. Iriọ ele yẹ rẹ wo manman dẹgbọ. Ele yẹ wo re ikpunun gẹn ẹbho* rẹ khu ọbhi ọsi egbe ele.
17 Rẹji ibha, ibhio imẹn nin imẹn hoẹmhọnlẹn, ibha yere ọta nin etuegbe nesi Jesu Kristi nin Ebeanlẹn imhan ka ta.
18 Ele da ha taman ibha ẹghenin yọle: “Bhi ẹghe ọkike, ẹbho ne re emhin zọojiẹ dẹ zegbere. Ele ki ha lu emhin ebe nin egbe nọnsele guanọ.”
19 Enan hi ene si iwaegbea re, ne lu emhin bii elanmhẹn, ne bha ji ẹlinmhin nọnsi Osẹnobulua da dia ele.
20 Ọkpakinọn, ibhio mẹn nin mẹn hoẹmhọnlẹn, bha manman deziẹn bhi urẹọbhọ nọn khiale nọnsẹbha, ibha ha yẹ ji ẹlinmhin nọn khiale ha dia ibha beji ibha rẹ nan erọnmhọn,
21 beji ibha ha da sabọ ha lu emhin ne ha re Osẹnobulua hoẹmhọn ibha, yẹ sabọ mundia khẹ itohan nọnsi Jesu Kristi nin Ebeanlẹn imhan nọn ha re iẹnlẹn ighegheghe nin ibha.
22 Sẹyẹ, bha wo ha mhọn itohan da ene mhọn edandan;
23 hinmhin ele sibhi eranlẹn re. Sokpan, bha ha noo ẹwanlẹn beji ibha rẹ mhọn itohan da enekẹle. Ibha ha yẹ re egbe nẹ bhi ukpọn nin ele re olukhọ riia a.
24 Osẹnobulua dẹ sabọ gbega bha nin bha hẹi dere. Ọle dẹ sabọ rẹkpa bha rẹ kpe khia bhi uyi nọnsọle, yẹ re eghọnghọn nọn khua nin ibha.
25 Rẹ nabhi itẹbitẹ rẹ sẹbhi itẹbitẹ, ji ọne uyi, ọghọ, bi ugbẹloghe ha yi ọsi Osẹnobulua ọkpa sẹsẹ, nọn miẹn mhan fan rẹ na obọ Jesu Kristi nin Ebeanlẹn imhan. Isẹ.
Eba gbẹn bho otọle
^ Fẹ Ikpọta Nan Re Otọle Man, “Iẹnlẹn Okan.”
^ Fẹ Ikpọta Nan Re Otọle Man, “Oghẹ.”
^ Bhi Grik, “ebhohiẹ ebe ọkpa ene ikpea nan bhohiẹ.”
^ Bhi Grik, “Esun-ohuan nin ofẹn imun nin ele rẹ le ọbhi ẹkẹ nọnsele ọkpa.”
^ La “fi abẹdo.”
